ޖެނީވާ، ސްވިޓްޒަލޭންޑް (އެޕްރީލް 25) - ސޫދާންގެ ހަމަނުޖެހުމުގެ ތެރެއިން އެ ގައުމުގެ މައި ލެބޯޓަރީ ހަނގުރާމަވެރިންގެ އަތްދަށަށް ދިޔުމުން "ބަޔޮލޮޖިކަލް" ނުރައްކާ ބޮޑު ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ހަނގުރާމަވެރިންގެ އަތްދަށަށް ދިޔަ ލެބުގައި ތަފާތު އެކި ވައިރަސްތަކުގެ ސާމްޕަލް އެބަ ހުއްޓެވެ. އޭގެ ތެރޭގައި ޕޯލިއޯ، މީސަލްސް އަދި ކޮލެރާ ފަދަ "ނުރައްކާތެރި ހާލަތެއް އުފެދިދާނެ" ވައިރަސްތަކުގެ ސާމްޕަލް ހިމެނޭ ކަމަށް ޑަބްލިއުއެޗްއޯއިން ބުންޏެވެ.
"ހަނގުރާމަވެރިން ވަނީ ލެބުގައި ތިބި ޓެކްނީޝަނުން ގަދަކަމުން ނެރިފައި. މިހާރު އެތަނުގެ ފުރިހަމަ ކޮންޓްރޯލް އޮތީ ހަނގުރާމަވެރި ގްރޫޕެއްގެ އަތްދަށުގައި. އެތަން ބޭނުންކުރަނީ އަސްކަރީ މަރުކަޒެއްގެ ގޮތުގައި،" ސޫދާންގައި ހުންނަ ޑަބްލިއުއެޗްއޯގެ މަންދޫބު ނިމާ ސައީދު އާބިދު ވިދާޅުވި އެވެ.
އެހެން ނަމަވެސް، އެތަނުގެ ކޮންޓްރޯލް ލިބުނީ ކޮން ގްރޫޕަކަށް ކަމެއް އޭނާ ހާމައެއް ނުކުރެ އެވެ.
ޑަބްލިއުއެޗްއޯއިން ބުނީ ހަމަލާތަކުގައި މިހާތަނަށް 14 ފަހަރެއްގެ މަތިން ސިއްހީ ފަރާތްތަކަށް އަމާޒުކޮށްފައިވާ ކަމަށެވެ. އެ 14 ހަމަލާގެ ސަބަބުން ސިއްހީ ދާއިރާއާ ގުޅުން ހުރި އަށް މީހުން މަރުވެ، ދެ މީހުންނަށް ޒަހަމްވެފައިވެ އެވެ.
ސޫދާނުގައި ހަމަލާ ބަދަލު ކުރަނީ ސިފައިންގެ ވެރިޔާ އަބްދެލް ފައްތާހް އަލް ބުރްހާންއަށް ވަފާތެރި ފައުޖާއި އޭނާގެ ކުރީގެ ޑެޕިއުޓީ މުހައްމަދު ހަމްދާން ދަގްލޯއަށް ވަފާތެރި ރެޕިޑް ސަޕޯޓް ފޯސާޒް (އާރްއެސްއެފް) އާ ދެމެދުގަ އެވެ.
މީގެ ދެ ހަފުތާ ކުރިން ފެށި ހަމަލާތަކުގައި މިހާތަނަށް 459 މީހުން މަރުވެފައިވާ އިރު، 4،072 މީހުންނަށް އަނިޔާވެފައިވެ އެވެ. އދ. ގެ ރެފިއުޖީ އެޖެންސީއިން ބުނީ ސޫދާންގެ 270،000 އަށް ވުރެ ގިނަ ރެފިއުޖީން ޖެހިގެން އޮތް ޗެޑް އަދި ދެކުނު ސޫދާނަށް ދަތުރު ކުރަމުންދާ ކަމަށެވެ.
