މި މަހު ދެކުނު އެފްރިކާ ސަރަހައްދަށް ކުރިމަތިވި ދެ ވަނަ ތޫފާނުގައި މަލާވީއިން 200 އަށް ވުރެ ގިނަ މީހުން މަރުވެއްޖެ އެވެ.
ތޫފާން ފްރެޑީގެ ސަބަބުން ފެންބޮޑުވެ ގެތައް ބިމާ ހަމަވެފައިވާ އިރު، އެންމެ ގިނައިން މީހުން މަރުވީ މަލާވީގެ ކޮމާޝަލް ސެންޓަރު ބްލެންޓަޔާގަ އެވެ.
މަރުވި މީހުންގެ ތެރޭގައި ގިނަ އަދަދެއްގެ ކުޑަކުދިން ހިމެނެ އެވެ. ފެންބޮޑުވުމުގެ ސަބަބުން މަލާވީގައި ހަލުވިކަމާ އެކު ކޮލެރާ ފެތުރުމުގެ ނުރައްކާ ބޮޑެވެ.
ތޫފާނުގެ އަސަރު އެންމެ ބޮޑަށް ކުރި 10 ޑިސްޓްރިކްޓުގައި ކުއްލި ނުރައްކާ އިއުލާނުކޮށްފައިވާ އިރު، ރެސްކިއު ޓީމުތަކުގައި އެކަށީގެންވާ އަދަދަށް މީހުން ނެތެވެ.
މަރުވެފައިވާ މީހުންގެ ހަށިތައް ގިނަވުމުގެ ސަބަބުން ބްލެންޓަޔާ ސިޓީގެ މައި ހޮސްޕިޓަލަށް ބޮޑު ގޮންޖެހުމަކަށް ވެފައިވާ އިރު، އަނިޔާވެފައިވާ މީހުން ވެސް އެހާ ގިނަ އެވެ.
ހޮސްޕިޓަލުގެ މޯޗަރީ އެއްކޮށް ފުރިފައި ވާތީ އާއިލާތަކުން އަވަހަށް ހަށިތަކާ ހަވާލުވެ ޖަނާޒާގެ ކަންކަން ނިންމުމަށް ހޮސްޕިޓަލުން ވަނީ އެދިފަ އެވެ.
މަލާވީގެ ސަރުކާރުން ބުނީ 20،000 އަށް ވުރެ ގިނަ މީހުން ހާލުގައި ޖެހިފައިވާ ކަމަށެވެ. ބައެއް ހިސާބުތަކުން ކަރަންޓު ކެނޑިފައިވާ އިރު، މަގުތައް ހަލާކުވެ ފެންބޮޑުވުމުގެ ސަބަބުން ނުދެވޭ ހިސާބުތައް ވެސް އެބަ ހުއްޓެވެ.
އެހެންވެ، މަރުވި މީހުންގެ އަދަދު އަދިވެސް އުފުލޭނެ ކަމަށް ލަފާކުރެވެ އެވެ. މަލާވީގެ ސަރުކާރުން ވަނީ ބައިނަލްއަގްވާމީ އެހީއަށް އެދިފަ އެވެ.
ދުނިޔޭގެ މޫސުމާ ބެހޭ ޖަމިއްޔާއިން ބުނީ ފްރެޑީއަކީ މިހާތަނަށް ރިކޯޑް ކުރި އެންމެ ބާރުގަދަ "ޓްރޮޕިކަލް ސައިކްލޯން" ކަމަށެވެ. މިހާރު އެ ތޫފާނުގެ އަސަރު ކުރަނީ މޮޒަމްބީކްއަށެވެ.
ތަޖުރިބާކާރުން ބުނާ ގޮތުގައި "ޓްރޮޕިކަލް" ތޫފާންތަކުން ކުރާ އަސަރު ގޯސްވަމުން ދަނީ މޫސުމީ ބަދަލާ ހެދި އެވެ. އެގޮތުން ތޫފާންތަކުގައި ވާރޭ ވެހޭ މިންވަރާއި ވައި ޖެހޭ މިންވަރު އެތައް ގުނައެއް އިތުރުވަމުންދާ ކަމަށް ތަޖުރިބާކާރުން ބުނެ އެވެ.
ތޫފާން ފްރެޑީ އެފްރިކާ ބައްރާ ހަމައަށް ފޯރީ ހުޅަނގު އުތުރު އޮސްޓްރޭލިއާއިން ފެށިގެން އިންޑިއާ ކަނޑުގައި 8000 ކިލޯމީޓަރު ދަތުރުކޮށްފަ އެވެ. އެފްރިކާގެ އައްސޭރިފަށާ ހަމައަަށް ފޯރި އިރު، ތޫފާނުގެ ބާރު ހުރީ ރެކޯޑު މިންވަރަށް އިތުރުވެފައި ކަމަށް މޫސުމާ ބެހޭ ފަރާތްތަކުން ބުނެ އެވެ.
