ފަންނީ ވަޒީފާތަކުގައި އުޅޭ މީހުންނަށާއި މެދުފަންތީގެ އާއިލާތަކަށް އަމާޒުކޮށްގެން ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ވިނަރެސް ފުލެޓުތައް ގަތުމަށް ޝަރުތު ހަމަވާ މީހުންގެ ތެރެއިން ޕޮއިންޓު ހަމަހަމަވި މީހުންގެ މެދުގައި ބާއްވާ ގުރުއަތުލުން އަންނަ ބުދަ ދުވަހު ބޭއްވުމަށް ހަމަޖެހިފައިވާ ކަމަށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީއިން) ބުނެފި އެވެ.
އެ ކުންފުނިން މިއަދު ނެރުނު ބަޔާނެއްގައި ބުނެފައިވަނީ މިދިޔަ މަހު ހައުސިން މިނިސްޓްރީން މުރާޖައުކޮށް އިއުލާންކުރި ލިސްޓުގައިވާ ފަރާތްތަކަށް އެ މިނިސްޓްރީގެ މިންގަޑުގެ ދަށުން ޕޮއިންޓު ދިންއިރު އެއްވަރުވި ފަރާތްތަކުގެ ތަރުތީބު ކަނޑައެޅޭނީ ގުރުއަތުލައިގެން ކަމަށެވެ. އަދި، އެ ގުރުއަތުލުން މި މަހުގެ 29 ގައި އެ ކުންފުނިން ކުރިއަށް ގެންދާނެ ކަމަށްވެސް އެޗްޑީސީއިން ވަނީ ބުނެފަ އެވެ.
މީގެއިތުރުން، ލިސްޓުގައި ހިމެނުނު މީހުންގެ ތެރެއިން މައި-އެޕްލިކަންޓު އަދި ކޯ-އެޕްލިކަންޓުގެ ގޮތުގައި އެއް ފޯމަށްވުރެ ގިނަ ފޯމު ހުށަހެޅި ފަރާތްތަކާއި ދެމަފަރިން ވަކިން ފޯމު ހުށަހަޅާފައިވާ ފަރާތްތަކުން އެއް އެޕްލިކޭޝަން ކެންސަލް ކުރުމަށް އެދި އެކަމަށް އެއްބަސްވި ފަރާތްތަކުގެ ނަން ލިސްޓުން އުނިކުރެވިފައިވާނެ ކަމަށްވެސް އެޗްޑީސީއިން ވަނީ ބުނެފަ އެވެ.
ތަރުތީބު ކުރުމާއި ލިސްޓު ފައިނަލް ކުރުމުގެ މަރުހަލާއަށްފަހު ދެން މި މަޝްރޫއުގެ ދަށުން ކުރިއަށްދާނީ ބުކިން ފީ ނެގުމާއި އެޕާޓްމަންޓު އިހުތިޔާރުކުރުމުގެ މަސައްކަތެވެ. އެޗްޑީސީއިން ބުނި ގޮތުގައި އެ މަރުހަލާގައި އެ ކުންފުނިން ބަލާނީ ގުރުއަތަށް ފަހު ތަރުތީބު ކުރެވޭ ލިސްޓަށެވެ.
ވިނަރެސް އަކީ އެޗްޑީސީން ލޯނު ނަގައިގެން ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) އާ ހަވާލުކޮށްގެން ހިންގި މަޝްރޫއެކެވެ.
އެ ޓަވަރުތަކުގައި ހުންނަނީ މުޅިން ވެސް ތިން ކޮޓަރީގެ އެޕާޓްމަންޓެވެ. އެގޮތުން ޖުމްލަ 1344 އެޕާޓްމަންޓު ހުރެ އެވެ. "މިކްސްޑް ރެސިޑެންޝަލް ކޮމްޕްލެކްސް" މޮޑެލްއަށް ތަރައްގީކޮށްފައިވާ މި ފްލެޓުތަކުގައި އެތަނުގައި ދިރިއުޅޭ މީހުންނަށް ބޭނުންވާ އެހެނިހެން ވަސީލަތްތަކާއި މުދަލާއި ހިދުމަތްތައް ފޯރުކޮށްދޭން ވިޔަފާރިތަކަށް ދޫކުރާ ކޮމާޝަލް ޔުނިޓުތައް ވެސް ހުންނާނެ އެވެ.
