ކުޑަކުދިންގެ ދުވަހާ ގުޅުވައިގެން އެސްޓީއޯއިން ކުރެހުމުގެ ބޮޑު މުބާރާތެއް ބޭއްވުމަށް ނިންމައި، އިއުލާނުކޮށްފި އެވެ.
ތިން އުމުރުފުރައަކަށް ބަހާލައިގެން ކުރިއަށް ގެންދާ އެ މުބާރާތަށް ކުރެހުން ހުށަހެޅޭނެ އެންމެފަހު ތާރީހަކީ އަންނަ ބުދަ ދުވަހެވެ. އެ މުބާރާތުގައި ކޮންމެ އުމުރުފަރައކުން ވެސް ވަނަވަނައަށްދާ ކުދިންނަށް އެސްޓީއޯއިން ވަނީ އިނާމު ވެސް ހުށަހަޅައިފަ އެވެ. އެގޮތުން އެއްވަނައަށް ހުށަހަޅާފައި ވަނީ 1500ރ. ގެ ވައުޗަރާއި ގިފްޓު ޕެކެކެވެ. ދެވަނައަށް 1000ރ. ގެ ވައުޗަރަކާއި ގިފްޓު ޕެކެއް ހުށަހަޅާފައި ވާއިރު، ތިންވަނައަށް ހުށަހަޅާފައި ވަނީ 500ރ. ގެ ވައުޗަރެކެވެ.
އެ މުބާރާތުގައި ހިމެނޭ ތިން އުމުރުފުރާއަކީ ހަ އަހަރުން ދަށުގެ އުމުރުފުރާއާއި ހަތް އަހަރާއި އެގާރަ އަހަރާ ދެމެދުގެ އުމުރާ އަދި ބާރަ އަހަރާއި ސޯޅަ އަހަރާ ދެމެދުގެ އުމުރުފުރާ އެވެ. އެ ހުރިހާ އުމުރުފުރައަކަށް ވެސް އެސްޓީއޯއިން ކަނޑައަޅާފައި ވަނީ އެއް ތީމު ތަކެކެވެ. އޭގެެރެއިން އެ ކުއްޖަކު އެންމެ ބޭނުންވާ ތީމެއް ތިހުތިޔާރު ކުރެވޭނެ އެވެ. މުބާރާތުގެ ތީމުތަކަކީ:
- ރަސަލް ހޮބްސް އަދި ޑެވޮންޑޭލް، އައިވީ ނުވަތަ ހެޕީ ކައު ބުރޭންޑު ހިމަނައިގެން އެ ކުއްޖަކު އެންމެ ބޭނުންވާ ހެނދުނުގެ ސައި [ޔުއާ ޑުރީމް ބުރޭކްފަސްޓު] - (މަދުވެގެން އެއް ބުރޭންޑު ކުރެހުމުގައި ހިމަނަން ޖެހޭނެ)
- އެސްޓީއޯއިން ވިއްކާ ސާމާނު ހިމަނައިގެން އެކުއްޖެއްގެ ޑުރީމް ހައުސްގެ ޑިޒައިނެއް
- އެސްޓީއޯއިން ވިއްކާ ސާމާނު ހިމަނައިގެން މިންހެޔޮ ނާސްތާއެއް
މި ތިން މައުލޫގެ ދަށުން ހުށަހަޅާ ކުރެހުންތަކަށް މާކުސް ދޭނީ ދެކަމަކަށް ބަލައިގެންނެވެ. އެއީ އުފެއްދުންތެރިކަމަށް 75 ޕަސެންޓު އަދި ކޮންސެޕްޓަށް 25 ޕަސެންޓެވެ.
އެ މުބާރާތަށް ކޮންމެ ކުއްޖަކަށް ވެސް ހުށަހެޅޭނީ އެންމެ ކުރެހުމެކެވެ. އަދި އެ ކުރެހުމުގައި މަދުވެގެން އެސްޓީއޯގެ ބުރޭންޑެއް ނުވަތަ ޕުރޮޑަކްޓެއް ހިމަނަން ޖެހޭނެ އެވެ. އެ މިންގަނޑަށް ތައްޔާރު ކުރާ ކުރެހުންތަކަކީ އޭ3 ސައިޒުގެ ކުރެހުމަކަށް ވާންޖެހޭނެ އެވެ. ކުރެހުން ހުށަހަޅަން ޖެހޭނީ ޖޭޕެގް ފޯމެޓުގަ އެވެ.
އޭގެއިތުރުން މުބާރާތަށް ކުރެހުން ތައްޔާރު ކުރުމަށް ކުރެޔޯން، ފެންކުލަ ފަދަ އާޓުގެ ކޮންމެ މީޑިއަމެއް ވެސް ބޭނުން ކުރެވިދާނެ އެވެ. ނަމަވެސް ޑިޖިޓަލް އާޓު އެ މުބާރާތުގައި ބަލައެއް ނުގަންނާނެ އެވެ.
އެސްޓީއޯއިން ބުނީ އެ މުބާރާތަށް ހުށަހަޅާ ހުރިހާ ކުރެހުންތަކެއް ހުށަހަޅަން ވާނީ އިޝްތިހާރުގެ ގޮތުގައި ބޭނުން ކުރުމަށް އެއްބަސްވެގެން ކަމަށެވެ. އަދި މުބާރާތުން ވަނަވަނައަށްދާ ކުދިންގެ ހުނަރު ގިނަ ބަޔަކަށް ދައްކާލުުގެ ގޮތުން އެސްޓީއޯގެ ސޯޝަލް މީޑިއާ އެކައުންޓުތަކުގައި ހިއްސާކުރުމަށް ހަމަޖެހިފައިވާ ކަމަށް ވެސް އެކުންފުނީގެ އޮފިޝަލް ވިދާޅުވި އެވެ.
މުބާރާތަށް މިހާރުން ފެށިގެން ކުރެހުންތައް ހުށަހެޅުމުގެ ފުރުސަތު ހުޅުވާލާފައި ވާއިރު، ހުރިހާ ކުރެހުމެއް ވެސް މެއިލް ކުރަންޖެހޭނީ އެސްޓީއޯގެ މެއިލް، pcmarketing@sto.mv އަށެވެ. ކުރެހުންތައް ހުށަހަޅާއިރު، ކުރެހުމަށް ކިޔާ ނަމަކާއި ހުށަހަޅާ ތާރީހާއި ކުއްޖާގެ އައިޑީކާޑު ނަންބަރާއި ގުޅޭނެ ނަންބަރެއްގެ އިތުރުން ކުއްޖާގެ ނަން ހިމަނަން ޖެހޭނެ އެވެ.
މުބާރާތާ ބެހޭއިތުރު މައުލޫމާތު އެސްޓީއޯގެ ވެބްސައިޓުންނާއި ސޯޝަލް މީޑިއާ އެކައުންޓުތަކުން ހިއްސާ ކުރަމުން ގެންދާނެ އެވެ.
