އިރާނާއި ޔަމަނާ ގުޅޭ ގޮތުން މަޝްވަރާ ކުރެއްވުމަށް އެމެރިކާގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން ސައުދީ އަރަބިއްޔާ ވަލީ އަހުދު އަމީރު މުހައްމަދު ބިން ސަލްމާންއަށް ފޯނުން ގުޅުއްވައިފި އެވެ.
ހަތް އަހަރުގެ މެދުކެނޑުމަކަށް ފަހު އިރާނާއި ސައުދީ އަރަބިއްޔާއިން މިދިޔަ މަހު ޑިޕްލޮމެޓިކް ގުޅުން ގާއިމްކުރަން ނިންމީ ޗައިނާ މެދުވެރިވެގެން ބޭއްވި ބައްދަލުވުންތަކުންނެވެ.
އިރާނާއި ސައުދީގެ ގުޅުން ރަނގަޅުވާން ފެށުމާއެކު ޔަމަނަށް ސުލްހަ ގެނައުމުގެ އުއްމީދު ވެސް ވަނީ ބޮޑުވެފަ އެވެ. ސައުދީ މަންދޫބުން މި ވަގުތު ތިއްބެވީ ސުލްހައިގެ މަޝްވަރާއަށް ޔަމަނުގަ އެވެ.
ޔަމަނުގައި ސުލްހައިގެ މަޝްވަރާ ކުރިއަށްދާ މި ދަނޑިވަޅުގައި އެމެރިކާއިން ޔަމަނަށް ކަނޑައަޅާފައި ހުންނަ މަންދޫބު ޓިމް ލެންޑާކިންގް ވެސް ވަނީ އަންގާރަ ދުވަހު ޔަމަނަށް ދަތުރު ކުރައްވައިފަ އެވެ.
އެކަންކަމާ ގުޅޭ ގޮތުން މަޝްވަރާ ކުރުމަށް ސަލިވަން ސައުދީ ވަލީ އަހުދަށް ގުޅުއްވި އިރު، މެދުއިރުމަތީގެ އެހެން މައްސަލަތަކާ ގުޅޭ މަޝްވަރާ ވެސް ކުރިއަށް ދިޔަ ކަމަށް އެމެރިކާއިން ބުންޏެވެ.
އޭގެ އިތުރުން މިދިޔަ ހަފުތާގައި އެމެރިކާގެ ސެންޓްރަލް އިންޓެލިޖެންސް އެޖެންސީ (ސީއައިއޭ) ގެ ޑިރެކްޓަރު ބިލް ބާންސް ސައުދީ އަރަބިއްޔާއަށް ވަޑައިގެންނެވި އެވެ.
