ތެހްރާން، އިރާން (އެޕްރީލް 29) - މެދުއިރުމަތީގައި އެމެރިކާގެ ސިފައިން ހަރަކާތްތެރި ވާތީ އިރާނުގެ ރައީސް އިބްރާހިމް ރައިސީ ފާޑުވިދާޅުވެއްޖެ އެވެ.
އިސްލާމިކް ސްޓޭޓް (އައިއެސް) ގްރޫޕާ ދެކޮޅަށް އިރާނާއި އެމެރިކާއިން އިރާގަށް އެހީތެރިކަން ފޯރުކޮށްދިން އިރު، އެމެރިކާގެ 2،500 ސިފައިން އަދިވެސް އިރާގުގައި އެބަ ތިއްބެވެ. އެއީ ތަމްރީނާއި އަސްކަރީ ލަފާ ދިނުމަށް ކަމަށް ބުނެ އެވެ.
އޭގެ އިތުރުން ސީރިއާގައި އެމެރިކާގެ 900 ސިފައިން އެބަ ތިއްބެވެ. އޭގެ އިތުރުން އެމެރިކާ ނޭވީގެ ފަސް ވަނަ ފްލީޓްގެ މަރުކަޒު ހުންނަނީ ބަހްރެއިންގަ އެވެ.
"މި ސަރަހައްދުގައި ބޭރު ސިފައިންނާއި ރައްޔިތުން އުޅުމަކީ ފައިދާ ހުރި ކަމެއްގެ ގޮތުގައި އަޅުގަނޑުމެން ނުދެކެން،" ރައިސީ ނޫސްވެރިންނަށް ވިދާޅުވި އެވެ.
ރައިސީ އެގޮތަށް ވިދާޅުވީ އިރާގުގެ ރައީސް އަބްދުލް ލަތީފް ރާޝިދު ތެހްރާނަށް ކުރައްވަމުންދާ ދަތުރުފުޅުގެ ތެރެއިން ދެ ލީޑަރުން އެކުގައި ބޭއްވި ޕްރެސް ކޮންފެރެންސްގަ އެވެ.
"އެމެރިކާގެ ސިފައިން މި ސަރަހައްދުގައި އުޅޭތީ ސަލާމަތަށް ހުރަސް އެޅޭ،" ރައިސީ ވިދާޅުވި އެވެ.
"އަޅުގަނޑުމެން އިރާގާ އެކު ބާއްވާ ގުޅުން ބިނާވަނީ އެއް ގޮތް ކަންކަމުގެ މައްޗަށް. އެކަމަކު އެމެރިކާއިން އަބަދުވެސް ވިސްނާނީ އެމެރިކާގެ އަމިއްލަ މަސްލަހަތަށް."
އިރާގާއި އިރާނުން 1980 ގެ އަހަރުތަކުގެ ތެރޭގައި އަށް އަހަރުގެ ދިގު ހަނގުރާމައެއް ކުރި އެވެ. އެކަމަކު 2003 ވަނަ އަހަރު އެމެރިކާ ސިފައިން އަރައި، ސުންނީ ލީޑަރު ސައްދާމް ހުސެންގެ ވެރިކަން ވައްޓާލުމާ އެކު އިރާނާއި އިރާގުގެ ގުޅުން ރަނގަޅު ވާން ފެށި އެވެ.
އިރާނުގެ އިގްތިސާދަށް އިރާގާ އެކު ކުރާ ވިޔަފާރި މުހިއްމެވެ. އިރާނުން އިރާގަށް ފޯރުކޮށްދެނީ ގޭހާއި ކަރަންޓު އަދި ބައެއް ބާވަތުގެ މުދަލެވެ.
