ވެރިކަން ހިންގާ މައި ޕާޓީ އެމްޑީޕީ އޮތީ ބައިވެފައި ކަމަށާއި ރައްޔިތުންގެ މަޖިލީހުގެ ސުޕަ މެޖޯރިޓީއާއެކު ފަސް އަހަރުގެ ދައުރެއް ނިމޭއިރު އެއްވެސް މަސައްކަތެއް ނުކުރެވުނު ކަމަށް އިދިކޮޅުގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވެއްޖެ އެވެ.
މި ނޫހުން ރޯދަ މަހު ގެނެސްދޭ ސިޔާސީ ޓޯކް ޝޯ "ކުޅިކޮށް" ޕްރޮގްރާމުގައި ވާހަކަ ދައްކަވަމުން އަބްދުއްރަހީމް ވަނީ އެމްޑީޕީއަށް ވަރަށް ބޮޑަށް ފާޑުވިދާޅުވެފަ އެވެ. އަދި ވިދާޅުވީ އެމްޑީޕީ އެތެރޭގައި ވަރަށް ބޮޑު މައްސަލަތަކެއް އުޅޭ ކަމަށެވެ.
"އެމްޑީޕީ އޭގެ ޒާތުގައި މި އޮތީ ދެ ފަޅިވެފައި. ކެނޑިނޭޅި އަޅުގަނޑުމެންނަށް މި އަޑު އިވެނީ ރައްޔިތުންގެ މަޖިލީހުގެ ތެރެއިން ވެސް އިދިކޮޅަށްވުރެ ބޮޑަށް މި ސަރުކާރަށް ފާޑުކިޔަނީ އެމްޑީޕީ މެމްބަރުން. އެހެންވީމަ އެބައުޅެއެއް ނޫންތޯ މައްސަލައެއް،" އޭނާ ވިދާޅުވި އެވެ.
އަބްދުއްރަހީމް އެހެން ވިދާޅުވިއިރު އެމްޑީޕީގެ ރިޔާސީ ޕްރައިމަރީގައި ވާދަ ކުރެއްވުމަށްފަހު އެ ޕާޓީގެ ރައީސް މުހައްމަދު ނަޝީދު މަސައްކަތް ކުރައްވަމުންދަނީ ޕާޓީގެ ރިޔާސީ ކެންޑިޑޭޓު އަދި މިހާރު ރައީސް އިބްރާހިމް މުހައްމަދު ސޯލިހާ ދެކޮޅަށެވެ. މިވަގުތު ނަޝީދު މަސައްކަތް ކުރައްވާތަން ފެންނަނީ ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހިމާއެކު އެވެ.
އެމްޑީޕީގެ ވާހަކަ އިތުރަށް ދައްކަވަމުން އަބްދުއްރަހީމް ވިދާޅުވީ ރައީސް ސޯލިހުގެ ފަސް އަހަރުގެ ދައުރު ނިމެން ގާތްވެފައިވާއިރު ވައުދުވި އެއްވެސް ކަމެއް ނުފުއްދޭ ކަމަށެވެ.
"މަޖިލީހުގެ ސުޕަ މެޖޯރިޓީ ލިބިފައި އޮތީ. އަޅުގަނޑަކަށް ނުފެނުނު ތިބޭފުޅުން ވިދާޅުވި އެއްވެސް ކަމަކަށް އަމަލީ ސިފަ އައިތަނެއް. ޖޭއެސްސީ އެކުލެވިގެންވާ ގޮތް ބަދަލު ކުރާނެ ކަމަށް ރަައީސް ސޯލިހު ވިދާޅުވި. ފަސްދޮޅަސް ފަސް މެމްބަރުންނާއެކު ފަސް އަހަރުގެ ދައުރެއް ފުރިހަމަވާއިރު އެކަމެއް ނުވި. ޝަރުއީ ނިޒާމް މިނިވަން ކުރައްވާނަމޭ ވިދާޅުވި،" އަބްދުއްރަހީމް ވިދާޅުވި އެވެ.
