ބެލްގްރޭޑް، ސާބިއާ (މޭ 3) - ސާބިއާގެ ސްކޫލެއްގައި ބުދަ ދުވަހު ބަޑި ޖަހައި އަށް ކުދިންނާއި ސެކުއިރުޓީ ގާޑަކު މަރާލައިފި އެވެ.
ފުލުހުން ތުހުމަތު ކުރާ ގޮތުގައި ހަމަލާ ދިނީ އުމުރުން 13 އަހަރުގެ ފިރިހެން ކުއްޖެކެވެ. މަހެއް ވަންދެން ހަމަލާ ރާވައި މަރާނެ މީހުންގެ ލިސްޓެއް ތައްޔާރު ކުރި ކަމަށް ފުލުހުން ތުހުމަތު ކުރެ އެވެ.
"އަށް ކުދިންނާއި ސެކިއުރިޓީ ގާޑަކު މަރުވި އިރު، އިތުރު ހަ ކުދިންނާއި ޓީޗަރަކަށް އަނިޔާވި،" އިންޓީރިއާ މިނިސްޓްރީން ނެރުނު ބަޔާނެއްގައި ބުންޏެވެ.
ބެލްގްރޭޑް ފުލުހުންގެ ޗީފް ބުނީ މަރުވީ ހަތް އަންހެން ކުދިންނާއި ފިރިހެން ކުއްޖެއް ކަމަށެވެ. އެއީ 2009 އާއި 2011 އާ ދެމެދު އުފަންވި ކުދިންނެވެ.
އިންޓީރިއާ މިނިސްޓަރު ބްރަތިސްލާވް ގަސިޗް ވިދާޅުވީ ހަމަލާ ދޭން ބޭނުންކުރީ ތުހުމަތު ކުރެވޭ ކުއްޖާގެ ބައްޕަގެ ހަތިޔާރު ކަމަށާއި އެ މީހާ ވެސް ހައްޔަރުކޮށްފައިވާ ކަމަށެވެ.
ބައެއް ރިޕޯޓުތައް ބުނާ ގޮތުން އެ ކުއްޖާ ހަމަލާ ރޭވީ ގަނާކުރުމުގެ މައްސަލައަކާ ގުޅިގެންނެވެ. އެކަމަކު އިދާރާތަކުން ބުނީ ހަމަލާ ދިން ސަބަބު އަދި ޔަގީން ނުވާ ކަމަށެވެ.
އެ ހާދިސާއާ ގުޅިގެން ސާބިއާގައި ގައުމީ ހިތާމަ ފާޅުކުރުމުގެ ތިން ދުވަސް ވަނީ އިއުލާންކޮށްފަ އެވެ. އަދި ބުރާސްފަތި ދުވަހު ހުރިހާ ސްކޫލެއްގައި ހަމަހިމޭންކަމުގެ ސުކޫތެއް ފާހަގަކުރާނެ އެވެ.
