ސިމްޑީ ގުރޫޕުގެ މައިގަނޑު ތިން ޑިވިޝަން ގުޅިގެން ފުރަތަމަ ފަހަރަށް ކުރިއަށް ގެންދިޔަ ރޯދަ ޕުރޮމޯޝަނުގެ ނަސީބުވެރިން ހޮވައި، 175،000ރ. ގެ އިނާމު ދީފި އެވެ.
ފެބުރުއަރީ، 19 އިން ފެށިގެން މިދިޔަ އަންގާރަ ދުވަހާ ހަމައަށް ކުރިއަށް ގެންދިޔަ މި ޕުރޮމޯޝަނުގައި އެއްވަނަ ދެވަނަ ތިންވަނައަށް ވެސް އަގުހުރި އިނާމުތަކެއް ސިމްޑީން ހުށަހެޅި އެވެ.
އެގޮތުން އެއްވަނައަށް 100،000ރ. ގެ ފައިސާގެ އިނާމު ހުށަހެޅިއިރު، ދެވަނައަށް ހުށަހެޅީ 50،000ރ. ގެ ފައިސާގެ އިނާމެވެ. އަދި ތިންވަނައަށް ސިމްޑީން ހުށަހެޅީ 25،000ރ. ގެ އަގުހުރި ހޯމް ޕެކޭޖެކެވެ.
ސިމްޑީގެ ފިހާރަތަކުން ނުވަތަ އޮންލައިންކޮށް 500ރ. އަށްވުރެ މަތިން ވިޔަފާރި ކޮށްގެން ބައިވެރިވެވޭ ގޮތަށް ކުރިއަށް ގެންދިޔަ ޕުރޮމޯޝަނުން އެއްވަނަ ނަސީބުވެރިއަކަށް ހޮވުނީ، އާމިނަތު ހަލީމް އެވެ. ދެވަނަ ނަސީބުވެރިއަކަށް އަހުމަދު ނިޝާމު ހޮވުނުއިރު، ތިންވަނަ ނަސީބުވެރިއަކަށް ހޮވުނީ މުހައްމަދު އަހާޝަން ހަބީބު އެވެ.
އޭގެއިތުރުން ވެސް ޕުރޮމޯޝަން ކުރިއަށް ގެންދިޔަ ދިހަ ހަފުތާގައި، ކޮންމެ ހަފުތާއެއްގައި ގުރުއަތުން ނަސީބުވެރިއަކު ހޮވި އެވެ. އެ ދިހަ ނަސީބުވެރިންނަށް އިނާމުގެ ގޮތުގައި ދީފައިވަނީ 500ރ. ގެ ވައުޗަރެވެ.
ސިމްޑީ ސީޕީޑީއާއި ސިމްޑީ ރެސޫ އަދި ސިމްޑީ ޓެކު ގުޅިގެން ކުރިއަށް ގެންދިޔަ ރޯދަ ޕުރޮމޯޝަނުގެ އިތުރުން އެ ގުރޫޕުން ރޯދަ މަހަށް ހާއްސަކޮށް ރޯދަ ހަދިޔާއާއި އީދު ހަދިޔާގެ ގޮތުގައި ގިފްޓު ޕެކު ތަކެއް ވެސް ތައާރަފު ކުރި އެވެ. އެ ގުރޫޕުގެ މީޑިއާ އޮފިޝަލް ވިދާޅުވީ އެ ހަރަކާތަށް އާންމުންގެ ފަރާތުން ބޮޑު ތަރުހީބެއް ލިބުނު ކަމަށެވެ.
އެ ހަފުލާގައި ވާހަކަދައްކަވަމުން ސިމްޑީ ގުރޫޕުގެ މެނޭޖުމަންޓުގެ ފަރާތުން ބުނީ އިނާމުތައް ލިބުނު ހުރިހާ ނަސީބުވެރިންނަށް ވަރަށް ބޮޑަށް މަރުހަބާ ކިޔާ ކަމަށާއި އެ ޕުރޮމޯޝަނަށް އާންމުންގެ ފަރާތުން ލިބުނު ތަރުހީބަށްޓަކައި ވަރަށް ބޮޑަށް ފަހުރުވެރިވާ ކަމަށެވެ.
އެ ގުރޫޕުގެ މައިގަނޑު މަގުސަދަކީ މުޅި އަހަރު ތެރޭގައި ވެސް މީހުންގެ އުފާވެރިކަމާއި ހިތްހަމަޖެހުން އިތުރުކޮށްދިނުން ކަމަށް އެ ގުރޫޕުން ބުނެ އެވެ. އެ ގުރޫޕުގެ ދަށުން ހިންގާ އެކި ފިހާރަތަކުގައި ޖުމުލަ 200 އަށްވުރެ ގިނަ ބުރޭންޑުތަކުގެ 15،000 އަށްވުރެ ގިނަ ޕުރޮޑަކްޓުތައް ވިއްކަ އެވެ.
