ޖެޓު ފިއުލް އުފުލުމަށް ހާއްސަކޮށްގެން ފުރަތަމަ ފަހަރަށް ރާއްޖެއަށް ފިއުލް ބާޖެއް އެސްޓީއޯއިން ގެނެސްފި އެވެ.
ލަގަނާގެ ނަމުން ނަން ދީފައިވާ އެ ބާޖަކީ އެސްޓީއޯ އާއި އައިލެންޑު އޭވިއޭޝަނާ ދެމެދު ވި އެއްބަސްވުމެއްގެ ދަށުން މާފަރު އެއާޕޯޓަށް ބޭނުންވާ ޖެޓު އޭ-1 ތެޔޮ ސަޕްލައި ކުރުމަށް ހާއްސަ ކޮށްގެން ގެނައި އުޅަނދެކެވެ.
ލަގަނާއަކީ އިރުވާހުދާ ވައްތަރު، އެއަށްވުރެ ބޮޑު، ކަރުދިގު ދޫންޏަކަށް ކިޔާ ނަމެވެ. އެ ދޫނީގެ ފަޔާއި ތުންގަނޑު ހުންނާނީ ކަޅު ކުލައިގަ އެވެ.
ޖަރުމަނުގެ ހަންސާކޮންސަލްޓް ޕްރޮޖެކްޓްސްގެ ކޮންސަލްޓެންސީއާ އެކު ތައްޔާރުކޮށްފައިވާ އެ ބާޖަކީ އޭވިއޭޝަން ފިއުލް ކޮލިޓީގެ ޝަރުތުތައް ފުރިހަމަވާ އުޅަނދެއް ކަމަށާއި ކަމާބެހޭ ކޮލިޓީ އެޝުއަރެންސް ކޯޑްތަކުގައިވާ ގޮތުގެމަތިން އޭވިއޭޝަނަށް އިންޑަސްޓްރީ ސްޓޭންޑާޑް ފިލްޓަރުތަކާއެކު އެ އުޅަނދުގައި ކޮމިޝަންކޮށްފައިވާނެ ކަމަށް އެސްޓީއޯގެ އޮފިޝަލް ބުންޏެވެ.
"މިކަމަކީވެސް ރާއްޖޭގައި ފުރަތަމަ ފަހަރަށް ކުރެވުނު ކަމެއް، މި ބާޖުގައި 200 ކިއުބިކް މީޓަރުގެ ޖާގަ ހުންނައިރު، ޒަމާނީ މިނެކިރުމުގެ އާލާތްތައް ބެހެއްޓިފައި ހުންނާނެ،" އެސްޓީއޯގެ އޮފިޝަލް ބުންޏެވެ.
އިތުރަށް އޭނާ ބުނީ އެ ބާޖު ތައްޔާރުކޮށްފައި ވަނީ ރާއްޖޭގެ އަތޮޅުތަކަށް އޭވިއޭޝަން ފިއުލް ރައްކާތެރި ކަމާއެކު ގެންދިއުމުގައި ދިމާވާ މައްސަލަތަކަށް ހައްލެއް ހޯދުމަށް ކަމަށާއި އާ ބާޖާއެކު އުޅަނދުގެ ކްރޫންނަށް ވަނީ އޭވިއޭޝަން ފިއުލް ހެންޑްލިންގެ ފީލްޑު ޓުރެއިނިންގެ އިތުރުން، ކަމާބެހޭ އޮޕަރޭޝަންސް މެނުއަލްތަކާއި ލިޔެކިޔުންތައް ފޯރުކޮށްދީފައި ވާނެ ކަމަށެވެ.
އެސްޓީއޯއިން އެ ބާޖު އޮޕަރޭޓު ކުރަމުން ގެންދާނީ އިންޑަސްޓްރީ ބެސްޓް ޕެރެކްޓިސްއާ އެއްގޮތަށް ޖެޓް އޭ-1 ތެޔޮ ރިފައިނަރީން ފެށިގެން ފްލައިޓާ ހަމައަށް ޓްރޭސް ކުރެވޭނެ ކުއަލިޓީ އެޝުއަރެންސް ނިޒާމެއްގެ ތެރެއިންނެވެ.
އެގޮތުން ކޮންމެ ޓްރާންސްފާ ޕޮއިންޓެއްގައި ތެލުގެ ސާމްޕަލް ނަގައި އެސްޓީއޯއިން މާލޭގައި ގާއިމުކުރި ލެބޯޓްރީ ގައި ޓެސްޓްކުރާނެ ކަމަށް އެ ކުންފުނީގެ އޮފިޝަލް ބުންޏެވެ.
