ޔަމަނުގެ ދިގު ދާހިލީ ހަނގުރާމައިގެ ތެރެއިން ހައްޔަރު ކުރި 800 އަށް ވުރެ ގައިދީން މިނިވަން ކުރުމުގެ ބޮޑު އޮޕަރޭޝަނެއް ހުކުރު ދުވަހު ފަށައިފި އެވެ.
ގައިދީން މިނިވަން ކުރަން އެއްބަސްވީ އދ. މެދުވެރިވެގެން ބޭއްވި ދިގު މަޝްވަރާތަކަށް ފަހުގައި ކަމަށް އިންޓަނޭޝަނަލް ކޮމިޓީ ފޯ ދަ ރެޑް ކްރޮސްއިން ބުނެ އެވެ.
ގައިދީން މިނިވަން ކުރަމުންދާ އިރު، ދާއިމީ ސުލްހަ ގެނައުމަށް ވެސް މި ވަގުތު މަޝްވަރާތައް ދަނީ ކުރިއަށެވެ. މިއީ ދެ އަހަރަށް ފަހު މިހާ ގިނަ އަދަދެއްގެ ގައިދީން މިނިވަންކުރި ފުރަތަމަ ފަހަރެވެ.
މީގެ ކުރިން އޮކްޓޯބަރު 2020 ގައި ވެސް އިރާނުގެ އެއްބާރުލުމާ އެކު އުޅޭ ހޫތީ ހަނގުރާމަވެރިންގެ އަތްދަށުގައި ތިބި 1000 އަށް ވުރެ ގިނަ ގައިދީން މިނިވަންކުރި އެވެ.
މިނިވަަންވި ހޫތީން. -- ފޮޓޯ: އޭއެފްޕީ
ޔަމަން ސަރުކާރާ އެކު ހަނގުރާމަ ކުރާ އަރަބި ކޯލިޝަނުން ހައްޔަރު ކުރި ހޫތީ ހަނގުރާމަވެރިން ބަންދުކޮށްފައި ތިބީ ސައުދީ އަރަބިއްޔާ އާއި ޔަމަނުގެ ޖަލުތަކުގަ އެވެ.
ހުކުރު ދުވަހު އެ މީހުން ޔަމަނުގެ ވެރިރަށް ސަނާގެ އެއާޕޯޓަށް ފޭބުމާ އެކު ހޫނު މަރުހަބާއެއް ކިޔެވެ. ސަނާގެ ކޮންޓްރޯލް އޮތީ ހޫތީންގެ އަތުގަ އެވެ.
އެ މީހުން ސަނާއަށް ދިޔައީ އަދަނުންނެވެ. އެއީ ޔަމަނުގެ އިންތިހާބީ ސަރުކާރުގެ ކޮންޓްރޯލްގެ ދަށުގައި އޮތް މައި ސިޓީ އެވެ.
ގައިދީން މިނިވަން ކުރަން ހިންގާ ތިން ދުވަހުގެ އޮޕަރޭޝަނުގައި ޔަމަނާއި ސައުދީގައި ތިބި ގައިދީން ބަަދަލުކުރާނީ ފްލައިޓުތައް މެދުވެރިވެގެންނެވެ.
ޔަމަނުގެ ދާހިލީ ހަނގުރާމަ ފެށީ 2014 ވަނަ އަހަރު ހޫތީން އިންތިހާބީ ސަރުކާރާ ދެކޮޅަށް ތެދުވެ ވެރިރަށް ސަނާ އާއި އުތުރުގެ ބޮޑު ހިސާބުތަކެއް ހިފުމުންނެވެ.
މިނިވަންވި ހޫތީން. -- ފޮޓޯ: އޭއެފްޕީ
ހަނގުރާމައިގައި 150،000 އަށް ވުރެ ގިނަ މީހުން މަރުވެފައިވާ އިރު، ޔަމަނުގައި ވަނީ ބޮޑު އިންސާނީ ކާރިސާއެއް އުފެދިފަ އެވެ.
ގައިދީން މިނިވަން ކުރަން ސޮއިކުރި އެއްބަސްވުމުގެ ދަށުން ހޫތީން ބަންދުކޮށްފައި ތިބި 180 ގައިދީން މިނިވަން ކުރާނެ އެވެ. އެއީ ސައުދީ އާއި ޔަމަނުގެ ސިފައިންނާއި ޔަމަނުގެ ހަތަރު ނޫސްވެރިން ހިމެނޭ ގޮތަށެވެ.
އޭގެ އިތުރުން ޔަމަނުގެ އިސް އަސްކަރީ އޮފިޝަލުންނާއި ސަރުކާރުގެ ވެރިން ވެސް ދޫކުރާނެ އެވެ. އެއީ ހަނގުރާމައިގެ ކުރީކޮޅު ހޫތީން ހައްޔަރު ކުރި މީހުންނެވެ. އޭގެ ތެރޭގައި ކުރީގެ ޑިފެންސް މިނިސްޓަރު މޭޖާ ޖެނެރަލް މަހްމޫދް އަލް ސުބައިހީ އާއި ރައީސް އާބިދް ރައްބޮ މަންސޫރް ހާދީގެ އާއިލީ ބޭފުޅުންނާއި ކުރީގެ ރައީސް އަލީ އަބްދުﷲ ސާލިހްގެ އާއިލީ ބޭފުޅުން ވެސް ހިމެނެ އެވެ.
ބަދަލުގައި ސައުދީ ކޯލިޝަނުން ދޫކުރާނީ ހޫތީންގެ 700 އަށް ވުރެ ގިނަ މީހުންނެވެ.
