އަންގާރަ ދުވަހުން ފެށިގެން ފިންލޭންޑަށް ނޭޓޯގެ މެމްބަރުކަން ދޭން ނިންމާފައިވާ ކަމަށް އަސްކަރީ ކޯލިޝަންގެ ސެކެޓްރީ ޖެނެރަލް އިއުލާން ކުރައްވައިފި އެވެ.
ފިންލޭންޑް ވާނީ ނޭޓޯގެ 31 ވަނަ މެމްބަރަށެވެ. ފިންލޭންޑުން ނޭޓޯގެ މެމްބަރުކަން ހޯދަން ބޭނުންވީ މިދިޔަ އަހަރުގެ ފެބްރުއަރީ މަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުންނެވެ.
ފިންލޭންޑާއި ރަޝިއާ ގުޅޭ ދިގު ބޯޑަރެއް އޮވެ އެވެ. މެމްބަރުކަން ލިބުން ލަސްވީ ތުރުކީއިން ހުރަސް އެޅުމުންނެވެ. ނަމަވެސް ފަހުން ތުރުކީއިން ވަނީ މައްސަލައެއް ނެތް ކަމަށް ބުނެފަ އެވެ.
ފިންލޭންޑާއެކު ސްވިޑަންއިން ވެސް ނޭޓޯގެ މެމްބަރުކަން ހޯދަން އެދި މިދިޔަ މޭ މަހު ހުށަހެޅި އެވެ. އެކަމަކު އަދިވެސް ސްވިޑަންއަށް ތުރުކީގެ ރުހުމެއް ނުލިބެ އެވެ.
ތުރުކީގެ ރައީސް ތައްޔިބް އުރުދުގާން ވިދާޅުވަނީ ސްވިޑަންއިން ކުރުދީ ޓެރަރިސްޓުންނަށް އެހީވާ ކަމަށެވެ. ފިންލޭންޑާ މެދު ވެސް ޖެއްސީ އެ މައްސަލަ އެވެ.
ނޭޓޯ ފުޅާކުރެވެނީ މެމްބަރު ހުރިހާ ގައުމެއްގެ ރުހުން ލިބިގެންނެވެ. ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެންބާގް ވިދާޅުވީ ފިންލޭންޑަށް މެމްބަރުކަން ލިބުމުން ސްވިޑަންއަށް ވެސް އޭގެ ފައިދާ ކުރާނެ ކަމަށެވެ.
