އަމީނީ މަގު ތަރައްގީ ކުރުމުގެ މަޝްރޫއުގެ ދަށުން ތާރުއަޅާފައިވާ ބައިގައި ފެންބޮޑު ވަނީ އެ މަގު އެއްކޮށް ހަދާ ނުނިމޭތީ ކަމަށާއި، މަގު އެއްކޮށް ހަދާ ނިމުމުން ފެންބޮޑުވުމުގެ މައްސަލަ ހައްލުވާނެ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނެފި އެވެ.
އަމީނީ މަގުގެ ތާރު އެޅި ބައިގައި ފެންބޮޑުވެފައިވާ ވީޑިއޯތަކެއް ސޯޝަލް މީޑިއާގައި އާންމުވެފައިވާއިރު، އާރުޑީސީގެ އޮފިޝަލަކު މިއަދު "އަދަދު" އަށް ވިދާޅުވީ މެދުނުކެނޑި ބޯކޮށް ވާރޭ ވެހޭ ދުވަހެއްގައި ވާރޭ ވެހޭ ވަގުތު ފެން ބޮޑުވެފައި އޮތް ނަމަވެސް, ކުޑަ ވަގުތުކޮޅެއްގެ ތެރޭގައި ފެންގަނޑު އެއްކޮށް ހިނދޭނެ ކަމަށެވެ.
އަދި މަގު ހަދާ އެއްކޮށް ނިމުމުން އެ މައްސަލައަށް ދާއިމީ ހައްލެއް ލިބިގެންދާނެ ކަމަށް އޭނާ ވިދާޅުވި އެވެ.
"ފެން ހިންދާ ނިޒާމު އެއްކޮށް ފުރިހަމަ ވެގެންދާނީ އަމީނީ މަގު ނިމޭއިރު.. އަދި މުޅި މަގު ނިމޭއިރު ފެންހިންދާ ނިޒާމް އަޕްގްރޭޑް ކުރެވި އާ ޕަމްޕްތައް ވެސް ބެހެއްޓިގެންދާނެ," އޭނާ ވިދާޅުވި އެވެ.
އަމީނީ މަގުގެ ތާރުއެޅި ބައި އާންމުންނަށް ހުޅުވާލީ އިއްޔެ އެވެ. މިހާރު ތާރުއަޅައި އާންމުންނަށް ހުޅުވާލާފައިވަނީ އެ މަގުގެ ފުރަތަމަ ތިން ސެގްމެންޓެވެ.
އަމީނީ މަގު ތަރައްގީ ކުރުމުގެ މަސައްކަތް އެންމެ ފުރަތަމަ ޕްލޭނިން މިނިސްޓްރީއިން ހަވާލުކުރީ އާރުޑީސީއާ އެވެ. ނަމަވެސް އެ ކުންފުނިން ގެނައި ތާރުއަޅާ މެޝިންތައް ބަހައްޓާނެ ބިމެއް ލިބުން ލަސްވުމާ އެކު، އަމީނީ މަގު ތަރައްގީ ކުރުމުގެ މަސައްކަތް ހަލުވި ކުރުމަށް އެ ކުންފުނިން ތާރު އެޅުން އެމްޓީސީސީއާ ހަވާލު ކުރީ މިދިޔަ މަހުގެ 11 ގަ އެވެ.
އެއާއެކު އެ މަގުގެ ފުރަތަމަ ތިން ސެގްމެންޓުގައި އެމްޓީސީސީއިން ތާރުއަޅާ ނިންމާލީ 14 ފެބްރުއަރީ ގައި ފަސް ގަޑިއިރުގެ މަސައްކަތުންނެވެ. އެގޮތުން ތާރުއަޅާ ނިންމާލާފައިވަނީ ސްޓެލްކޯ ސަރަހައްދާ ހަމައަށެވެ. މިހާރު އަމީނީ މަގު ތަރައްގީ ކުރުމުގެ މަޝްރޫއުގެ ދަށުން ކުރިއަށް ދަނީ އެ ހިސާބުން ފެށިގެން ގަލޮޅު ޕޮލިސް ސްޓޭޝަނާ ހިސާބަށް މަގު ކޮނުމުގެ މަސައްކަތެވެ.
ޕްލޭނިން މިނިސްޓަރު މުހައްމަދު އަސްލަމް މިދިޔަ މަހުގެ ފުރަތަމަ ހަފުތާގައި މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
