އެމްއާރުއެމް ގެ އިސްވެރިން މިއަދު ޖުމްހުރީ ޕާޓީގެ ލީޑަރު ގާސިމް އިބްރާހިމާ ބައްދަލުކުރެއްވީ ގާސިމްގެ ދައުވަތަކަށް ކަމަށާއި އޭނާ ހުށަހެޅުއްވީ ރިޔާސީ އިންތިހާބުގައި މި ސަރުކާރާ ނުގުޅި ޖޭޕީއާއެކު ކޯލިޝަން ހެދުމަށް ކަމަށް އެމްއާރުއެމްގެ ރައީސް އަހުމަދު ފާރިސް މައުމޫން ވިދާޅުވެއްޖެ އެވެ.
މިއަދުގެ ބައްދަލުވުމާ ގުޅޭ ގޮތުން ވާހަކަ ދައްކަވަމުން ފާރިސް "އަދަދު" އަށް ވިދާޅުވީ، މިއަދުގެ ބައްދަލުވުމުގައި ގާސިމް ވަނީ މި މަހުގެ ތެރޭގައި ޖޭޕީގެ ކައުންސިލުން ރިޔާސީ އިންތިހާބުގާ ކެންޑިޑޭޓަކު ނެރެން ނިންމި ނިންމުން ހިއްސާކުރައްވާފަ ކަމަށެވެ.
"އެއާއެކު އެހެން ޕާޓީތަކާ އެކީ މަސައްކަތް ކުރުމުގެ ފުރުސަތެއް އޮތްތޯ ބެއްލެވުމުގެ މަސްއޫލިއްޔަތުވެސް އޮނޮރަބަލް ގާސިމްއާ ހަވާލުކުރައްވާފަ އޮތް ކަމަށް ވިދާޅުވި، އެއީ ކޯލިޝަނެއް އުފެއްދުން ކަމުގަ ވީ ނަމަވެސް، ދެން އެކަމުގަ އެމްއާރުއެމްގެ ޒައީމާއި އަޅުގަނޑާ އެކު ބައްދަލުކުރެއްވީ،" ފާރިސް ވިދާޅުވި އެވެ.
އަދި، ގާސިމްގެ ދައުވަތު ގަބޫލުކޮށް އެމްއާރުއެމްއިން އެމަނިކުފާނާ ބައްދަލުކުރީ ރިޔާސީ އިންތިހާބުގައި ޖޭޕީއާއެކު މަސައްކަތް ކުރުމުގެ ފުރުސަތެއް އޮތްތޯ ބެލުމަށް ކަމަށްވެސް ފާރިސް ވިދާޅުވި އެވެ.
"މިހާރު މި ހިނގަމުންދާ ކޯލިޝަނުގެ ތަޖުރިބާތަކާ ބެހޭގޮތުން ވެސް ވާހަކަ ދެކެވުނު [މިއަދުގެ ބައްދަލުވުމުގައި] ވަކި ގޮތަކަށް ނިންމިފައެއް ނުވޭ، އެބޭފުޅުންވެސް އެއްބަސްވެލެއްވި ގޮތަކަށް ނިންމޭނީ އިތުރަށް މަޝްވަރާކޮށްގެން ކަމަށް"
ފާރިސް ވިދާޅުވީ ޖޭޕީއާއެކު އެ ޕާޓީއިން އިތުރު މަޝްވަރާތަކެއް ކުރާނެ ކަމަށެވެ. އެގޮތުން، ދެ ޕާޓީގެ ވިސްނުން ހުރި ގޮތް ބަލާ، ގައުމަށް ގެންނަންޖެހޭ އިސްލާހުތަކާ މެދު ތަފުސީލުކޮށް މަޝްވަރާކޮށްފައި އެ ދެ ޕާޓީއިން އެކުގައި މަސައްކަތް ކުރުމާ މެދު ގޮތެއް ނިންމާނެ ކަމަށް ވެސް ފާރިސް ވިދާޅުވި އެވެ.
ރައީސް ސޯލިހާ ވާދަކޮށް އެމްޑީޕީގެ ރިޔާސީ ޕްރައިމަރީއިން ބަލިވެވަޑައިގެން ރައްޔިތުން މަޖިލީހުގެ ރައީސް މުހައްމަދު ނަޝީދު ވަނީ އެމްޑީޕީގެ ތެރޭގައި ވަކި ފެކްޝަނެއް އުފައްދާ އެ ފެކްޝަނުން ރައީސް ސޯލިހަށް ތާއީދު ނުކުރާނެ ކަމަށް ވިދާޅުވެފަ އެވެ. އަދި، ނަޝީދުވެސް ޖޭޕީއާ އެކު މަސައްކަތް ކުރުމަށް ދަނީ މަޝްވަރާކުރަމުންނެވެ.
ނަޝީދާއެކު ޖޭޕީއިން މަސައްކަތް ކުރަން ނިންމައިފި ހާލަތެއްގައި އެމްއާރުއެމްގެ ސްޓޭންޑަށް ބަދަލެއް އަންނާނެތޯ "އަދަދު" އިން ސުވާލު ކުރުމުން ފާރިސް ވިދާޅުވީ، ވަކި ސިޔާސީ ލީޑަރެއް ނުވަތަ ސިޔާސީ ޕާޓީއަކާއެކު މަސައްކަތް ނުކުރާނެ ކަމަށް ވިދާޅުވާން މި ދަނޑިވަޅުގައި ދަތި ކަމަށާއި އެ ޕާޓީއިން އަބަދުވެސް ބަލާނީ ގައުމަށް ހެޔޮއެދޭ ގޮތް ކަމަށެވެ.
މި ސަރުކާރުގެ ކޯލިޝަނުގައި މިހާރުވެސް އޮތް އެމްއާރުއެމް އިން އިއްޔެ ވަނީ އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހާއި އެމްޑީޕީގެ އިސްވެރިންނާ ބައްދަލުކޮށްފަ އެވެ.
ކުރިއަށް އޮތް ރިޔާސީ އިންތިހާބުގައިވެސް އެމްޑީޕީއާއެކު ކޯލިޝަން ހެދުމަށް އެދި ރައީސް ސޯލިހު، އެމްއާރުއެމްގެ ޒައީމް އަދި ކުރީގެ ރައީސް މައުމޫން އަބްދުލްގައްޔޫމަށް ސިޓީފުޅެއް ފޮނުއްވާފައި ވީ ނަމަވެސް އިއްޔެގެ ބައްދަލުވުމުގައި އެކަމާ މެދު އެ ޕާޓީން ގޮތެއް ނިންމާފައި ނުވެ އެވެ.
މިހާރު ސަރުކާރުގެ ކޯލިޝަނުގައި އޮތް ޕާޓީތަކުގެ ތެރެއިން ރައީސް ސޯލިހާއެކު އަންނަ ރިޔާސީ އިންތިހާބަށް ކޯލިޝަން ހަދަން ނިންމާފައިވަނީ އަދާލަތު ޕާޓީއިން އެކަންޏެވެ. ދެން އެ ކޯލިޝަނުގައި އޮތް ޖޭޕީއިން ވަނީ ރައީސާއެކު ކޯލިޝަން ނުހަދާ އަންނަ އިންތިހާބުގައި ވަކިން ނުކުންނަން ނިންމާފަ އެވެ.
