ރޯދަ މަހުގެ ފުރަތަމަ ދުވަހާ ހިލާފަށް މިއަދު ތޮއްޑޫ ކަރާ ބާޒާރުގައި ތިޔާގިވެއްޖެ އެވެ. ހުރިހާ ގޮޅިތައެއްގައި ވެސް ވަރުވަރުން އަތުރާފައި ހުއްޓެވެ. އެހެނަސް އަގަކަށް ބަދަލެއް ނާދެ އެވެ. ރޯދައިގެ ފުރަތަމަ ދުވަހުވެސް މިއަދުވެސް ތޮއްޑޫ ކަރަލުގެ އަގު ހުރީ ކިލޯއެއް 30ރ. އަށެވެ.
"މިއަދު ވެސް ގެނައި ތޮއްޑޫއިން ކަރާ، އިއްޔެ ވެސް، އެކަމަކު އަހަރުމެންނަށް ގަންނަން ލިބޭ އަގަށް ފައިދާއެއް ލާފައިތާ ވިއްކޭނީ، އެމީހުން އަގު ކިޔަނީ 25ރ. އަށް 26ރ. އަށް،" ބާޒާރުގައި ގޮޅިއެއް ހިންގާ، ސީދިބޭ ބުންޏެވެ.
ތޮއްޑޫއިން މާލެއަށް ގެނައި ކަރާ، ކިރާފައި ބާލަނީ -- ފޮޓޯ: މުހައްމަދު ޝާބިން / އަދަދު
ރޯދަ މަހުގެ ހަމަ ކޮންމެ ދުވަހަކު ވެސް ތޮއްޑޫއިން މާލެއަށް ކަރާ ގެނެ އެވެ. ނަމަވެސް އާންމުކޮށް ތޮއްޑޫ ކަރާގެ އަގު ހެޔޮ ވަނީ ރޯދައިގެ ފުރަތަމަ ހަފުތާ ނިމުމުން ކަމަށް އެހެން ގޮޅިއެއްގައި މަސައްކަތް ކުރާ ބިދޭސީއަކު ބުންޏެވެ.
ކަރާގެ އަގު އެކަންޏެއް ނޫނެވެ. އެހެން ގިނަ އެއްޗެތީގެ އަގަކަށް ވެސް މާބޮޑު ބަދަލެއް ނާދެ އެވެ. ގިނަ ތަކެތީގެ އަގު އެއްވަރެއްގައި ހިފަހައްޓާފައި ހުރިއިރު، ފޭރާއި ދޮންކެޔޮ ފިޔަވައި އަގު ބޮޑުވި އެއްޗެއް ފާހަގައެއް ނުވެ އެވެ. އާދައިގެ ދޮންކެޔޮ ކިލޯއެއްގެ އަގު ހުރީ 65ރ. އަށެވެ. ފޭރު ކިލޯއެއްގެ އަގު ބޮޑުވީ 80ރ. އިން 85ރ. އަށެވެ.
އެހެނަސް ކުއްޅަފިލާ ފަތާއި ކޮޕީފަތް ބޮނޑިއަކުން ފަސް ރުފިޔާ ވީ އަގު ހެވެވެ. ކުރުނބާ، ގަބުޅިކާށީގެ އަގުތަކަށް އެއްވެސް ބަދަލެއް ނާދެ އެވެ. އެހެނަސް ކުރިއަށް އޮތް ދެދުވަހެއްގެ ތެރޭގައި އާ، ރީތި ކުރުނބާ ލިބޭނެ ކަމަށް ވިޔަފާރިވެރިން ބުންޏެވެ.
ބެލެވުނު ގޮތާ ހިލާފަށް ކަނޑޫދޫ މިރުހުގެ އަގު ބޮޑެއް ނުވި އެވެ. އެ ރަށު ދަނޑުވެރިން ހެއްދި މިރުސްކޮޅު މާލެއާ ހަމައަށް މިއަދު ވާސިލުވުމާ އެކު ކުރިން ގެނެސްފައި ހުރި މިރުސްކޮޅު ވިއްކާލުމަށް އަގު ހެޔޮ ކުރީ އެވެ. މިދިޔަ ރޯދައަށް ގެނައި މިރުހުގެ އަގު ހުރީ 150ރ. އަށް ކިލޯއެކެވެ. މިއަދުގެ މިރުސް ކިލޯއެއް ހުރީ 350ރ. އަށެވެ.
މަސްމާރުކޭޓަށް އެކިވައްތަރުން ފުދޭވަރަށް މަސްވެރިން މަސް އަރުވާފައި އެބަ އޮތެވެ. ދިވެހި ކަނޑުމަހުގެ އަގު ބޮޑުތަނުން ކުޑަ އެވެ. ފަސްރޮނގުދެމި ކަޅުބިލަމަސް ކިލޯއެއްގެ އަގު އުޅެނީ 30ރ. އަށެވެ. ކަންނެލި ކިލޯއެއް 25ރ. އަށް ވެސް ދީފާނެ ކަމަށް މަސްވެރިން ބުންޏެވެ.
މަސްދޯނިފަހަރުން މާލެއަށް މަސް ބާލަނީ -- ފޮޓޯ: އަދަދު
މާނިޔަ މަހުގެ އިތުރުން ވަގުތުން ފިހެލެވޭ ގޮތަށް ތައްޔާރު ކޮށްފައި ހުރި ރަތްމަހާއި ގިނިމަހުގެ އިތުރުން މުޑަހަނދި ވެސް ހުއްޓެވެ. ޅިޔަ ޖަހައި ތައްޔާރުކޮށްފައި ހުރި ބޮޑު ހަންޖެއް ވެސް މާނިޔާ މަހެއް ވެސް އުޅެނީ 100ރ. އަށެވެ. ހެޔޮވަރުގެ ފަލަ ރަތްމަހެއްގެ އަގު ހުރީ 300ރ. އަށެވެ.
މިއަދު ވެސް ތެލު އަޅާލައިގެން ކާ ސައިޒުގެ މުށިމަހާއި ރިއްމަހުގެ އިތުރުން ރެއްސާއި ކުދި މުގުރާން ވެސް ވިއްކަން އެބަހުއްޓެވެ. ރެހި ޖޯޑެއްގެ އަގު 10ރ. އަށް ހުރިއިރު، ކުދި މުށިމަސް ވިއްކަނީ ރުފިޔާއެއްގެ މަގުންނެވެ. ތަންފުކެއް ބޮޑެތި މުށިމަސް ހުރީ 20ރ. އަށް 15 މަހެވެ. އެއަށްވުރެެ ބޮޑުނަމަ، 20ރ. އަށް 4 މަހެވެ.
ބާޒާރުމަތީގައި މިއަދު މީގެ ކުރީ ދެދުވަހަށްވުރެ މީހުންގެ ބާރު ބޮޑެވެ. ވިޔަފާރިވެރިން ބުނަނީ މި ހަފުތާ ނިމި އާ ހަފުތާއަށް ފެށޭއިރު، އަގުތައް މިއަށްވުރެ ހެޔޮވާނެ ކަމަށެވެ.
