ހޮނިހިރު ދުވަހު އިރާނުންގެ ޓެރަރިސްޓުންތަކެއް ޕާކިސްތާނުގެ ބޯޑަރު ސިފައިންގެ ހަތަރު މީހުންނަށް ހަމަލާދީ މަރާލާފައިވާ ކަމަށް ޕާކިސްތާނުން ތުހުމަތުކޮށްފި އެވެ.
"ޕާކިސްތާނާއި އިރާނު ގުޅޭ ބޯޑަރު ކައިރީގައި ރޫޓީން ޕެޓްރޯލް ކުރަމުން ދިޔަ ޕާކިސްތާނުގެ ސަލާމަތީ ފައުޖަށް ހަމަލާ ދިނީ އިރާނު ފަޅީގައި އޮޕަރޭޓް ކުރާ ޓެރަރިސްޓުން،" ޕާކިސްތާން ސިފައިންގެ ބަޔާނެއްގައި ބުންޏެވެ.
އެ ހާދިސާ ހިނގީ ޕާކިސްތާނުގެ ހުޅަނގު ދެކުނު ބަލުޗިސްތާން ޕްރޮވިންސްގެ ކެޗް ޑިސްޓްރިކްޓުގަ އެވެ. އެ ތަނުގައި ޕާކިސްތާނާއި އިރާން އަދި އަަފްގާނިސްތާން ގުޅޭ ބޯޑަރު ހިސާބުގއި ޓެރަރިސްޓުން ވަރަށް ގިނައިން އުޅެ އެވެ.
ޕާކިސްތާނުގެ ސިފައިން ބުނީ މުސްތަގުބަލުގައި އެފަދަ ހާދިސާއެއް ނުހިނގާނެކަން ކަށަވަރު ކުރުމަށް އިރާނުގެ އިދާރާތަކާ މުއާމަލާތް ކުރަމުންދާ ކަމަށެވެ.
އެ ހަމަލާގެ ޒިންމާ އެއްވެސް ގްރޫޕަކުން މިހާތަނަށް އުފުލާފައެއް ނުވެ އެވެ. އެ ހިސާބުގައި ބަލުޗް ދަރިކޮޅުގެ ގްރޫޕްތަކުން ބުނާ ގޮތުގައި އެ މީހުން ހަނގުރާމަ ކުރަނީ ސަރަހައްދުގެ ވަސީލަތްތައް ހޯދުމަށެވެ.
އިރާނާއި ޕާކިސްތާނުގައި ވެސް ބަލުޗް ގްރޫޕްތައް އޮޕަރޭޓް ކުރެ އެވެ. ބަލުޗިސްތާން ޕްރޮވިންސަކީ ގުދުރަތީ ވަސީލަތްތައް މުއްސަނދި ހިސާބެކެވެ.
