މި ވަގުތު ރަޝިއާގައި ހުންނެވި ޗައިނާގެ ރައީސް ޝީ ޖިންޕިން، "ޔޫކްރެއިންގައި ހިންގަމުންދާ ހަނގުރާމައިގެ ޖަރީމާތައް ހުއްޓާލަން" ރަޝިއާގެ ރައީސް ލެޑިމިއަ ޕުޓިންއަށް ޕްރެޝަރު ކުރަން އެމެރިކާއިން ގޮވާލައިފި އެވެ.
ޝީ މޮސްކޯއަށް ވަޑައިގެންނެވީ ހޯމަ ދުވަހު އެވެ. ޝީ އާއި ޕުޓިންގެ ބައްދަލުވުމެއް ހޯމަ ދުވަހު އޮތެވެ. އަންގާރަ ދުވަހު އޮންނާނީ ދެ ލީޑަރުންގެ މެދުގައި ބާއްވާ ރަސްމީ މަޝްވަރާތަކެވެ. މިއީ ޔޫކްރެއިން ހަނގުރާމަ ފެށި ފަހުން ޝީ ރަޝިއާއަށް ކުރައްވާ ފުރަތަމަ ދަތުރެވެ.
ވައިޓް ހައުސްގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު ޖޯން ކާބީ، ޝީއަށް ގޮވާލެއްވީ ޕުޓިންއަށް ޕްރެޝަރުކޮށް، ރަޝިއާ ސިފައިން ޔޫކްރެއިނުން ގެންދިޔުމަށެވެ. އޭނާ ވިދާޅުވީ ހަނގުރާމައަށް ވަގުތީ ސުލްހައެއް ގެންނަން މަސައްކަތް ކުރުމުން ނުފުދޭ ކަމަށެވެ.
"އަޅުގަނޑުމެން ކަންބޮޑުވަނީ ޗައިނާއިން ވަގުތީ ސުލްހައަކަށް ބާރުއަޅައި، ރަޝިއާގެ ސިފައިން ޔޫކްރެއިންގެ ބިމުގެ ސަރަހައްދުގައި ތިބެން ފުރުސަތު ލިބިދާނެތީ،" އޭނާ ވިދާޅުވި އެވެ.
ޗައިނާގެ ރައީސް މި ވަގުތު ރަޝިއާގައި ހުންނެވި އިރު، ރިޕޯޓުތައް ބުނާ ގޮތުން ޖަޕާނުގެ ބޮޑު ވަޒީރު ފުމިއޯ ކިޝީޑާ ޔޫކްރެއިނަށް ދަތުރު ކުރައްވައި އެ ގައުމުގެ ރައީސް ވޮލޮޑިމިރް ޒެލެންސްކީއާ ބައްދަލުކުރަން ވަނީ ނިންމަވައިފަ އެވެ.
ޖަޕާނާއި ޗައިނާއަކީ އިރުމަތީ އޭޝިއާގައި ވާދަވެރި ދެ ގައުމެވެ. ޔޫކްރެއިން ހަނގުރާމަ ފެށި ފަހުން ޖަޕާނުން ވަނީ ޔޫކްރެއިނަށް ގިނަ އަދަދެއްގެ އިންސާނީ އެހީ އާއި މާލީ އެހީ ފޯރުކޮށްދީފަ އެވެ.
