މެންޗެސްޓާ (މާޗް 23) - މެންޗެސްޓާ ޔުނައިޓެޑްގެ ވެރިންގެ ގޮތުގައި ތިބި އެމެރިކާގެ މަހުޖަނުން ކަމަށްވާ ގްލޭޒާ އާއިލާ އިން އެ ކްލަބް ވިއްކާލަން ކިޔާ އަގަކީ 7.3 ބިލިއަން ޑޮލަރު ކަމަށް މީޑިއާ ރިޕޯޓްތައް ބުނެފި އެވެ.
ޔުނައިޓެޑް ގަންނަން ބިޑް ކުރަން ދިން ފުރުސަތު އަނެއްކާ ވެސް އިތުރުކޮށްދީފައިވާއިރު، އިނގިރޭސި ބިލިއަނަރު ޖިމް ރެޓްކްލިފް އާއި ގަތަރުގެ ބޭންކް، ކިއުއައިބީގެ ޗެއާމަން، ޝެއިހް ޖަސީމް ބިން ހަމަދު އަލް ތާނީ ވެސް އެންމެ ފުރަތަމަ ހުށަހެޅި ބިޑް އިތުރު ކުރަން ވަނީ ނިންމައިފަ އެވެ.
އަނެއްކާ ވެސް ބިޑް ކުރަން ދިން ފުރުސަތުގެ މުއްދަތު އިތުރުކުރަން ނިންމާފައިވަނީ ކޮން ތާރީހެއްގެ ނިޔަލަށް ކަމެއް ސާފެއް ނުވެ އެވެ. މީޑިއާ ރިޕޯޓްތައް ބުނާގޮތުން ގްލޭޒާ އާއިލާ އިން ޔުނައިޓެޑް ވިއްކާލަން ކިޔާ އަގު އުޅެނީ 7.3 ބިލިއަން ޑޮލަރުގަ އެވެ. މިއީ މިހާތަނަށް ކްލަބެއް ވިއްކާލަން ކިޔާފައިވާ އެންމެ ބޮޑު އަގެވެ. މީގެ ކުރިން އެންމެ އަގުބޮޑުކޮށް ނިމުނު އިނގިރޭސި ކްލަބްގެ ޑީލަކީ އެމެރިކާގެ މަހުޖަނު ޓޮޑް ބޯލީ 5.2 ބިލިއަން ޑޮލަރަށް ޗެލްސީ ގަތުމެވެ.
ގަތަރުގެ ނުފޫޒު ގަދަ ފަރާތްތަކުގެ ތެރޭގައި ހިމެނޭ، ޝެއިހް ޖަސީމް ބިޑް ކޮށްފައިވަނީ އޭނާގެ ނައިންޓޫ ފައުންޑޭޝަން ކުންފުނީގެ ފަރާތުންނެވެ. ޖަސީމްގެ ވިސްނުމަކީ ޔުނައިޓެޑްގެ ދަރަނީގެ ގޮތުގައި މި ވަގުތު އޮތް 620 މިލިއަން ޑޮލަރު އެއްކޮށް އަދާކުރުމަށް ފަހު، އެ ކްލަބް ކުރިން އޮތް ލެވަލަށް ދެވޭނެ ވަރަށް ކްލަބަށް އިންވެސްޓް ކުރުން ކަމަށެވެ. އަދި ޖަސީމްގެ ބިޑްގެ ޖުމްލަ އަގަކީ ފަސް ބިލިއަން ޑޮލަރު ކަމަށްވާއިރު، އޭނާ ބޭނުންވަނީ މެޖޯރިޓީ ހިއްސާދާރަކަށް ވުމަށް ފަހު، ޔުނައިޓެޑްގެ އަންހެން އަދި ފިރިހެން ޓީމު ވެސް އެންމެ މަތީ ލެވަލްގައި ބޭއްވޭ ވަަރަށް އިންވެސްޓް ކުރުމަށެވެ.
ޔުނައިޓެޑްގެ ސަޕޯޓަރެއްގެ ގޮތުގައި މަޝްހޫރުވެފައިވާ ރެޓްކްލިފް ބޭނުންވަނީ ގްލޭޒާ އާއިލާގެ 69 ޕަސެންޓް ހިއްސާ އެވެ. އަދި އެ ހިއްސާ ގަތުމަށް ފަހު، ގްލޭޒާ އާއިލާ އިން ކްލަބް ހިންގަމުން އައި މޮޑެލް ބަދަލުކޮށް، ވީހާވެސް ބޮޑަށް ސަޕޯޓަރުން ބޭނުންވާ ގޮތަށް ކްލަބްގެ ކަންކަން ކުރިއަށް ގެންދިއުމަކީ ރެޓްކްލިފްގެ ވިސްނުމެކެވެ. އެކަމަކު، ޝެއިހް ޖަސީމްގެ ބިޑާ އެއްވަރުގެ އަގެއް ޔުނައިޓެޑް ގަންނަން ހުށަހަޅަން ރެޓްކްލިފް ބޭނުންނުވާ ކަމަށް މީޑިއާ ރިޕޯޓްތައް ބުނެ އެވެ.
