މެޑްރިޑް (މާޗް 11) - ސްޕެނިޝް ލީގުގައި އެސްޕަންޔޯލުން ގޯލެއް ޖަހާފައިވަނިކޮށް ފަހަތުން އަރައި 3-1 އިން މޮޅުވެ، ރެއާލް މެޑްރިޑުން ހަމަޖެހުމެއް ހޯދައިފި އެވެ.
މިއީ ލީގުގައި އެންމެ ފަހުން ރެއާލް ކުޅުނު ތިން މެޗުގެ ތެރެއިން ހޯދި ފުރަތަމަ މޮޅެވެ. މި މޮޅާ އެކު، ރެއާލް ވަނީ ލީގުގެ އެއް ވަނައިގައި އޮތް ބާސެލޯނާއާ ހަ ޕޮއިންޓަށް ގާތަށް ޖެހިލައިފަ އެވެ. ބާސެލޯނާ އަށް 24 މެޗުން 62 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލަށް ވަނީ 25 މެޗުން 56 ޕޮއިންޓް ލިބިފަ އެވެ.
ރެއާލް ދަނޑުގައި މިރޭ ފުރަތަމަ ލީޑުނެގީ އެސްޕަންޔޯލުންނެވެ. މެޗުގެ އަށް ވަނަ މިނިޓްގައި އެސްޕަންޔޯލްގެ ރުބެން ސަންޗޭޒް ނެގި ހުރަހަކަށް އަރައި، އޭރިއާތެރެއިން ހޮސޭލޫ ވަނީ ގޯލުގެ މަތީ ކަނަށް ބޯޅަ އަމާޒުކޮށްލައިފަ އެވެ. މެޗުގެ 22 ވަނަ މިނިޓްގައި ރެއާލުން އެއްވަރުކުރި ގޯލު ޖެހީ ވިނީޝިއުސް ޖޫނިއާ އެވެ. ޓޯނީ ކްރޫސް ދިން ބޯޅައެއް ހިފައިގެން އޭރިއާތެރެއަށް ވަދެ، ވިނީޝިއުސް ވަނީ ގޯލުގެ ދުރު ކަނަށް ބޯޅަ ވައްދާލައިފަ އެވެ.
ފުރަތަމަ ހާފު ނިމުމުގެ ކުރިން ރެއާލުން ލީޑުނެގި އެވެ. މެޗުގެ 39 ވަނަ މިނިޓްގައި މި ލަނޑު ޖެހީ އެޑާ މިލިޓާއޯ އެވެ. މިއީ އައުރެލިން ޗުއަމެނީ ނެގި ހުރަހަކަށް ފުންމައިގެން އަރައި، މިލިޓާއޯ ބޮލުންޖެހި ގޯލެކެވެ. ރެއާލަށް ތިން ޕޮއިންޓް ޔަގީންވީ މެޗުގެ އިތުރު ވަގުތުގައި މާކޯ އަސެންސިއޯ ޖެހި ގޯލުންނެވެ. އިތުރު ވަގުތުގެ ދެ ވަނަ މިނިޓްގައި އޭރިއާތެރެއިން ލިބުނު ބޯޅަ އަސެންސިއޯ ވަނީ ހަމަޖެހިލައިފައި ގޯލަށް ފޮނުވާލައިފަ އެވެ.
އަންނަ ހަފްތާގައި ލީގުގައި އެލް ކްލަސިކޯ މެޗު ކުޅެން ޖެހުމުގެ ކުރިން ބާސެލޯނާ އިން އަލުން ނުވަ ޕޮއިންޓަށް ލީޑުފުޅާކުރަން ފުރުސަތު އެބައޮތެވެ. އެއީ މާދަމާރޭ އެތުލެޓިކް ބިލްބާއޯގެ މައްޗަށް ކުރިހޯދައިގެންނެވެ.
