މުޅި ދުނިޔޭގައި ވެސް މަގްބޫލު ޖަޕާނުގެ ސޫޝީއާ ގުޅޭ ސާފުތާހިރުކަން ކުޑަ އަމަލުތައް ހިންގައި އޭގެ ވީޑިއޯތައް ދައުރު ކުރި މައްސަލައިގައި ޖަޕާނުގެ ފުލުހުން ތިން މީހަކު ހައްޔަރުކޮށްފި އެވެ.
މިދިޔަ މަހު އެންމެ ފުރަތަމަ އާއްމުވި ވީޑިއޯގައި ފެންނަނީ ސޫޝީ ރޭލެއްގައި މީހަކު ސޯއި ސޯސް ފުޅިއެއްގައި ދޫ ލާ މަންޒަރެވެ. އެ ވީޑިއޯ ފެނި ގިނަ ބަޔަކު ނުރުހުން ފާޅުކުރި އެވެ.
ކޫރާ ސޫސީ ރެސްޓޯރެންޓެއްގައި ސޯއިސޯސް ފުޅީގެ އިތުރުން އެ ރެސްޓޯރެންޓުގައި ބޭނުންކުރާ ތަށިތަކުގައި ކުޅު ހާކާ މަންޒަރު ވެސް އެ ވީޑިއޯއިން ފެނެ އެވެ.
އޭގެ ފަހުން ސޫޝީ ރެސްޓޯރެންޓުތަކުގައި މީހުން ގަސްދުގައި ސާފުތާހިރުކަން ކުޑަ އަމަލުތައް ހިންގައި ވީޑިއޯ ސޯޝަލް މީޑިއާއަށް އަޕްލޯޑްކުރި އެވެ.
ޖަޕާނުގެ ބޮޑެތި ސޫޝީ ރެސްޓޯރެންޓުތަކުން ވަނީ އެ ތަންތަނުގެ ކާބޯތަކެތީގެ ސާފުތާހިރުކަން ނަގައި ނުލުމަށް ގޮވާލައި، އެކަން ކުރަމުންދާ މީހުން ހުއްޓާލުމަށް އެދިފަ އެވެ.
ޖަޕާނުގެ ރެސްޓޯރެންޓުތަކުގައި "ކޮންވެޔާ ބެލްޓު" މެދުވެރިކޮށް ސޫޝީ ފޯރުކޮށްދެ އެވެ. ވީޑިއޯތައް އާއްމުވުމުން ބައެއް ރެސްޓޯރެންޓުތަކުން ވަނީ އެ ހިދުމަތް ހުއްޓާލައިފަ އެވެ.
އިރުމަތީގެ ޖަޕާނުގެ ޗައުޝިމަރޫ ރެސްޓޯރެންޓު ޗެއިނުން ބުނީ ކަސްޓަމަރަކު އިނގުރު އަސާރަ ފުޅިއެއްގެ ތެރެއަށް ސިނގިރޭޓެއް ލީ ފަހުން ކޮންވެޔާ ބެލްޓު ހިދުމަތް ހުއްޓާލާފައިވާ ކަމަށެވެ.
ޖަޕާނަކީ ސާފުތާހިރުކަމާއި ކާބޯތަކެއްޗާ ގުޅިގެން ގެންގުޅޭ ރީތި އާދަތަކަށް ޒަމާނުއްސުރެ މަޝްހޫރު ގައުމެކެވެ. އެހެންވެ، "ސޫޝީ ޓެރަރިޒަމް" ވީޑިއޯތަކާ މެދު އާއްމުން ހިތްހަމަނުޖެހެ އެވެ.
