ބިންވެރިޔާ ސްކީމްގެ ދަށުން މާލެ ސަރަހައްދުން ގޯތި ލިބޭ މީހުންގެ ވަގުތީ ލިސްޓު އާންމު ކުރެވޭނެ ދުވަހެއް ނޭނގޭ ކަމަށް "ގެދޮރުވެރިންގެ ކޮމިޓީ" އިން ބުނެފި އެވެ.
ގޯއްޗާއި ފްލެޓަށް ކުރިމަތިލުމަށް ސަރުކާރުން ހުޅުވާލީ މިދިޔަ އަހަރުގެ ޖޫން 26 ވަނަ ދުވަހު އެވެ. މިހާރު ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
ބިންވެރިޔާ ސްކީމްގެ ދަށުން ހުޅުމާލެއިން ދިނުމަށް ހަމަޖެހިފައިވާ 1000 ގޯއްޗަށްވާ ބިން ކެނޑުން އަމަލީކޮށް ފެށި ދުވަހު، ޕްލޭނިން މިނިސްޓްރީން ވަނީ ވަގުތީ ލިސްޓު މާޗު މަހުގެ ތެރޭގައި އާންމު ކުރެވޭނެ ކަމަށް ބުނެފަ އެވެ.
އެހެންނަމަވެސް މާޗު މަސް ނިމުނުއިރުވެސް ލިސްޓު އާންމުކޮށްފައިނުވެ އެވެ.
މަޖިލީހުގެ މިއަދުގެ ޖަލްސާއަށް ޕްލޭނިން މިނިސްޓަރު މުހައްމަދު އަސްލަމް ހާޒިރުކޮށްފައިވާއިރު، ހޯރަފުށީ ދާއިރާގެ މެންބަރު އަހުމަދު ސަލީމް ވަނީ ގެދޮރުވެރިޔާ މަޝްރޫއުގެ އަޕްޑޭޓަކާ ގުޅޭ ގޮތުން ސުވާލުކޮށްފަ އެވެ.
އެ ސުވާލަށް ޖަވާބު ދެއްވަމުން އަސްލަމް ވިދާޅުވީ އެ މަސައްކަތް ހިނގާ ގޮތް ކޮންމެ ދުވަހަކު ނުބަލާ ކަމަށާއި އެހެންނަމަވެސް ގެދޮރުވެރިޔާ ކޮމިޓީގެ މަސައްކަތް ކުރިއަށް ދާ ކަމަށެވެ.
"އިވެލުއޭޝަންތައް ނިމުނީމާ އަޅުގަނޑު ބަލަނީ ކޮމިޓީން އަޅުގަނޑަށް ރިޕޯޓު ކުރާނެޔޭ، ކިހިނެއް ކަން އިވެލުއޭޝަންގެ މަސައްކަތް ގޮސް ނުކުތް ނަތީޖާއަކީ، އެ ބޭފުޅުންގެ މަސައްކަތް ނިންމާ ރިޕޯޓު ކުރެވޭނީ މެއިގެ ނިޔަލަށް ޖޫންގެ ކުރީކޮޅު،" އަސްލަމް ވިދާޅުވި އެވެ.
ވަގުތީ ލިސްޓު އާންމު ކުރެވޭނެ ދުވަހަކާ ގުޅޭ ގޮތުން "އަދަދު" އިން ބިންވެރިޔާ ކޮމިޓިގެ ޗެއާ އަދި ސްޓޭޓް ހައުސިން މިނިސްޓަރު އަކްރަމް ކަމާލުއްދީން އާ ސުވާލުކުރުމުން ވިދާޅުވީ ވަގުތީ ލިސްޓު އާންމު ކުރެވޭނެ ދުވަހެއް ނޭނގޭ ކަމަށެވެ.
މާލެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ. އެ ވައުދު ފުއްދުމުގެ ގޮތުން މާލެ ސަރަހައްދުން ގޯއްޗާއި ފުލެޓަށް އެދި ހުށަހެޅުމުގެ ފުރުސަތު ހުޅުވާލީ ހުސްވި އަހަރުގެ ޖޫން، 26 ވަނަ ދުވަހު އެވެ.
މިދިޔަ އޮކްޓޫބަރު މަހުގެ 15 ވަނަ ދުވަހަށް އެ މުއްދަތު ހަމަވި އިރު، ބިންވެރިޔާ ސްކީމްގެ ދަށުން ދޫކުރުމަށް ކަނޑައެޅި 3000 ގޯއްޗަށް އެދި ޖުމްލަ 15،164 މީހުން ހުށަހަޅާފައިވެ އެވެ. އަދި ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައެޅި 4000 ފުލެޓަށް އެދި 20،697 މީހުން ހުށަހަޅާފައިވެ އެވެ.
ބިންވެރިޔާ ސްކީމްގެ ދަށުން ދޫކުރާ ގޯތީގެ ތެރެއިން އެންމެ ކުޑަ ގޯތީގައި ވެސް 1250 އަކަފޫޓު ހުންނާނެ ކަމަށް އޭރު ސަރުކާރުން ކުރި އިއުލާނުގައިވެ އެވެ.
