ވާރޭ ނުވެހި ގިނަ ދުވަސްވެ، މިދިޔަ އަހަރު ސޯމާލިއާގައި 43،000 މީހުން މަރުވެފައިވުން އެކަށީގެންވާ ކަމަށް ސޯމާލިއާ ސަރުކާރާއި އދ. ގުޅިގެން ނެރުނު ރިޕޯޓެއްގައި ބުނެފި އެވެ.
"ހޯން އޮފް އެފްރިކާ" ނުވަތަ އެފްރިކާ ބައްރުގެ އިރުމަތީ ހިސާބަށް ކުރިމަތިވެފައިވާ ވާރޭ ނުވެހުމުގެ މައްސަލައާ ގުޅިގެން މަރުވެފައިވާ މީހުންގެ އަންދާޒާއެއް މީގެ ކުރިން ނެތެވެ.
ސާޅީސް ތިން ހާސް މީހުން މަރުވެފައިވުން އެކަށީގެންވާ ކަމަށް ރިޕޯޓުގައި ބުނާ އިރު، އޭގެ 50 ޕަސެންޓަކީ އުމުރުން ފަސް އަހަރުން ދަށުގެ ކުޑަކުދިން ކަމަށް ބެލެވެ އެވެ.
ރިޕޯޓުގައި ބުނީ މި އަހަރުގެ ފުރަތަމަ ހަ މަހުގެ ތެރޭގައި 18،000 އާއި 34،000 އާ ދެމެދުގެ އަދަދަކަށް މީހުން މަރުވުން އެކަށީގެންވާ ކަމަށެވެ.
މީގެ ކުރިން 2021 ވަނަ އަހަރު ސޯމާލިއާއަށް ކުރިމަތިވި ބަނޑުހައި ހޫނުކަމުގައި 300،000 އަށް ވުރެ ގިނަ މީހުން މަރުވި އެވެ.
އދ. އިން ބުނީ ވާރޭ ނުވެހޭ މައްސަލައިގައި ސޯމާލިއާއަށް ބޭނުންވާ އެހީ ފޯރުކޮށްދިނުމަށް މި އަހަރު އެކަަނިވެސް 2.6 ބިލިއަން ޑޮލަރު ބޭނުންވާ ކަމަށެވެ. މިހާތަނަށް ހޯދުނީ އޭގެ 15 ޕަސެންޓެވެ.
މި ކާރިސާގައި ފެނަށް ޖެހި، ދަނޑުގައި ގެންގުޅޭ އެތައް މިލިއަން ޖަނަވާރު ވެސް މަރުވެފައިވެ އެވެ. އެހީ ފޯރުކޮށްދިނުމަށް ހުރަސް އެޅޭ އެންމެ ބޮޑު އެއް ސަބަބަކީ ސޯމާލިއާގެ ދާހިލީ ހަމަނުޖެހުމެވެ.
އެގޮތުން އަލް ގައިދާއާ ގުޅުން އޮންނަ އަލް ޝަބާބުން ކޮންޓްރޯލް ކުރާ ހިސާބުތަކަށް އެހީ ފޯރުކޮށްދޭން އުނދަގުލެވެ. އެ ގްރޫޕުން ދޭތެރެ ދޭތެރެއިން ސޯމާލިއާގއި ބޮޑެތި ހަމަލާތައްދެ އެވެ.
