ވޮޝިންޓަން، އެމެރިކާ (މޭ 3) - ކުޑަކުދިންނާއި މުސްކުޅިންނަށް ނިއުމޯނިއާ އާއި ބްރޮންޗިއޮލައިޓިސްގެ ނުރައްކާ ބޮޑުވާ ރެސްޕިރޭޓަރީ ސިންސީޝަލް ވައިރަހާ (އާރްއެސްވީ) ދެކޮޅަށް ފުރަތަމަ ފަހަރަށް ވެކްސިނަކަށް ހުއްދަ ދީފި އެވެ.
އެމެރިކާގައި ހުއްދަ ދިނީ ޖީއެސްކޭގެ "އެރެކްސީ" ވެކްސިނަށެވެ. ފައިޒާ ފަދަ އެހެން ކުންފުނިތަކުން ވެސް ދަނީ އާރްއެސްވީއަށް ވެކްސިން ތައްޔާރު ކުރަމުންނެވެ. އެ ކުންފުނިތަކުގެ ވެކްސިނަށް ވެސް ވަރަށް އަވަހަށް ހުއްދަ ދޭނެ ކަމަށް ބެލެވެ އެވެ.
އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ބުނީ ފުރާނައަށް ނުރައްކާވާ އާރްއެސްވީއާ ދެކޮޅަށް ވެކްސިނެއް ހުރުމަކީ އާއްމު ސިއްހަތަށް ލިބުނު ބޮޑު ކުރިއެރުމެއް ކަމަށެވެ.
އާރްއެސްވީގައި އާއްމުކޮށް ކުރިމަތިވަނީ އާދައިގެ ރޯގާގެ އަލާމާތްތަކެވެ. އެކަމަކު ދިފާއީ ނިޒާމު ބަލިކަށި މީހުންނަށް ހާލު ގޯސްވުމުގެ ފުރުސަތު އޮވެ އެވެ. އެމެރިކާގެ ސެންޓާޒް ފޯ ޑިޒީޒް ކޮންޓްރޯލް އެންޑް ޕްރިވެންޝަނުން ބުނީ އުމުރުން 65 އަހަރުން މަތީގެ މީހުންގެ 120،000 އެއްހާ މީހުންނަށް އެ ބަލީގައި އެޑްމިޓުކޮށް ފަރުވާ ދޭން ޖެހޭ ކަމަށާއި 10،000 މީހުން މަރުވާ ކަމަށެވެ.
އާ ވެކްސިނަށް ހުއްދަ ދިނީ 25،000 މީހުން ބައިވެރިވި ތަހުލީލަކަށް ފަހު އެވެ. އާ ވެކްސިން ދޭނީ އުމުރުން 60 އަހަރުން މަތީގެ މީހުންނަށެވެ. އޭގެ އެއް ޑޯޒުން 83 ޕަސެންޓު ރައްކާތެރިކަން ލިބެ އެވެ.
ވެކްސިންގެ އެންމެ ސައިޑްއިފެކްޓުތަކުގެ ތެރޭގައި ފާހަގަވީ އިންޖެކްޝަން ޖަހާ ތަނަށް ތަދުވުމާއި، ވަރުބަލިވުމާއި، ގައިގައި ރިއްސުމާއ، ބޮލުގައި ރިއްސުމާއި، ހުޅުތަކުގައި ރިއްސުމެވެ. ވަރަށް މަދުން ފެންނަ ސައިޑްއިފެކްޓެއްގެ ގޮތުގައި ފާހަގަވީ ހިތުގެ ތެޅުމަށް ބަދަލު އައުމެވެ.
