އެމްޑީޕީގެ ރައީސް މުހައްމަދު ނަޝީދު އެ ޕާޓީގެ ތެރޭގައި ވަކި ފެކްޝަނެއް ހައްދަވައިގެން، ޕާޓީގެ ރިޔާސީ ކެންޑިޑޭޓާ ދެކޮޅަށް ކުރައްވާ މަސައްކަތާމެދު މިހާތަނަށް ފިޔަވަޅެއް އަޅާފައި ނުވަނީ ނަޝީދަށް ކުރައްވާ އިހުތިރާމުގެ ސަބަބުން ކަމަށް އެ ޕާޓީގެ ޗެއާޕާސަން ފައްޔާޒު އިސްމާއިލު ވިދާޅުވެއްޖެ އެވެ.
ރިޔާސީ އިންތިހާބަށް އެމްޑީޕީއާއެކު ކޯލިޝަން ހަދާފައިވާ އަދާލަތު ޕާޓީ އާއި އެމްޑީއޭއާއެކު އަންގާރަ ދުވަހު މުލިއާގޭގައި ކުރިއަށް ގެންދިޔަ މަޝްވަރާ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ފައްޔާޒު ވިދާޅުވީ، ނަޝީދަކީ އެ ޕާޓީ އުފެއްދުމުގައި އަދި ރާއްޖެއަށް ޑިމޮކްރަސީ ގެނައުމުގައި އިސް ރޯލެއް އަދާކުރެއްވި ބޭފުޅެއްކަން އެމްޑީޕީއިން އަދިވެސް ބަލައިގަންނަ ކަމަށެވެ.
ނަޝީދުގެ އަމަލުތަކާމެދު އެމްޑީޕީއިން މިހާތަނަށް ފިޔަވަޅެއް އަޅާފަ ނުވާ ސަބަބުވެސް ފައްޔާޒު ވަނީ އިއްޔެ ބަޔާންކޮށްދީފަ އެވެ.
"އަޅުގަނޑުމެންގެ އިހުތިރާމު ރައީސް ނަޝީދަށް އެގޮތަށް ދިނުމުގެ ގޮތުން އަޅުގަނޑުމެން އަދި ބައެއް ފަހަރު ފަހަތަށް ޖެހިލައިގެން މި ތިބެނީ، ކަންބޮޑުވެގެނެއްވެސް ނޫން ބިރަކުންވެސް ނޫން، އަޅުގަނޑުމެން އަޅަންޖެހިއްޖެ ފިޔަވަޅެއް އެ ހާލަތަކަށް ގޮސްފި ކަމަށް ވެއްޖިއްޔާ ކޮންމެ ބޭފުޅަކާ ދޭތެރޭވެސް އަޅާނަން," ފައްޔާޒު ވިދާޅުވި އެވެ.
ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީގައި ނާކާމިޔާބު ވެވަޑައިގެންނެވި ފަހުން ނަޝީދު ވަނީ އެމްޑީޕީގެ ތެރޭގައި ވަކި ފެކްޝަނެއް އުފައްދަވާފަ އެވެ. އަދި އެ ފެކްޝަނުގެ ތާއީދު ރައީސް އިބްރާހިމް މުހައްމަދު ސޯލިހަށް ނުލިބޭނެ ކަމަށް ވެސް ނަޝީދު ވަނީ ތަކުރާރުކޮށް ވިދާޅުވެފަ އެވެ.
އޭގެ އިތުރުން، ކުރިއަށް އޮތް އިންތިހާބުގައި އެ ފެކްޝަނުން ތާއީދުކުރާނެ ކެންޑިޑޭޓެއް އިއުލާނުކުރާނެ ކަމަށް ވެސް ރައްޔިތުން މަޖިލީހުގެ ރައީސްގެ މަގާމުގައި ވެސް ހުންނެވި ނަޝީދު ވަނީ ވިދާޅުވެފަ އެވެ. ނަޝީދުގެ ފެކްޝަނުން މިހާރު އަންނަނީ ކުރިއަށް އޮތް އިންތިހާބުގައި ޖުމްހޫރީ ޕާޓީއާއެކު މަސައްކަތް ކުރުމަށް މަޝްވަރާ ކުރަމުންނެވެ. ޖޭޕީއިން ވަނީ ރިޔާސީ އިންތިހާބުގައި ރައީސް ސޯލިހާއެކު ކޯލިޝަން ނުހަދައި އެ ޕާޓީއިން ކެންޑިޑޭޓަކު ނެރުމަށް ނިންމާފަ އެވެ.
