މަރުގެ ހުކުމް ތަންފީޒު ކުރާނެ ދުވަހެއްގެ އިންތިޒާރުގައި ގާތްގަނޑަކަށް ބައި ގަރުނު ޖަލުގައި ހުރި ޖަޕާން މީހެއްގެ ޝަރީއަތް އަލުން ހިންގަން ނިންމައިފި އެވެ.
އުމުރުން 87 އަހަރުގެ އިވާއީ ހަކަމާޑާއަކީ މަރުގެ ހުކުމް ތަންފީޒު ކުރާނެ ދުވަހެއްގެ އިންތިޒާރުގައި އެންމެ ގިނަ ދުވަހު ޖަލެއްގައި ހުންނަން ޖެހުނު މީހާ އެވެ.
އޭނާގެ މައްޗަށް 1968 ވަނަ އަހަރު ހުކުމް އިއްވީ 1966 ވަނަ އަހަރު އޭނާއަށް ވަޒީފާ ދިން މީހަކާއި އޭނާގެ އަންހެނުން އަދި ދެ ދަރިން މަރާލި ކަމަށް ސާބިތުވުމުންނެވެ.
ކުރިން ޕްރޮފެޝަނަލް ބޮކްސިން ކުޅުންތެރިއެއްގެ ގޮތުގައި އުޅުނު ހަކަމާޑާ ކުށަށް އިއުތިރާފްވީ ހައްޔަރު ކުރިތާ 20 ދުވަސް ފަހުންނެވެ. ފަހުން ކޯޓުގައި އެ އިއުތިރާފް އަނބުރައި ގެންގޮސް، އޭނާ ބުނީ ތަހުގީގުގެ މަރުހަލާގައި އަނިޔާކުރި ކަމަށެވެ.
އެ މައްސަލައިގެ ޝަރީއަތް އަލުން ހިންގަން ނިންމި އިރު، ފަނޑިޔާރުން ބަލާނީ ގާތިލް ލައިގެން ހުރި ކަމަށް ބެލެވޭ ހެދުމައި ހުރި ލޭގެ ޑީއެންއޭ ހަކަމާޑާގެ ޑީއެންއޭއާ ދިމާވޭތޯ އެވެ.
ހަކަމާޑާގެ ވަކީލުން ބުނާ ގޮތުގައި އެ ޑީއެންއޭ ދިމާނުވެ އެވެ. އަދި މީގެ ކުރިން ޝަރީއަތް ހިންގީ ހެކި އުފައްދައިގެން ކަމަށް ވެސް ވަކީލުން ބުނެ އެވެ.
މީގެ ކުރިން 2014 ވަނަ އަހަރު ވެސް ކޯޓުން އަލުން ޝަރީއަތް ހިންގަން އަންގައި ހަކަމާޑާ މިނިވަން ކުރި އެވެ. އެހެން ނަމަވެސް ޓޯކިޔޯގެ ހައި ކޯޓުން އެ ނިންމުން ބާތިލްކުރި އެވެ.
ހައި ކޯޓުގެ ނިންމުން ސުޕްރީމް ކޯޓުގައި އިސްތިއުނާފް ކުރުމުން ފަނޑިޔާރުން އެންގީ ހައި ކޯޓުން އަލުން މައްސަލަ ބެލުމަށެވެ. އެއަށްފަހު ހައި ކޯޓުން ނިންމީ އަލުން ޝަރީއަތް ހިންގުމަށެވެ.
