މެކްސިކޯގެ ވެރަކްރޫޒް ސްޓޭޓުގައި އޮތް ޓްރަކެއްގެ ތެރެއިން 340 އަށް ވުރެ ގިނަ މީހުން ފެނިފައިވާ ކަމަށް އެ ގައުމުގެ އޮފިޝަލުން ބުނެފި އެވެ.
ޓްރަކުން ފެނުނު މީހުންގެ ތެރޭގައި ބެލެނިވެރިއަކު ނެތި އެކަނި ތިބި 103 ކުދިން ވެސް ހިމެނެ އެވެ. ބެލެވޭ ގޮތުގައި އެއީ ގުއާޓަމާލާ، ހޮންޑިޔުރަސް، އެލް ސެލްވޭޑޯ އަދި އިކުއޭޑޯގެ މީހުންނެވެ.
ބެލެވޭ ގޮތުގައި ޓްރަކުގައި އެ މީހުން ދަތުރު ކުރަމުން ދިޔައީ އެމެރިކާއަށް ހިޖުރަ ކުރުމަށެވެ. އެއްވެސް މީހަކަށް ގެއްލުމެއް ނުލިބޭ އިރު، ޓްރަކުގައި ފަންކާ އާއި ވެންޓިލޭޝަން ހުއްޓެވެ.
ޓްރަކް ދުއްވި މީހާ ވީ ތަނެއް ނޭނގޭ ކަމަށް އޮފިޝަލުން ބުނެ އެވެ. މެދުތެރޭ އެމެރިކާ އާއި ދެކުނު އެމެރިކާގެ ގައުމުތަކުން ފަގީރުކަމާއި ހަމަނުޖެހުމުން ސަލާމަތް ވާން ގިނަ ބަޔަކު ބޭނުންވެ އެވެ.
އެހެންވެ، ވަގަށް އެމެރިކާއަށް ގެންގޮސްދޭ ގްރޫޕްތަކަށް ގިނަ އަދަދެއްގެ ފައިސާ ދީގެން، އެމެރިކާއަށް ހިޖުރަ ކުރެވޭތޯ ކޮންމެ އަހަރަކު ވެސް އެތައް ބަޔަކު މަސައްކަތް ކުރެ އެވެ.
މިދިޔަ އަހަރު އެމެރިކާގެ ޓެކްސަސް ސްޓޭޓުގައި އޮތް ޓްރަކެއްގެ ތެރެއިން 53 މީހުންގެ ހަށިގަނޑު ފެނުނެވެ. އެއީ ވެސް ހިޖުރަ ކުރަން މަސައްކަތް ކުރި މިހުންނެވެ.
