ދަ ހޭގް، ނެދަލޭންޑްސް (އެޕްރީލް 28) - ދަރިފަނި ހަދިޔާކޮށްގެން 550 އަށް ވުރެ ގިނަ ކުދިންގެ ބައްޕައަކަށް ވީ ކަމަށް ބެލެވޭ މީހަކު އިތުރަށް ދަރިފަނި ހަދިޔާކުރުން ނެދަލޭންޑްސްގެ ކޯޓަކުން މަނާކޮށްފި އެވެ.
ނެދަލޭންޑްސްގެ ނޫސްތަކުގައި ބުނީ އުމުރުން 41 އަހަރުގެ "ޖޮނަތަން އެމް" ގެ މައްސަލަ ކޯޓަށް ހުށަހެޅީ ހަދިޔާކޮށްފައިވާ ދަރިފަނީގެ އެހީގައި ލިބިފައިވާ ކުދިންގެ ހައްގުގައި މަސައްކަތް ކުރާ ޖަމިއްޔާއަކާއި އެ ތަނުން ކުއްޖެއްގެ މަންމަ ކަމަށެވެ.
ނެދަލޭންޑްސްގެ އުސޫލުތައް އޮންނަ ގޮތުން އެއް ފިރިހެނަކު ދަރިފަނި ހަދިޔާކޮށްގެން 12 އާއިލާއެއްގެ 25 ކުދިންނަށް ވުރެ ގިނަ ކުދިންގެ ބައްޕައަކަށް ވެގެން ނުވާނެ އެވެ. އެކަމަކު ތުހުމަތު ކުރެވޭ މީހާގެ 550 އާއި 600 އާ ދެމެދުގެ ދަރިން ތިބޭ ކަމަށް ބެލެވެ އެވެ. އޭނާ ދަރިފަނި ހަދިޔާކުރަން ފެށީ 2007 ގަ އެވެ.
އޭނާ އިތުރަށް ދަރިފަނި ހަދިޔާކުރުން މަނާކޮށް ކޯޓުން ބުނީ އެ އަމުރާ ހިލާފުވާ ކޮންމެ ފަހަރަކު 110،000 ޑޮލަރުން ޖޫރިމަނާކުރެވޭނެ ކަމަށެވެ.
ޖޮނަތަން އެމްގެ ދަރިފަނިން 100 އަށް ވުރެ ގިނަ ކުދިން އުފަންވީ ނެދަލޭންޑްސްގެ ކްލިނިކްތަކުގަ އެވެ. ބާކީ ކުދިންނަކީ ޕްރައިވެޓްކޮށް ދަރިފަނި ހަދިޔާކޮށްގެން ލިބުނު ކުދިންނެވެ.
އޭގެ އިތުރުން ޑެންމާކްގެ ކްލިނިކަކަށް ވެސް އޭނާ ދަރިފަނި ހަދިޔާކުރި އެވެ. އެ ތަނުން ދުނިޔޭގެ އެކި ގައުމުތަކުގެ އެ ތަކެތި ފޮނުވި ކަމަށް ކޯޓުން ބުންޏެވެ.
އޭނާ އެކަން ކުރަމުން ދިޔައީ ހަގީގަތް އޮޅުވާލައި، ކުރިން ލިބިފައިވާ ކުދިންގެ އަދަދު ސިއްރުކޮށްގެން ކަމަށް ބެލެވެ އެވެ. ފާޓިލިޓީ ފަރުވާތަކާ ގުޅޭ ގޮތުން މީގެ ކުރިން ވެސް ނެދަލޭންޑްސްގައި މައްސަލަ ބޮޑުވި އެވެ.
އެގޮތުން 2020 ވަނަ އަހަރު ގައިނިކޮލޮޖިސްޓަކު އަންހެނުންތަކަށް އޮޅުވާލައިގެން ދަރިފަނި ހަދިޔާކޮށްގެން 17 ކުދިންގެ ބައްޕައަކަށް ވި އެވެ. އެކަން ފަޅާއެރީ އޭނާ މަރުވި ފަހުންނެވެ.
އަދި 2019 ވަނަ އަހަރު ފާޓިލިޓީ ފަރުވާ ފޯރުކޮށްދޭ ކްލިނިކެއްގައި ޑޮކްޓަރަކު 49 ކުދިންގެ ބައްޕައަކަށް ވީ އެ ތަނަން ދިޔަ އަންހެނުންނަށް އޮޅުވާލައި، އޭނާގެ އަމިއްލަ ދަރިފަނި ބޭނުންކޮށްގެންކަން ވެސް ފަޅާއެރި އެވެ.
