މެކްސިކޯ ސިޓީ، މެކްސިކޯ (އެޕްރީލް 21) - މެކްސިކޯގެ ލަގްޒަރީ ރިޔާސީ ޖެޓު ގަންނަން ތަޖިކިސްތާނުން އެއްބަސްވެފައިވާ ކަމަށް މެކްސިކޯގެ ރައީސް އަންދްރޭ މެނުއެލް ލޮޕޭޒް އޮބްރާޑޯ ވިދާޅުވެއްޖެ އެވެ.
އެ ޖެޓަކީ މެކްސިކޯގެ ރައްޔިތުންނަށް ކުރާ "މަލާމާތެއް" ކަމަށް މީގެ ކުރިން އޮބްރާޑޯ ވިދާޅުވި އެވެ. ތަޖިކިސްތާނުގެ ސަރުކާރުން އެއްބަސްވީ ބޮއިންގް 787 ޑްރީމްލައިނާ 92 މިލިއަން ޑޮލަރަށް ގަތުމަށެވެ.
އެ ޖެޓު ގަންނާނެ ފަރާތެއް ހޯދަން މެކްސިކޯއިން މަސައްކަތް ކުރާތާ އަހަރުތަކެއް ވެއްޖެ އެވެ. އެ ޖެޓު ވިއްކާލުމަކީ 2018 ގެ އިންތިހާބުގެ ކެމްޕެއިންގައި އޮބްރާޑޯގެ ވައުދެކެވެ.
ޖެޓު ގަންނާނެ ފަރާތެއް ލިބިފައިވާކަން އިއުލާން ކުރައްވަން އާއްމުކުރި ވީޑިއޯގައި އޮބްރާޑޯ ވިދާޅުވީ އެކަމުން ލިބޭ ފައިސާ ހޭދަކުރާނީ ދެކުނު މެކްސިކޯގެ ފަގީރު ހިސާބެއްގައި ދެ ހޮސްޕިޓަލް އެޅުމަށް ކަމަށެވެ.
އެގްޒެކްޓިވް ނިދާކޮޓަރިއަކާއި ޕްރައިވެޓް ފާހާނާއެއް އަދި 80 މީހުންގެ ސީޓު ހިމެނޭ ޖެޓު ކަސްޓަމައިޒްކޮށްގެން އެންމެ ފުރަތަމަ ގަނެފައި ވަނީ 218 މިލިއަން ޑޮލަރަށެވެ.
އެ ޖެޓު ގަނެފައި ވަނީ 2006 އިން 2012 އަށް މެކްސިކޯގައި ރައީސްކަން ކުރެއްވި ފިލީޕޭ ކަލްޑެރޯން އެވެ. އެހެން ނަމަވެސް އެ ޖެޓު ބޭނުންކުރެއްވި ހަމައެކަނި ރައީސަކީ އޭގެ ފަހުން ވެރިކަމަށް ވަޑައިގެންނެވީ އެންރީކޭ ޕޭނާ ނިއޭޓޯ އެވެ.
