ސޫދާންގެ ޕެރެމިލިޓަރީ ރެޕިޑް ސަޕޯޓް ފޯސާޒް (އާރްއެސްއެފް) އިން ރިޔާސީ ގަނޑުވަރާއި، ސިފައިންގެ ވެރިޔާގެ ރަސްމީ ގެކޮޅާއި، ހާރްތޫމް އިންޓަނޭޝަނަލް އެއާޕޯޓު ހިފައިފި އެވެ.
އާރްއެސްއެފް އާއި ސޫދާންގެ ސިފައިންނާ ދެމެދު ހަމަލާ ބަދަލުކުރަމުންދާ އިރު، އާރްއެސްއެފްއިން ބުނީ ފުރަތަމަ ހަމަލާ ދިނީ ސިފައިން ކަމަށެވެ.
ސިފައިން ބުނީ އާރްއެސްއެފްއާ ދެކޮޅަށް ސޫދާންގެ ވައިގެ ސިފައިންގެ އޮޕަރޭޝަންތައް ކުރިއަށްދާ ކަމަށެވެ. ހާރްތޫމްގެ މަތިން އަސްކަރީ ޖެޓުތައް އުޅޭ މަންޒަރު ދައުލަތުގެ ޓީވީއިން ވަނީ ދައްކައިފަ އެވެ.
ހާރްތޫމްގެ އެކި ހިސާބުތަކުގައި ބަޑީގެ އަޑު އިވެމުންދާ އިރު، އެހެން ސިޓީތަކުގައި ވެސް ހަމަލާ ބަދަލުކުރަމުންދާ ކަމަށް ރިޕޯޓުތައް ބުނެ އެވެ.
އާއްމުން ދިރިއުޅޭ ހިސާބުތަކުގައި ވެސް ހަމަލާ ބަދަލުކޮށްފައިވާ އިރު، ބައެއް އާއްމު ރައްޔިތުންނަށް އަނިޔާވެފައިވާ ކަމަށް ޑޮކްޓަރުން ބުނެ އެވެ.
އާރްއެސްއެފްއަކީ 100،000 އަށް ވުރެ ގިނަ ސިފައިން ހިމެނޭ ފައުޖެކެވެ. އެ ގްރޫޕްގެ ވެރިޔާއަކީ ކުރީގެ އަސްކަރީ ޖެނެރަލް މުހައްމަދު ހަމްދާން ދަގަލޯ ނުވަތަ ހެމެދްތީ އެވެ.
މީގެ ކުރިން ސިޔާސީ ޕާޓީތަކުން ނިންމީ ވެރިކަން ހިންގުމުގައި އާރްއެސްއެފް އާއި އަސްކަރިއްޔާ ބައިވެރި ކުރުމަށެވެ. އެހެންވެ، ހަމަލާ ހުއްޓާލަން ޕާޓީތަކުން ވަނީ ގޮވާލައިފަ އެވެ.
އަސްކަރީ ބަގާވާތްތަކާއި ވެރިކަމުގެ ބާރު ހޯދަން ހަމަނުޖެހުން ބޮޑު ސޫދާންގައި ރައްޔިތުންގެ ވެރިކަމެއް ގާއިމްކުރަން ކުރާ މަސައްކަތަށް މި ހަމަނުޖެހުމުގެ އަސަރު ކުރާނެ ކަމަށް ބެލެވެ އެވެ.
ސޫދާން ޑިމޮކްރަސީއަށް ކުރާ ދަތުރުގައި އިސް ދައުރެއް އަދާކުރަން ހެމެދްތީ ބޭނުންވެ އެވެ. އެކަމަކު ފާއިތުވި ހަފުތާތަކުގައި އޭނާގެ ފައުޖުގެ ސިފައިން ހަރަކާތްތެރިވުން އިތުރުވުމުން އަސްކަރިއްޔާއިން ކަންބޮޑުވުން ފާޅުކުރި އެވެ.
މިދިޔަ ބުރާސްފަތި ދުވަހު ސިފައިން ބުނީ އާރްއެސްއެފްއިން ހަރަކާތްތެރިވަމުން ދަނީ ގާނޫނާ ހިލާފަށް ކަމަށެވެ.
އާރްއެސްއެފް އާއި ސިފައިން ގުޅިގެން ކުރި މަސައްކަތުން ވަނީ ސޫދާންގައި ދިގު މުއްދަތަކަށް ވެރިކަން ކުރި އޮމަރް އަލް ބަޝީރްގެ ވެރިކަން 2019 ގައި ވައްޓާލައިފަ އެވެ.
މިހާރު ސޫދާންގައި ވެރިކަން ކުރާ ސޯވެރިން ކައުންސިލްގެ ޑެޕިއުޓީ ލީޑަރަކީ ހެމެދްތީ އެވެ. އެ ކައުންސިލް ލީޑުކުރައްވަނީ ޖެނެރަލް އަބްދެލް ފައްތާހް އަލް ބުރްހާން އެވެ.
