ލަންޑަން (އޭޕްރީލް 19) - ޔުއެފާ ޗެމްޕިއަންސް ލީގުގެ އެންމެ ކާމިޔާބު ދެ ޓީމު ކަމަށްވާ ރެއާލް މެޑްރިޑުން މި ފަހަރުގެ މުބާރާތުގެ ކުއާޓާ ފައިނަލުގެ ދެ ވަނަ ލެގުގައި ވެސް ޗެލްސީ 2-0 އިން ބަލިކޮށް، މުބާރާތުގެ ސެމީ ފައިނަލަށް ދަތުރުކޮށްފި އެވެ.
އެގްރިގޭޓަށް ބަލާއިރު، ޗެލްސީގެ މައްޗަށް ރެއާލުން މި ވަނީ 4-0 އިން ކުރިހޯދައިފަ އެވެ. ޗެމްޕިއަންސް ލީގުން ކެޓުމުން، އިނގިރޭސި ޕްރިމިއާ ލީގުގެ 11 ވަނައިގައި އޮތް ޗެލްސީ އަށް ތަށްޓަކަށް ވާދަކުރަން ލިބުނު ފަހު ފުރުސަތު މި ސީޒަނަށް މި ނިމުނީ އެވެ.
ސާދަ ފަހަރަށް ޗެމްޕިއަންސް ލީގުގެ ތަށި ހޯދި ރެއާލުން މުބާރާތުގެ ސެމީ ފައިނަލުގައި ކުޅޭނީ ބަޔާން މިއުނިކް ނޫނީ މެންޗެސްޓާ ސިޓީއާ އެވެ.
ޗެލްސީ ދަނޑުގައި ރޭ ކުޅުނު މެޗުގައި ރެއާލުން ދެ ގޯލު ވެސް ޖެހީ ދެ ވަނަ ހާފުގަ އެވެ. ފުރަތަމަ ހާފުގައި ޗެލްސީ އަށް ގޯލު ޖަހަން ފުރުސަތުތަކެއް ލިބިގެންދިޔައިރު، އެންމެ ރަނގަޅު ފުރުސަތު ލިބުނީ އެންގޯލޯ ކާންޓޭ އާއި ކޮނާ ގަލަގާ އަށެވެ. ގަލަގާ އާއި ކާންޓޭ ފޮނުވާލި ބޯޅަތައް ދިޔައީ ގޯލާ ސިދާނުވެ އެވެ. މި މެޗުގައި ޗެލްސީގެ މާކް ކުކުރޭއާ އަށް ލިބުނު ހުސް ފުރުސަތުން ޖެހި ބޯޅަ ރެއާލްގެ ކީޕަރު ތިބައު ކޯޓުއާ ވަނީ މަތަކޮށްފަ އެވެ.
މި މެޗުގައި ރެއާލްގެ ދެ ގޯލު ވެސް ޖެހީ ބްރެޒިލްގެ ވިންގް، ރޮޑްރީގޯ އެވެ. މެޗުގެ 58 ވަނަ މިނިޓްގައި ރޮޑްރީގޯ ފުރަތަމަ ގޯލު ޖެހީ ވިނީޝިއުސް ޖޫނިއާ ދިން ބޯޅައަކުންނެވެ. މެޗުގެ 80 ވަނަ މިނިޓްގައި ރޮޑްރީގޯ ޖެހި ގޯލަށް ފުރުސަތު ތަނަވަސްކޮށްދިނީ ފެޑެރީކޯ ވަލްވޭޑޭ އެވެ.
މި ނަތީޖާއާ އެކު، ޗެލްސީގެ ކޯޗުކަމާ ފްރޭންކް ލަމްޕާޑް ހަވާލުވި ފަހުން އެ ޓީމު ކުޅުނު ހަތަރު މެޗުން ވެސް މި ވަނީ ބަލިވެފަ އެވެ. މި ސީޒަނުގައި ފޯމަށް ވަރަށް ބޮޑަށް އަސަރުކޮށްފައިވާ ޗެލްސީން ދެ ކޯޗަކު މަގާމުން ވަކިކޮށްފައިވާއިރު، އެ ޓީމުގެ ހާލަތަށް އަދިވެސް ދެމެހެއްޓެނިވި ހައްލެއް ލިބޭނެ ކަމުގެ ނިޝާނެއް މެޗުތަކުގެ ނަތީޖާތަކުން އަދި ނުފެނެ އެވެ.
މެޗަށް ފަހު ލަމްޕާޑް ބުނީ ނަތީޖާ ކޮންމެ ގޮތަކަށް ނުކުތް ކަމުގައި ވިޔަސް ރެއާލް ކަހަލަ ޓީމަކާ ދެކޮޅަށް ޗެލްސީން މެޗުގެ ބޮޑުބައިގައި ދެއްކި ހިތްވަރަށް ތައުރީފުކުރާ ކަމަށެވެ. އަދި ބޭނުންވަނީ މި މެޗުގައި އެ ފެނުނު ރޫހު ޗެލްސީން ލީގުގައި ކުރިއަށް ހުރި މެޗުތަކުގައި ދެއްކުން ކަމަށް ލަމްޕާޑް ވަނީ ބުނެފަ އެވެ.
ރެއާލްގެ ކޯޗު ކާލޯ އަންޗެލޮޓީ މަސައްކަތް ކުރަމުން އަންނަނީ ޗެމްޕިއަންސް ލީގުގެ ތަށި ފަސް ވަަނަ ފަހަރަށް ހޯދުމަށެެވެ.
ރޭގެ މެޗާ ބެހޭގޮތުން އަންޗެލޮޓީ ބުނީ ޗެލްސީން ފަށައިގެން ކުރިއަށް ޖެހި، ރެއާލަށް ޕްރެޝަރު ބޮޑުކުރެވޭތޯ މަސައްކަތް ކުރާނެކަން އެނގޭ ކަމަށާއި އެ ވަގުތުތަކުން އަރައިގަނެ، ރެއާލުން މި މެޗުގައި ނަތީޖާ ނެރުމުގައި ތަޖުރިބާގެ ބޭނުން ވަރަށް ބޮޑަށް ހިފި ކަމަށެވެ.
