ޑުބާއީގައި މީހުން ދިރިއުޅޭ އިމާރާތެއްގެ އެޕާޓްމަންޓެއްގައި ރޯވެ ހިނގި އަލިފާނުގެ ހާދިސާއެއްގައި 16 މީހުން މަރުވެ ނުވަ މީހުންނަށް އަނިޔާވެއްޖެ އެވެ.
އަލިފާން ރޯވި އިމާރާތް ހުންނަނީ އަލް-ރާސް ސަރަހައްދުގަ އެވެ. އެއީ ޑުބާއީގައި އެންމެ މުސްކުޅި އިމާރާތްތައް ހުންނަ ހިސާބުކަމަށްވެ އެވެ.
އެއީ ޑުބާއީއަށް ހިޖުރަކޮށްގެން އުޅޭ ގިނަ އަދަދެއްގެ މަސައްކަތްތެރިންނާއި ވިޔަފާރިވެރިން ދިރިއުޅޭ ހިސާބެކެވެ. އަލިފާން ރޯވީ ފަސް ފަންގިފިލާ އިމާރާތެއްގެ ހަތަރު ވަނަ ފަންގިފިލާގަ އެވެ.
ޑުބާއީގެ ސިވިލް ޑިފެންސުން ބުނީ ހާދިސާ ހިނގަން މެދުވެރިވީ އިމާރާތުގެ ސަލާމަތާއި ރައްކާތެރިކަން ކަށަވަރު ކުރަން ހަދާފައިވާ ގަވާއިދުތަކާ ހިލާފަށް އަމަލު ކުރުމުން ކަމަށެވެ. އެ އިދާރާއިން ބުނީ ހާދިސާއާ ގުޅޭ ތަހުގީގެއް ފަށާފައިވާ ކަމަށެވެ.
މަރުވި މީހުންގެ ތެރޭގައި ހިމެނެނީ އިންޑިއާގެ ހަތަރު މީހުންނާއި ޕާކިސްތާނުގެ ތިން މީހުންނެވެ. އެ ހާދިސާއާ ގުޅިގެން މިހާތަނަށް އެއްވެސް މީހަކު ހައްޔަރެއް ނުކުރެ އެވެ.
