ބޭންކް އޮފް މޯލްޑިވްސް އާއި އެމެރިކަން އެކްސްޕްރެސް ގުޅިގެން ރާއްޖެ އިސްތިހާރު ކުރުމުގެ ކެމްޕޭނެއް ފަށައިފި އެވެ.
"އެކްސްޕީރިއަންސް މޯލްޑިވްސް" ކެމްޕޭން އިފްތިތާހުކޮށް ދެއްވީ ކުރުނބާ މޯލްޑިވްސްގައި ރޭ ބޭއްވި ހަފުލާއެއްގައި ނައިބު ރައީސް ފައިސަލް ނަސީމެވެ.
ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު ކާލް ސްޓުމްކަ ވިދާޅުވީ މި ކެމްޕެއިންގެ އަމާޒަކީ ރާއްޖެ އިސްތިހާރުކޮށް 1.8 މިލިއަން ޓޫރިސްޓުން މި އަހަރު ގެނައުމަށް ސަރުކާރުން ކަނޑައަޅާފައިވާ އަމާޒަށް، ގައުމީ ބޭންކުގެ ހައިސިއްޔަތުން އެހީތެރިކަން ފޯރުކޮށް ދިނުން ކަމަށެވެ.
"އެމެރިކަން އެކްސްޕްރެސް އާ ގުޅިގެން، ދުނިޔޭގެ އެކިކަންކޮޅުތަކުގައި ދިރިއުޅޭ އެމެރިކަން އެކްސްޕްރެސް ކާޑު މެންބަރުންނަށް ފަތުރުވެރިކަމުގެ މަންޒިލެއް ގޮތުގައި ދިވެހިރާއްޖެ ޕްރޮމޯޓްކުރުމަކީވެސް އަޅުގަނޑުމެންނަށް ލިބޭ އުފަލެއް. މި ކެމްޕޭންގައި ގިނަގުނަ ފުރުސަތުތަކާއެކު ބައިވެރިވި ޕްރޮޕަޓީސްތަކާއި މާރޗެންޓުންނަށް ވަރަށް ހާއްސަ ޝުކުރެއް އަދާކުރަން،" ކާލް ވިދާޅުވި އެވެ.
މި ކެމްޕެއިންގައި އެމެރިކަން އެކްސްޕްރެސް ކާޑު ގެންގުޅުއްވާ ފަރާތްތަކަށް ރާއްޖޭގެ ރިސޯޓްތަކާއި، ގެސްޓް ހައުސްތަކާއި އެކިއެކި ވިޔަފާރިތަކުން ހާއްސަ ޑިސްކައުންޓް ލިބޭނެ އެވެ. އަދި ކާޑުގެ މެމްބަރުންގެ ތެރެއިން ޗުއްޓީ ހޭދަކުރަން ރާއްޖެ އަންނަ ފަރާތްތަކަށް 10-25 އާ ދެމެދުގެ ސްޕާ/އެކްޓިވިޓީ ޑިސްކައުންޓް ލިބޭއިރު، އެއްވެސް ހަރަދަކާ ނުލާ ހުރުމުގެ ފުރުސަތުތަކާއި، ރެސްޓޯރަންޓްތަކުން ބޮޑެތި ޑިސްކައުންޓްގެ އިތުރުން މުވާސަލާތީ ހިދުމަތް ދޭ ފަރާތްތަކުން ހިލޭ ޑޭޓާ ފަދަ ގިނަ ފުރުސަތުތަކެއް ލިބޭނެ އެވެ.
އެއްއަހަރުގެ މުއްދަތަކަށް ދެމިގެންދާ މި ކެމްޕޭން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޮންޕެނީ (އެމް.އެމް.ޕީ.އާރު.ސީ)، ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެންބީ.އޭއެމް) އަދި ޓޫރިޒަމް މިނިސްޓްރީން ވަނީ އެންޑޯޒްކޮށްފަ އެވެ.
މި ކެމްޕޭނާ ގުޅޭ ގޮތުން އެމެރިކަން އެކްސްޕްރެސްގެ މި ސަރަހައްދުގެ ވައިސް ޕްރެސިޑެންޓް އެންޑް ޖެނެރަލް މެނޭޖަރު ވިދްޔާ ޖައިން ވިދާޅުވީ ދިވެހިރާއްޖެ އަކީ ދުނިޔޭގެ އެކި ކަންކޮޅުތަކުގައި ދިރިއުޅޭ ޕްރީމިއަމް އަދި މުއްސަނދި ފަތުރުވެރިންގެ މެދުގައި އަބަދުވެސް ވަރަށް މަގުބޫލު ފަތުރުވެރިކަމުގެ މަންޒިލަކަށް ވާއިރު، މި ކެމްޕޭނުގެ ސަބަބުން ރާއްޖޭގެ އިގްތިސޯދާއި ފަތުރުވެރިކަމުގެ ދާއިރާއަށް އެހީތެރިކަމެއް ލިބިގެންދާނެ ކަމަށެވެ.
"އަޅުގަނޑުމެންގެ ދުވަސްވީ ޕާރޓްނަރު ބޭންކް އޮފް މޯލްޑިވްސް އާއެކު އެމެރިކަން އެކްސްޕްރެސް ކާޑު މެންބަރުންނަށް އެކްސްޕީރިއަންސް މޯލްޑިވްސްގެ ކެމްޕެއިނަކާއެކު ތަފާތު ތަޖުރިބާތަކެއް ގެނެސްދެވޭކަމީ އަޅުގަނޑުމެން އުފަލާއެކު ފާހަގަކުރާ ކަމެއް،" އޭނާ ވިދާޅުވި އެވެ.
