އަމީނީ މަގު ތަރައްގީކުރުމަށް ކުރިއަށްގެންދާ މަޝްރޫއުގެ ދަށުން މި ރޯދަ މަހަށް ނިންމާނެ ކަމަށް ބުނި ބައިގާ ދެން ތާރު އެޅޭނީ އެޕްރީލް މަހުގެ ތެރޭގައި ކަމަށް ޕްލޭނިން މިނިސްޓްރީން ބުނެފި އެވެ.
ޕްލޭނިން މިނިސްޓްރީގެ ދަށުން ހިންގާ މި މަޝްރޫއާ ބެހޭގޮތުން އެ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު" އަށް މިއަދު ވިދާޅުވީ، ރޯދައިގެ ކުރިން އިމާދުއްދީން ސްކޫލާ ހަމާލަށް ތާރުއަޅާ ނިންމަން ބުނި ނަމަވެސް އެ މަސައްކަތް ނިމޭނެ ކަމަށް މިހާރު ބެލެވެނީ އެޕްރީލް މަހުގެ ތެރޭގައި ކަމަށެވެ. ނަމަވެސް، ވަކި ތާރީހެއް އަކްރަމް ނުދެއްވަ އެވެ.
އަމީނީ މަގުގެ މަޝްރޫއުގެ ދަށުން މަގުގައި ތާރުއެޅުމަށް ގެނައި މެޝިންތައް ބަހައްޓާނެ ބިން ނުލިބުމުގެ ސަބަބުން އެ މަސައްކަތް ލަސްވެ އެ މަގުގެ ފުރަތަމަ ތިން ސެގްމެންޓުގައި ތާރު އެޅީ މަސައްކަތް އަވަސް ކުރުމަށް އާރުޑީސީއިން އެމްޓީސީސީއާ ހަވާލުކޮށްގެންނެވެ.
އެ މަސައްކަތް އެމްޓީސީސީން ފެބްރުއަރީ 14 ގައި ނިންމާލީ ފަސް ގަޑިއިރުންނެވެ. އެ ރޭ މީޑިއާތަކާ ވާހަކަ ދައްކަވަމުން އެމްޓީސީސީގެ ޖެނެރަލް މެނޭޖަރު ރަމްޒީ އަބޫބަކުރު ވެސް ވަނީ ރޯދައިގެ ކުރިން ފުުރުގާން މިސްކިތާ ހަމައަށް ތާރު އަޅާ ނިމޭނެ ކަމަށް ވިދާޅުވެފަ އެވެ.
އަމީނި މަގު ޒަމާނީ ފެންވަރަށް ތަރައްގީކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ.
ނަމަވެސް އެ މުއްދަތަށް މަސައްކަތް ނުނިމޭނެ ކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް މިދިޔަ މަހު މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ. ފުރަތަމަ ތާރުއަޅާ ނިންމި އަމީނީ މަގުގެ ފުރަތަމަ ތިން ސެގްމެންޓު އާންމުންނަށް ހުޅުވާލީ މި މަހު 6 ގަ އެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
