ދިޔަވަރު ބޮޑު ގަޑިތަކުގައި ދެކުނުގެ އަތޮޅުތަކާއި މެދުރާއްޖެ އަތޮޅުތަކުގެ ބައެއް ރަށްތަކަށް އުދައިގެ އަސަރު ކުރުން އެކަށީގެންވާ ކަމަށް މޫސުމާބެހޭ ގައުމީ އިދާރާއިން ލަފާކޮށްފި އެވެ.
މޯލްޑިވްސް މީޓިއޮރޯލޮޖިކަލް ސާވިސް (މެޓް އޮފީސް) އިން މިއަދު ހަވީރު 6:00 އާ ހަމައަށް މޫސުން ލަފާކޮށް ނެރުނު ލިޔުމުގައި ބުނެފައި ވަނީ އެންމެ އުތުރުގެ އަތޮޅުތަކަށް މޫސުން އާންމު ގޮތެއްގައި ރަނގަޅު ވިޔަސް، އެހެން ހިސާބުތަކުގެ ބައެއް ރަށްތަކަށް ވިއްސާރަ އާއެކު ގުގުރުން ކަށީގެންވެ އެވެ.
ހުޅަނގު ދެކުނާއި ހުޅަނގުން ގަޑިއަކު ތިން މޭލާއި 13 މޭލާ ދެމެދުގެ ބާރުމިނެއްގައި ވައި ޖެހޭނެ ކަމަށް ލަފާ ކުރާއިރު، ކަނޑުގައި އުފެދޭ ރާޅު ބާނި ހުންނާނީ ދެ ފޫޓާއި ފަސް ފޫޓާ ދެމެދުގެ އުސްމިނެއްގައި ކަމަށް ލަފާކުރެ އެވެ.
މޫސުން ގޯސްވެ، ދިޔަވަރު އެންމެ ބޮޑުވާ ދުވަސްތަކުގައި ބައެއް ރަށްތަކަށް އުދަ އަރައި ބޮޑެތި ގެއްލުންތައް ކުރިމަތިވެފައިވެ އެވެ.
ދިޔަވަރު ބަލާލެވޭނެ ގޮތް
ދިވެހިރާއްޖޭގެ މީހުން ދިރިއުޅޭ ހުރިހާ ރަށެއްގެ ދިޔަވަރު، ދިވެހި ކޯސްޓަލް އިންޖިނިއަރެއް ކަމަށްވާ ޑރ. ނަޝްވާން މަތީނު އުފެއްދެވި މޯލްޑިވްސް ޓައިޑްސް ވެބްސައިޓުން ބަލައިލެވުމުގެ އިތުރުން ދިޔަވަރާ ގުޅޭ މައުލޫމާތުތައް ވެސް ލިބޭނެ އެވެ.
