މެޑްރިޑް (މެއި 9) - މެންޗެސްޓާ ސިޓީއާ ދެކޮޅަށް ކުޅޭއިރު ހުއްޓުވަންޖެހޭނީ މުޅި ޓީމު ކަމަށާއި އެ ޓީމުގެ ފޯވަޑް އާލިން ބްރައުޓް ހާލަންޑަށް އެކަނި ސަމާލުކަން ދެވެން ނެތް ކަމަށް ރެއާލް މެޑްރިޑްގެ ކޯޗު ކާލޯ އަންޗެލޮޓީ ބުނެފި އެވެ.
ޗެމްޕިއަންސް ލީގުގެ ސެމީ ފައިނަލްގެ ފުރަަތަމަ ލެގުގައި މިރޭ އަމިއްލަ ދަނޑުގައި ސިޓީއާ ދެކޮޅަށް ރެއާލް ނުކުންނާނެ އެވެ.
މި މެޗަށް ނުކުންނައިރު ސިޓީގެ އެންމެ ނުރައްކާތެރި ކުޅުންތެރިއަކަށް ހުރީ ނޯވޭގެ ފޯވަޑް ހާލަންޑެވެ. މި ސީޒަންގައި އޭނާ ވަނީ 45 މެޗުން 51 ލަނޑު ޖަހައިފަ އެވެ. މީގެ ތެރޭގައި ޗެމްޕިއަންސް ލީގުގެ އަށް މެޗުން ޖެހި 12 ލަނޑު ވެސް ހިމެނެ އެވެ.
އަންޗެލޮޓީ ބުނީ އޭނާގެ ޕްލޭންތައް އޮތީ ސިޓީގެ މުޅި ޓީމު ހުއްޓުވުން ކަމަށެވެ. ހާލަންޑަށް އެކަނި ސަމާލުކަން ދީގެން ފަރުނުޖެއްސޭނެ ކަމަށް އަންޗެލޮޓީ ގަބޫލުކުރެ އެވެ.
"ހަމަ ޔަގީނުންވެސް ހާލަންޑަކީ ވަރަށް ނުރައްކާތެރި ކުޅުންތެރިއެެއް. އެކަމަކު، ހާލަންޑްގެ ވާހަކަ އެކަނި ދެއްކުމަކީ ވަރަށް ރަނގަޅަށް އެޓޭކްކޮށް، ޑިފެންޑްކޮށް، މޮޅު ފުޓްބޯޅައެއް ކުޅޭ އުފެއްދުންތެރި ޓީމެއްގެ ވާހަކަ ނުދެއްކުން،" އެންޗަލޮޓީ ބުންޏެވެ.
"އަހަރަމެން މި ގޭމް ތައްޔާރުކުރަނީ ހާލަންޑް ހުއްޓުވާކަށް ނޫން. އެކަމަކު، ހުއްޓުވަން އުނދަގޫ ޓީމެއް ހުއްޓުވަން."
ޗެމްޕިއަންސް ލީގު ކާމިޔާބުކުރުމަށް ސިޓީން ފާއިތުވި އަހަރުތަކުގައި ގިނަ މަސައްކަތްތަކެއް ކުރި ނަމަވެސް، އަދި މިހާތަނަށް ކާމިޔާބެއް ލިބޭވަރެއް ނުވެ އެވެ. އެކަމަކު، އެހެން އަހަރުތަކާ ހިލާފަށް މި އަހަރު އެ ޓީމުގެ އެޓޭކްގައި ހާލަންޑް ހުރުމަކީ އެ ޓީމަށް ލިބޭ ބޮޑު ފައިދާ އެކެވެ.
އަންޗެލޮޓީ ބުނީ ހާލަންޑާ އެކު ސިޓީގެ ޓީމު މިދިޔަ ސީޒަނަށް ވުރެ ވަރުގަދަ ކަމަށް އޭނާ ވެސް ގަބޫލުކުރާ ކަމަށެވެ.
"އިސްކޮޅުން ދިގު ފޯވަޑެއް ހުރީމަ، މިހާރު ސިޓީ އަށް މަތިން ލާ ބޯޅަތަކުގެ ބޭނުން ކުރިއަށްވުރެ ބޮޑަށް ހިފޭ. އެ ޓީމުގެ ކުޅުން ބަދަލެއް ނުވޭ. ހަމަ ކުރިން ވެސް ފެންނަ ގޮތަށް ވަރަށް އޯގަނައިޒްކޮށް ކުޅެނީ،" އަންޗެލޮޓީ ބުންޏެވެ.
މިއީ ޗެމްޕިއަންސް ލީގުގެ ނޮކައުޓް ބުރުގައި ސިޓީ އާއި ރެއާލްގެ ތިން ވަނަ ކުރިމަތިލުމެވެ. މި ތިން މެޗުގެ ތެރެއިން ދެ މެޗު ކުޅެފައިވަނީ ގާޑިއޯލާ 2016 ވަނަ އަހަރު ސިޓީއާ ހަވާލުވި ފަހުންނެވެ. އެ ގޮތުން، ރެއާލުން ވަނީ ދެ ފަހަރެއްގެ މަތިން ސެމީ ފައިނަލުގައި ސިޓީ ކަޓުވާލައިފަ އެވެ. އެއީ މިދިޔަ ސީޒަނުގެ އިތުރުން، ސިޓީގެ ކޯޗަކަށް މެނުއަލް ޕެލެގްރީނީ ހުއްޓައި، 2015/2016 ވަނަ އަހަރު އެވެ. ސިޓީން ވަނީ 2019/2020 ވަނަ އަހަރުގެ ޗެމްޕިއަންސް ލީގުގެ ގަދަ 16 ބުރުގައި ރެއާލް އަތުން ދެ ލެގުގައި ވެސް މޮޅުވެ، ކާމިޔާބު ހޯދައިފަ އެވެ. އޭރު ކޯޗަކީ ގާޑިއޯލާ އެވެ.
ސިޓީން ރެއާލް ދަނޑުގައި ކުޅޭ ޗެމްޕިއަންސް ލީގުގެ ފުރަތަމަ ލެގުގެ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
