ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް އަންނަ ރިޔާސީ އިންތިހާބަށް ނުކުންނަވާއިރު، އެމަނިކުފާނުގެ ފަހަތުގައި އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ހުންނެވީ އަމިއްލަ ބޭނުމެއް ހާސިލުކުރަން ކަމަށް ޖޭޕީން ދާދިފަހުން އިސްތިއުފާ ދެއްވި ރައީސް އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެ އެވެ.
ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން ނިންމުމާ އެކު، ޖޭޕީގެ އެއް ފައުންޑިން މެމްބަރުގެ ގޮތުގައި ހުންނެވި ސަމީރު ވަނީ ޕާޓީން އިސްތިއުފާ ދެއްވައިފަ އެވެ.
ރިޔާސީ ރޭހަށް ގާސިމް ނުކުންނަވަން އެންމެ ބޮޑަށް ބާރު އަޅައި، އެމަނިކުފާނާއެކު ކޯލިޝަން ހަދަން އެންމެ އިސް ސަފުގައި ހުންނެވީ ނަޝީދެވެ. އެމްޑީޕީގެ ރިޔާސީ ޕްރައިމަރީގެ ނާކާމިޔާބީއަށް ފަހު ނަޝީދު ސިޔާސީ މަސައްކަތް ކުރައްވަމުން ގެންދަވަނީ "ފިކުރެއްގެ ދިރުން" ނަމުގައި ވަކި ފެކްޝަނެއް ހައްދަވައިގެންނެވެ. އެމަނިކުފާނު ލީޑު ކުރައްވާ ފެކްޝަނުން ރިޔާސީ އިންތިހާބުގައި ކުރިއަށްދާން ނިންމާފައި ވަނީ ޖޭޕީއާ އެކު އެވެ.
މި ރޯދަ މަހަށް ހާއްސަކޮށްގެން "އަދަދު" އިން ގެނެސްދޭ "ކުޅިކޮށް" ޕްރޮގްރާމްގެ ރޭގެ އެޕިސޯޑުގައި ވާހަކަ ދައްކަވަމުން ސަމީރު ވަނީ 2008 ގައި ގާސިމްގެ ތާއީދާއެކު ވެރިކަމަށް ވަޑައިގެން، ނަޝީދު އަމަލުކުރެއްވި ގޮތުގެ މާޒީ އާ ކުރައްވައިފަ އެވެ.
އެގޮތުން، ނަޝީދު ވެރިކަމަށް ވަޑައިގެންނެވިތާ އެންމެ 23 ދުވަހުގެ ތެރޭގައި ކޯލިޝަން ރޫޅައިލިކަން ސަމީރު ފާހަގަކުރެއްވި އެވެ. އަދި, ގާސިމަކީ ވަރަށް ވިސްނުންތޫނު ބޭފުޅެއް ކަމަށާއި، އެ ހުރިހާ ކަންކަމެއް ރަނގަޅަށް އެނގިވަޑައިގަންނަވާނެ ކަމަށް އޭނާ ވިދާޅުވި އެވެ.
"ތެލާއި ފެނާ ދުވަހަކުވެސް އެކުވާނެ؟ އަޅުގަނޑު ދަންނަ ގާސިމް އިބްރާހިމެއް ރައީސް ނަޝީދު ފަހަތަކަށް ނާރާނެ،" ސަމީރު ވިދާޅުވި އެވެ.
ގާސިމާއެކު ކޯލިޝަން ހެދުމުގެ މަޝްވަރާގެ ތެރެއަށް ނަޝީދު ހުށަހެޅުއްވި "ޝަރުތު" ކަރުދާހެއް "އަދަދު"އިން މިދިޔަ ހަފްތާގައި ވަނީ ފަޅާއަރުވާލައިފަ އެވެ.
ނަޝީދުގެ ހުށަހެޅުއްވުންތަކުގެ ތެރޭގައި، ސެޕްޓެމްބަރުގައި އޮންނަ ރިޔާސީ އިންތިހާބުގެ ފަހުން އެ އިންތިހާބު ކާމިޔާބު ކުރާ ކެންޑިޑޭޓު ހުވާ ކުރުމާ ދެމެދު އޮންނަ މުއްދަތުގައި ރާއްޖޭގައި އޮންނަން ފެންނަ ވެރިކަމުގެ ނިޒާމާ ގުޅޭ ވޯޓެއް ނަގައި, ނިޒާމު ބަދަލުކުރަން ފާސްވެއްޖެނަމަ, 2024 ގެ މަޖިލިސް އިންތިހާބު އެ ބަދަލުތަކާ އެކު ބޭއްވުން ހިމެނެ އެވެ.
"މިއުޅެނީ ކޮން ކަމެއް ކުރަންތޯ؟ ގާސިމް ބުދެއް ގޮތެއް ބަހައްޓައިގެން އެހެން މީހަކު ބޮޑުވަޒީރުކަމަށް އަންނަން،" ސަމީރު ވިދާޅުވި އެވެ.
ރައީސް ސޯލިހުގެ ސަރުކާރުން ޖޭޕީ ވެސް ހިމެނޭ ކޯލިޝަން ރޫޅާނުލައި، ގައުމަށް ހަމަޖެހުން ގެނުވައި، ހުދު ގާސިމަށް ވެސް ހިތްހަމަޖެހިލައިގެން މަސައްކަތް ކުރެވޭނެ ފުރުސަތު ދެއްވި ވެރިއަކާއެކު ހުންނެވުމަކީ، ސަމީރު ވިދާޅުވި ގޮތުގައި ގާސިމް އަބަދުވެސް ގެންގުޅުއްވި އުސޫލު ކަމަށެވެ.
އެ އުސޫލާ ހިލާފަށް، އިންތިހާބުގައި ރައީސް ސޯލިހާ ދެކޮޅަށް ގާސިމް ނުކުންނަވަން ނިންމެވީ، ޕާޓީގެ ތެރޭގައި އަމިއްލަ އެދުމެއްގައި މަސައްކަތްކުރާ ބައެއްގެ ސަބަބުން ކަމަށް އޭނާ ތުހުމަތުކުރެއްވި އެވެ. އަދި, މިހާރުގެ ސިޔާސީ ހާލަތަށް ބަލާއިރު، ގާސިމް ވެރިކަމަށް އައުމަށް ރައްޔިތުން ފުރުސަތު ދީފާނެ ކަމަށް ގަބޫލުނުކުރެއްވޭ ކަމަށް ވެސް ސަމީރު ވިދާޅުވި އެވެ.
"އަޅުގަނޑު [ޖޭޕީގެ އިސް ބޭފުޅުންނާ] ވަރަށް ސުވާލުކޮށްފިން. ހަމަ އަހާއިރަށް ބުނާނެ މިއީ އެ ފަހަރޭ. އެކަމަކު ކޮންމެވެސް ފޯމިއުލާއެއް އޮންނަންވާނެތާ. ވެރިކަމަށް އައުމުގެ ފޯމިއުލާއެއް އޮތް ކަމަކަށް އަޅުގަނޑު ގަބޫލުނުކުރެވޭ،" އޭނާ ވިދާޅުވި އެވެ.
