އަންގާރަ ދުވަހުގެ އިރުއޮއްސި 6:00 އިން ފެށިގެން ވަގުތީ ސުލްހައަކަށް އެއްބަސްވި ނަމަވެސް ސޫދާންގެ ވެރިރަށް ހާރްތޫމްގައި ހަމަލާ ބަދަލުކުރުންތައް ކުރިއަށް އެބަދެ އެވެ.
ސިފައިންނާއި ރެޕިޑް ސަޕޯޓް ފޯސާޒް (އާރްއެސްއެފް) ގެ މެމްބަރުންގެ ހަމަލާތައް އެންމެ ބޮޑަށް ކުރިއަށް ދަނީ ސިފައިންގެ މައި މަރުކަޒާއި އެއާޕޯޓާއި ސިޓީ ސެންޓަރުގެ ކައިރީގަ އެވެ.
ހޮނިހިރު ދުވަހު ހަމަލާ ބަދަލުކުރަން ފެށި ފަހުން ފުރަތަމަ ފަހަރަށް 24 ގަޑިއިރު ވަންދެން ހަމަލާ މެދުކަނޑާލަން ދެ ފަރާތުން ވެސް އެއްބަސްވީ އާއްމުންނަށް ބޭނުންވާ އެހީއަށް މަގުފަހި ކުރުމަށެވެ.
ގެތަކުގައި ތާށިވެފައި ތިބި އާއްމުންގެ އަތުން ފެނާއި ކާބޯތަކެތި ހުސްވަމުންދާ ކަމަށް ރިޕޯޓުތައް ބުނެ އެވެ. ހަމަލާތަކުގައި މިހާތަނަށް އާއްމުންގެ 200 އަށް ވުރެ ގިނަ މީހުން މަރުވެފައިވެ އެވެ.
ރެޑް ކްރޮސްއިން ބުނީ ހަމަލާ މެދުކަނޑާލި ނަމަވެސް، އެންމެ 24 ގަޑިއިރުގެ ތެރޭގައި ހުރިހާ ރައްޔިތުންނަށް ބޭނުންވާ އެހީތެރިކަން ފޯރުކޮށްނުދެވޭނެ ކަމަށެވެ.
ސޫދާންގައި ގިނަ އަހަރުތަކެއް ވަންދެން ވެރިކަން ކުރި އުމަރް އަލް ބަޝީރުގެ ސަރުކާރު ވައްޓާލީ 2019 ވަނަ އަހަރު ހިންގި އަސްކަރީ ބަގާވާތަކުންނެވެ.
އޭގެ ފަހުން ވެރިކަން ކުރީ އެކި ޕާޓީތަކުގެ މެދުގައި ބާރުތައް ބަހާލައިގެންނެވެ. އެކަމަކު 2021 ވަނަ އަހަރު އަނެއްކާވެސް އަސްކަރިއްޔާއިން ބަގާވާތް ކުރި އެވެ.
ދެ ވަނ ބަގާވާތަށް ފަހު ވެރިކަން ކުރަން އުފެއްދި ކައުންސިލްގެ ވެރިޔާއަކީ ސިފައިންގެ އިސް ކޮމާންޑަރެވެ. އޭނާގެ ޑެޕިއުޓީއަށް ހަމަޖެއްސީ އާރްއެސްއެފްގެ އިސް ކޮމާންޑަރެވެ. މިހާރު ހަމަލާ ބަދަލުކުރަމުން ދަނީ އެ ދެ ކޮމާންޑަރުންގެ މެދުގައި އޮތް ވާދަވެރިކަމުގެ ތެރެއިންނެވެ.
