ޓޯކިޔޯ، ޖަޕާން (މޭ 5) - ޖަޕާނުގެ މެދުތެރެއަށް ހުކުރު ދުވަހު އައި ބާރުގަދަ ބިންހެލުމެއްގައި އެކަކު މަރުވެ 21 މީހުންނަށް އަނިޔާވެއްޖެ އެވެ.
ހުކުރު ދުވަހުގެ މެންދުރު ފަހު އިޝިކަވާ ސަރަހައްދަށް އައި 6.5 މެގްނިޓިއުޑް ބިންހެލުމުގައި ގިނަ ގެތަކަކަށް ގެއްލުން ލިބުނެވެ. ބިންހެލުން އައީ ބިމުގެ 12 ކިލޯމީޓަރު އަޑިންނެވެ.
އޮފިޝަލުން ބުނީ ކުރިއަށް އޮތް ދުވަސްތަކުގެ އިތުރު ލޮޅުންތަކާ އެކު ބިންގަނޑު ކަނޑައިގެން ދިޔުމުގެ ހާދިސާތައް ހިނގުމުގެ ފުރުސަތު ބޮޑު ކަމަށެވެ.
އެންއެޗްކޭއިން ދެއްކި މަންޒަރުތަކުން ފެންނަނީ ބައެއް ގެތައް ބިމާ ހަމަވެފައިވާ އިރު، ފަރުބަދައެއްގެ ސަރަހައްދަކުން ބިންގަނޑު ކަނޑައިގެން ގޮސްފައި ވަނިކޮށެވެ.
ބިންހެލުމާ ގުޅިގެން ބުލެޓް ރޭލުގެ ދަތުރުތަކަށް ހުރަސް އެޅުނު ނަމަވެސް، ދެ ގަޑިއިރު ފަހުން އަލުން ދަތުރުތައް ފެށި ކަމަށް ޖަޕާނުގެ ރެއިލްވޭ އިދާރާއިން ބުންޏެވެ.
ޖަޕާން އޮންނަނީ "ޕެސިފިކް ރިންގް އޮފް ފަޔާ" ސަރަހައްދުގަ އެވެ. އެއީ ވަރަށް ގިނައިން ބިންހެލުންތައް ކުރިމަތިވާ ހިސާބެކެވެ. އެހެންވެ، ޖަޕާނުގެ އިމާރާތް ކުރުމުގެ އުސޫލު އޮންނަނީ ވަރަށް ހަރުކަށިކޮށްފަ އެވެ.
އޭގެ އިތުރުން ބިންހެލުންތަކާއި ސުނާމީތަކަށް ތައްޔާރުވުމުގެ ގޮތުން ގަވާއިދުން ތަމްރީން ބާއްވަ އެވެ. އެހެން ނަމަވެސް، ދޭތެރެ ދޭތެރެއިން ބޮޑު ބިންހެލުމަކާ އެކު ބޮޑެތި ގެއްލުންތައް ލިބެ އެވެ.
އެގޮތުން މާޗް 2011 ވަނަ އަހަރު 9.0 މެގްނިޓިއުޑް ބާރު މިނުގައި އައި ބިންހެލުމަކާ އެކު ސުނާމީ އަރައި 18،500 އަށް ވުރެ ގިނަ މީހުން މަރުވި އެވެ.
