އެމްޑީޕީގެ ރައީސް މުހައްމަދު ނަޝީދުގެ ތާއީދާ ނުލާވެސް، އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު، ކުރިއަށް އޮތް ރިޔާސީ އިންތިހާބު އެއްބުރުން ކާމިޔާބު ކުރައްވާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލު ވިދާޅުވެއްޖެ އެވެ.
ރިޔާސީ އިންތިހާބަށް އެމްޑީޕީއާއެކު ކޯލިޝަން ހަދާފައިވާ އަދާލަތު ޕާޓީއާއި އެމްޑީއޭ އާއެކު މިއަދު މުލިއާގޭގައި ކުރިއަށް ގެންދިޔަ މަޝްވަރާ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ފައްޔާޒު ވިދާޅުވީ، ރައީސް ސޯލިހަށް އަދި އެމްޑީޕީއަށް ނަޝީދުގެ ތާއީދު ވަރަށް ބޭނުންތެރި ކަމަށެވެ.
ނަމަވެސް ނަޝީދުގެ ތާއީދާ ނުލާވެސް ރައީސް ސޯލިހަށް އިންތިހާބު ކާމިޔާބުކުރެއްވޭނެ ކަމުގެ ޔަގީންކަން އެބައޮތް ކަމަށް ފައްޔާޒު ވިދާޅުވި އެވެ.
"އެ (ނަޝީދުގެ ތާއީދު) ނުލިބިއްޖެ ކަމަށް ވިޔަސް އަޅުގަނޑުމެން އިންތިހާބު ކާމިޔާބުކުރާނަން، އަޅުގަނޑުމެން ބޭނުންވަނީ ރައީސް ނަޝީދާވެސް އެއްކޮށްގޮސް އިންތިހާބު ކާމިޔާބުކުރަން،" ފައްޔާޒު ވިދާޅުވި އެވެ.
ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީގައި ނާކާމިޔާބު ވެވަޑައިގަތުމަށްފަހު ނަޝީދު ވަނީ އެމްޑީޕީގެ ތެރޭގައި ވަކި ފެކްޝަނެއް އުފައްދަވާފަ އެވެ. އަދި އެ ފެކްޝަނުގެ ތާއީދު ރައީސް ސޯލިހަށް ނުލިބޭނެ ކަމަށްވެސް ނަޝީދު ވަނީ ތަކުރާރުކޮށް ވިދާޅުވެފަ އެވެ.
އަދި، ކުރިއަށް އޮތް އިންތިހާބުގައި އެ ފެކްޝަނުން ތާއީދުކުރާނެ ކެންޑިޑޭޓެއް އިއުލާނުކުރާނެ ކަމަށްވެސް ރައްޔިތުން މަޖިލީހުގެ ރައީސްގެ މަގާމުގައިވެސް ހުންނެވި ނަޝީދު ވަނީ ވިދާޅުވެފަ އެވެ. ނަޝީދުގެ ފެކްޝަނުން މިހާރު އަންނަނީ ކުރިއަށް އޮތް އިންތިހާބުގައި ޖުމްހުރީ ޕާޓީއާއެކު މަސައްކަތް ކުރުމަށް މަޝްވަރާ ކުރަމުންނެވެ. ޖޭޕީއިން ވަނީ ރިޔާސީ އިންތިހާބުގައި ރައީސް ސޯލިހާއެކު ކޯލިޝަން ނުހަދައި އެ ޕާޓީއިން ކެންޑިޑޭޓަކު ނެރުމަށް ނިންމާފަ އެވެ.
ނަޝީދުގެ ތާއީދު އެހެން ކެންޑިޑޭޓަކަށް ލިބުމާމެދު ދެކޭގޮތް ހިއްސާކުރައްވަމުން ފައްޔާޒު ވިދާޅުވީ، ނަޝީދަށް އަދި އެމަނިކުފާނާއެކު ތިބި އެމްޑީޕީގެ މެންބަރުންނަށް ދަންނަވަން ބޭނުންވަނީ ބާކީ ނުވުމަށް ކަމަށެވެ. އަދި ޕާޓީގެ ތެރޭގައި އުފެދިފައިވާ ހިޔާލުތަފާތުވުންތަކަށް އަދިވެސް ކޮންމެވެސް ވަރެއްގެ ހައްލެއް ހޯދޭނެ ކަމަށްވެސް ފައްޔާޒު ވިދާޅުވި އެވެ.
"އެންމެން ބޭނުންވާ ހުރިހާ ކަމެއް ހާސިލް ނުވެދާނެ، ދެމީހުންނަށް އެއްފަހަރަކާ ވެރިކަމެއް ނުކުރެވޭނެ، އެހެންވީމާ އެކަންކަމަށް ވިސްނާވަޑައިގެން އަޅުގަނޑުމެން ދިވެހިރާއްޖެއާއި ދިވެހި ގައުމާއި، ދިވެހި ރައްޔިތުންނަށްޓަކާ ކުރިއަށް ދެވޭނެ ގޮތެއް ހޯދަން އެބަޖެހޭ،" އޭނާ ވިދާޅުވި އެވެ.
ފައްޔާޒު ވިދާޅުވީ ޕާޓީގެ ތެރޭގައި އޮތް ހިޔާލުތަފާތުވުންތަކާމެދު ކަންބޮޑުވެވަޑައިނުގަންނަވާ ކަމަށާއި ފިޔަވަޅު އެޅުންފަދަ ކަންކަމަކީ އެހާބޮޑަށް ވިސްނާ ކަމެއް ނޫން ކަމަށެވެ.
