ބާސެލޯނާ (އޭޕްރީލް 10) - ސްޕެނިޝް ލީގުގެ ރެފްރީ ކޮމިޓީގެ ކުރީގެ ނައިބް ރައީސް އެންރިކޭޒް ނެގްރެއިރާގެ ހިއްސާ އޮންނަ ކުންފުނި، ޑަޒްނިލް 95 އަށް ބާސެލޯނާ އިން ފައިސާ ދިން މައްސަލައިގެ ތަހުގީގު ކުރިއަށްދާ ދަނޑިވަޅުގައި އެ ކްލަބަކީ ކުށްވެރިންގެ ގޮތުގައި ލޭބަލް ނުކުރަން ބާސެލޯނާގެ ރައީސް ޖޮއާން ލަޕޯޓާ ވިދާޅުވެއްޖެ އެވެ.
ސްޕެއިނުގެ ފުޓްބޯޅަ ފެޑެރޭޝަނާ ގާތްގުޅުމެއް އޮންނަ ރެފްރީ ނެގްރެއިރާގެ ހިއްސާ އޮންނަ ޑަޒްނިލް 95 އަށް ބާސެލޯނާ އިން ވަނީ 2001 އިން 2018 އަށް ޖުމްލަ އެކު، ނުވަ މިލިއަން ޑޮލަރު ދީފަ އެވެ. ޑަޒްނިލް 95 އަށް ބާސެލޯނާ އިން އެކި ފަަހަރު މަތިން ދިން މި ފައިސާތަކާ ގުޅޭ ލިޔެކިޔުންތަކުގައި ފުށުއެރުން ގިނަ ކަންކަން ހިމެނޭއިރު، ސްޕެއިނުގެ ޓެކްސް އޮތޯރިޓީން ވެސް ވަނީ މައްސަލަތަކެއް ފެންމަތިކޮށްފަ އެވެ. ސްޕެނިޝް ލީގުގެ ފައިނޭންޝިއަލް ޔުނިޓުންނާއި ޔުއެފާ އިން ވެސް އަންނަނީ މި މައްސަލަ ތަހުގީގުކުރަމުންނެވެ.
ދާދި ފަހުން ޔުއެފާގެ ރައީސް އަލެކްސަންޑަ ޗެފެރިން ދެއްވި އިންޓަވިއުއެއްގައި ވަނީ ބާސެލޯނާގެ މި މައްސަލަ އަކީ "ފުޓްބޯޅައިގައި މިހާތަނަށް ފެނުނު އެންމެ ބޮޑު އެއް މައްސަލަ" ކަމަށް ވިދާޅުވެފަ އެވެ. ފީފާގެ ރައީސް ޖިއާނީ އިންފަންޓީނޯ ވެސް ވަނީ ބާސެލޯނާއާ ދެކޮޅަށް މި މައްސަލަ ނިމުމުގެ ފުރުސަތު ބޮޑުކަން ދޭހަވާ މޭރުމުން ވާހަކަ ދައްކައިފަ އެވެ.
"މިހާރު މި އޮތީ ޕްރީޖުޑިސް އެއް، އަހަރެމެން ކުށްވެރިންގެ ގޮތުގައި ނިންމައިފި. އަހަރެމެން ގައިގައި ކުށްވެރިންގެ ލޭބަލް ޖަހައިފި، އެކަމަކު، ދެ އިދާރާ އަކުން އޭގެ ތަހުގީގު އެ ދަނީ ކުރިއަށް، އަހަރެން ގޮވާލަން، ތަހުގީގަށް ފަހު، ވާހަކަ ދައްކަން ހުރިހާ ފަރާތަކުން ވެސް މަޑުކޮށްލަން،" ކަޓަލޫނިއާ ރޭޑިއޯ އަކަށް ލަޕޯޓާ ދެއްވި އިންޓަވިއުއެއްގައި ވިދާޅުވި އެވެ.
ލަޕޯޓާ ވިދާޅުވީ ބާސެލޯނާ އިން ގޯހެއް ހަދާފައިނުވާނެކަން ޔަގީންކަމަށާއި މި މައްސަލައިގައި އެ ޓީމަށް ފިޔަވަޅު އަޅަން ނިންމިޔަސް، އެ ނިންމުމާ ދެކޮޅަށް ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ދާނެ ކަމަށެވެ.
މި ދައުވާ ކުރާ މައްސަލައާ ގުޅޭ މުއްދަތަށް ބަލާއިރު، ބާސެލޯނާގެ ދެ ވަނަ ދައުރެއްގައި ރައީސްކަން ކުރައްވަމުން އަންނަ ޖޮއާން ލަޕޯޓާގެ އިތުރުން ބާސެލޯނާގެ ކުރީގެ ދެ ރައީސުން ކަމަށްވާ ސަންޑްރޯ ރޮސެލް އާއި ހޯސޭ މާރިއާ ބާޓޮމެއުއާ ވެސް މައްސަލަ ބަލާ ތަހުގީގީ އިދާރާތަކުން ސުވާލުކުރާނެ އެވެ.
