ސޫދާންގެ ސިފައިންނާ ވަކިން ހަރަކާތްތެރިވާ އަސްކަރީ ފައުޖަކާ ދެމެދު ކުރަމުންދާ ހަމަލާ ބަދަލުކުރުންތަކުގައި އދ. ގެ މުވައްޒަފުންތަކެއް މަރުވުމުން ކަންބޮޑުވުން އުފެދިއްޖެ އެވެ.
ރިޕޯޓުތައް ބުނާ ގޮތުން އުތުރު ދާރްފޫރްގައި މަރުވީ ވޯލްޑް ފުޑް ޕްރޮގްރާމް (ޑަބްލިއުއެފްޕީ) ގެ ތިން މުވައްޒަފުންނެވެ. އޭގެ އިތުރުން އާއްމުންގެ 56 މީހުން ވެސް މަރުވެފައިވެ އެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ހަމަލާތައް ކުށްވެރި ކުރައްވައި ގޮވާލެއްވީ ވީ އެންމެ އަވަހަކަށް ހަމަޖެހުން ގެނެސް އިންސާފު ގާއިމްކުރުމަށެވެ.
ޑިޕްލޮމެޓިކް މަސްދަރުތަކުން އޭއެފްޕީއަށް މައުލޫމާތު ދިން ގޮތުގައި ހޯމަ ދުވަހު އދ. ގެ ސަލާމަތީ މަޖިލީހުގެ ސިއްރު ބައްދަލުވުމެއް ބާއްވައި ސޫދާންއާ ގުޅޭ ގޮތުން މަޝްވަރާ ކުރަން ހަމަޖެހިފައިވެ އެވެ.
ސޫދާންގެ ސިފައިންނާއި ރެޕިޑް ސަޕޯޓް ފޯސާޒް (އާރްއެސްއެފް) ގެ ހަމަނުޖެހުން ހުއްޓުވައި ސުލްހަ ގެނައުމުގައި މެދުވެރިއެއްގެ ދައުރު އަދާކުރަން މިސްރާއި ދެކުނު ސޫދާނުން ވަނީ ހުށަހަޅައިފަ އެވެ.
ހޮނިހިރު ދުވަހުން ފެށިގެން އާރްއެސްއެފް އާއި ސޫދާންގެ ސިފައިންނާ ދެމެދު ހަމަލާ ބަދަލުކުރަމުންދާ އިރު، އާރްއެސްއެފްއިން ބުނީ ފުރަތަމަ ހަމަލާ ދިނީ ސިފައިން ކަމަށެވެ.
އާރްއެސްއެފްއަކީ 100،000 އަށް ވުރެ ގިނަ ސިފައިން ހިމެނޭ ފައުޖެކެވެ. އެ ގްރޫޕްގެ ވެރިޔާއަކީ ކުރީގެ އަސްކަރީ ޖެނެރަލް މުހައްމަދު ހަމްދާން ދަގަލޯ ނުވަތަ ހެމެދްތީ އެވެ.
އާރްއެސްއެފް އާއި ސިފައިން ގުޅިގެން ކުރި މަސައްކަތުން ވަނީ ސޫދާންގައި ދިގު މުއްދަތަކަށް ވެރިކަން ކުރި އޮމަރް އަލް ބަޝީރްގެ ވެރިކަން 2019 ގައި ވައްޓާލައިފަ އެވެ.
މިހާރު ސޫދާންގައި ވެރިކަން ކުރާ ސޯވެރިން ކައުންސިލްގެ ޑެޕިއުޓީ ލީޑަރަކީ ހެމެދްތީ އެވެ. އެ ކައުންސިލް ލީޑުކުރައްވަނީ ޖެނެރަލް އަބްދެލް ފައްތާހް އަލް ބުރްހާން އެވެ.
ސޫދާން ޑިމޮކްރަސީއަށް ކުރާ ދަތުރުގައި އިސް ދައުރެއް އަދާކުރަން ހެމެދްތީ ބޭނުންވެ އެވެ. އެކަމަކު ފާއިތުވި ހަފުތާތަކުގައި އޭނާގެ ފައުޖުގެ ސިފައިން ހަރަކާތްތެރިވުން އިތުރުވުމުން އަސްކަރިއްޔާއިން ކަންބޮޑުވުން ފާޅުކުރި އެވެ.
މިދިޔަ ބުރާސްފަތި ދުވަހު ސިފައިން ބުނީ އާރްއެސްއެފްއިން ހަރަކާތްތެރިވަމުން ދަނީ ގާނޫނާ ހިލާފަށް ކަމަށެވެ.
އަސްކަރީ ބަގާވާތްތަކާއި ވެރިކަމުގެ ބާރު ހޯދަން ހަމަނުޖެހުން ބޮޑު ސޫދާންގައި ރައްޔިތުންގެ ވެރިކަމެއް ގާއިމްކުރަން ކުރާ މަސައްކަތަށް މި ހަމަނުޖެހުމުގެ އަސަރު ކުރާނެ ކަމަށް ބެލެވެ އެވެ.
