ގައުމީ އެއާލައިން، މޯލްޑިވިއަންގެ ދަތުރުތައް ދަރަވަންދޫއަށް އަލުން ފެށުމަށް ތައްޔާރުވެއްޖެ އެވެ.
މިމަހުގެ 15 ވަނަ ދުވަހު އެ ދަތުރުތައް ފެށުމަށް ހަމަޖެހިފައިވާއިރު، އެ ދުވަހުން ފެށިގެން ދުވާލަކު އެއް ފުލައިޓު އެޅުމަށް ނިންމާފައިވާކަމަށް އެ އެއާލައިނުގެ މީޑިއާ އޮފިޝަލް، އަހުމަދު މުޝްއިލް ވިދާޅުވި އެވެ.
މީގެ ތިން އަހަރު ކުރިން، 2019 ގައި ދަރަވަންދޫއަށް މޯލްޑިވިއަންއިން ކުރި ދަތުރުތައް މެދުކަނޑާލީ ކޮވިޑުގެ ބަލިމަޑުކަމާ ގުޅިގެންނެވެ. އާލަމީ އެވަބާއަށްފަހު މޯލްޑިވިއަނުން ވަނީ އެ އެއާލައިނުގެ ފްލީޓު އެއްކޮށް އޭޓީއާރަށް ބަދަލު ކުރުމުގެ މަސައްކަތް ފަށައިފަ އެވެ.
އެގޮތުން މިދިޔަ އަހަރު ވަނީ ތާރީހުގައި ވެސް އަލަށް އޭޓީއާރު މަރުކާގެ ތިން މަތިންދާ ބޯޓު ފްލީޓަށް އިތުރުކޮށްފަ އެވެ. މުޝްއިލް ވިދާޅުވީ ދަރަވަންދޫއަށް ދަތުރުތައް ފެށުމަށް ނިންމީ ފްލީޓު އިތުރުވުމާ އެކު އެއާލައިނަށް ލިބުނު ވަރުގަދަ ކަމާއެކުގައި ކަމަށެވެ.
"މިއީ ދިވެހި ރައްޔިތުންނަށް އިތުރު ލުއިފަސޭހަތައް ހޯދައިދިނުމަށް ޓަކަައި އަޅުގަނޑުމެން ކުރަމުންދާ މަސައްކަތުގެ ތެރެއިން ނިންނި ނިންމުމެއް، އަދި ކުރިއަށް އޮތް ތަނުގައި ވެސް ރާއްޖޭގެ ގިނަ މަންޒިލްތަކަށް ދަތުރުތައް އަލުން ފެށުމަށް ތައްޔާރުވަމުން މިދަނީ،" އޭނާ ވިދާޅުވި އެވެ.
މޯލްޑިވިއަންއިން މީގެ ކުރިން ބޭނުން ކުރަމުން އައި، ޑޭޝް މަރުކާރުގެ ބޯޓުތަކުގެ ބަދަލުގައި އޭޓީއާރު މަރުކާގެ ބޯޓުތަކަށް މުޅި ފްލީޓު ބަދަލުކުރުމުގެ މަސައްކަތް މިދިޔަ އަހަރުން ފެށިގެން އެ އެއާލައިނުން ކުރަމުން އަންނައިރު، ކުރިއަށް އޮތް ދެ އަހަރު ދުވަހުގެ ތެރޭގައި އިތުރު ފަސް މަތިންދާ ބޯޓު މޯލްޑިވިއަންގެ ފްލީޓަށް އިތުރު ކުރާނެ ކަމަށް މުޝްއިލް ވިދާޅުވި އެވެ.
މިމަހުގެ 15 ގައި ފެށުމަށް ހަމަޖެހިފައިވާ ދަތުރުތަކަށް މިއަދުން ފެށިގެން ޓިކެޓު ވިއްކަން ހުއްދަ ދީފައިވާ ތަންތަނާއި، މޯލްޑިވިއަންގެ ވެބްސައިޓު، ކޯލް ސެންޓާ އަދި މޯބައިލް އެޕު މެދުވެރިކޮށް ޓިކެޓު ގަނެވޭނެ އެވެ.
