ފަތުރުވެރިކަމުގެ ސިނާއަތުގެ ދުވެލި ބާރުވެ މި އަހަރުގެ ފުރަތަމަ ތިން މަހުގެ ތެރޭގައި ރާއްޖެއަށް 500،000 ޓޫރިސްޓުން ޒިޔާރަތްކޮށްފި އެވެ.
ޓުއަރިޒަމް މިނިސްޓަރު ޑރ. އަބްދުﷲ މިނިސްޓަރު މިރޭ ކުރެއްވި ޓުވީޓެއްގައި ބުނެފައިވަނީ ސަރުކާރުން ކަނޑައަޅާފައިވާ ޓާގެޓާ އެއްގޮތަށް ފަތުރުވެރިކަން ކުރިއަރަމުންދާ ކަމަށެވެ.
އެގޮތުން, މިނިސްޓަރު ހިއްސާކުރެއްވި ތަފާސްހިސާބުތަކުން ދައްކާ ގޮތުން މި މަހުގެ 26 އާއި ހަމައަށް ރާއްޖެއަށް ޒިޔާރަތް ކޮށްފައިވަނީ ޖުމްލަ 500،597 ފަތުރުވެރިންނެވެ. ދުވާލެއްގެ މައްޗަށް އެވްރެޖްކޮށް ރާއްޖެއަށް 6،000 އަށްވުރެ ގިނަ ފަތުރުވެރިން ދަނީ ޒިޔާރާތްކުރަމުންނެވެ.
މިއީ މިދިޔަ އަހަރުގެ އަދަދުތަކާ އަޅާކިޔާއިރު 22.3 އިންސައްތަ ކުރިއެރުމެކެވެ. މިދިޔަ އަހަރު މި މުއްދަތުގައި ރާއްޖެއަށް ޒިޔާރަތްކުރީ 409،426 ފަތުރުވެރިންނެވެ. އޭގެ ކުރީއަހަރުގެ ފުރަތަމަ ތިން އަހަރުގެ އަދަދު އުޅެނީ 278،274 ގަ އެވެ.
ކޮވިޑު ބަލިމަޑުކަމަށްފަހު ރާއްޖޭގެ ފަތުރުވެރިކަމުގެ ދުވެލި އިހުހުރި މިނަށް ދެމިލާފައިވާއިރު، ކޮވިޑުގެ ކުރިން ރާއްޖެއަށް އެންމެ ގިނައިން ފަތުރުވެރިން އައި ޗައިނާ ވަނީ ރާއްޖެއަށް މި އަހަރު އަށް ވަނަ އަށް އެންމެ ގިނައިން ފަތުރުވެރިން ފޮނުވި ގައުމަށް ވެފަ އެވެ. ކޮވިޑާ ގުޅިގެން އެޅި ފިޔަވަޅުތަކަށްފަހު ޗައިނާއިން ރާއްޖެއަށް އަލުން ފަތުރުވެރިން އަންނަން ފެށީ މި އަހަރު ޖެނުއަރީ 18 ގަ އެވެ.
މި އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައި ގައުމެއްގެ ގޮތުގައި އަދިވެސް އޮތީ ރަޝިޔާ އެވެ. އެގޮތުން އެ ގައުމުން މިހާތަނަށް ރާއްޖެއަށް 60،590 ފަތުރުވެރިން ޒިޔާރާތްކޮށްފައިވެ އެވެ. ދެވަނައިގާ އޮތް އިންޑިއާއިން މިހާތަނަށް 50،000 އަށްވުރެ ގިނަ ފަތުރުވެރިން އައިސްފައިވާއިރު ތިންވަނައަށް އެންމެ ގިނައިން ފަތުރުވެރިން އައިސްފައިވަނީ އިނގިރޭސިވިލާތުންނެވެ.
ފަތުރުވެރިކަން ދުވަހަކަށްވުރެ ދުވަހެއް ރަނގަޅުވަމުން އަންނައިރު، ރާއްޖޭގައި އޮޕަރޭޝަނަލް ކެޕޭސިޓީގައި 60,138 އެނދު އެބަހުއްޓެވެ. އޭގެ ތެރޭގައި 168 ރިސޯޓުގެ 41،049 އެނދާއި، 13 ހޮޓެލެއްގެ 1640 އެނދާއި، 886 ގެސްޓްހައުސްއެއްގެ 14,310 އެނދު އަދި 154 ސަފާރީއެއްގެ 3139 އެނދު ހިމެނެ އެވެ.
