އަމީނީ މަގު ތަރައްގީކުރުމަށް ކުރިއަށްގެންދާ މަޝްރޫއުގެ ދަށުން އާރުޑީސީއިން އެމްޓީސީސީއާ ހަވާލުކޮށްގެން މިހާތަނަށް ތާރުއަޅާފައިވާ އޮތް ބައި ހުޅުވާލައިފި އެވެ.
ތާރު އެޅުމުގެ މަސައްކަތް ނިންމުމަށްފަހު ހުޅުވާލާނެ ކަމަށް ޕްލޭނިން މިނިސްޓްރީއިން ފުރަތަމަ ބުނީ މިދިޔަ ހަފުތާގެ ތެރޭގަ އެވެ. ނަމަވެސް ފަހުގެ ތައްޔާރީތައް ނުނިމި މިދިޔަ ހަފުތާގެ ތެރޭގައި އަމީނީ މަގު ހުޅުވާލެވޭ ގޮތެއް ނުވި އެވެ.
"މަސައްކަތް ކުރަމުން މިދަނީ ރޯދައިގެ ކުރިން އިމާދުއްދީން ސްކޫލާ ހަމާލަށް ތާރުއަޅާ ނިންމާލުމަށް،" ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު" އަށް މިދިޔަ ހަފުތާ ވިދާޅުވި އެވެ.
އަމީނީ މަގު ތަރައްގީ ކުރުމުގެ މަސައްކަތް އެންމެ ފުރަތަމަ ޕްލޭނިން މިނިސްޓްރީއިން ހަވާލުކުރީ އާރުޑީސީއާ އެވެ. ނަމަވެސް އެ ކުންފުނިން ގެނައި ތާރުއަޅާ މެޝިންތައް ބަހައްޓާނެ ބިމެއް ލިބުން ލަސްވުމާއެކު، އަމީނީ މަގު ތަރައްގީ ކުރުމުގެ މަސައްކަތް ހަލުވި ކުރުމަށް އެ ކުންފުނިން ތާރު އެޅުން އެމްޓީސީސީއާ ހަވާލު ކުރީ މިދިޔަ މަހުގެ 11 ގަ އެވެ.
އެއާއެކު އެ މަގުގެ ފުރަތަމަ ތިން ސެގްމެންޓުގައި އެމްޓީސީސީއިން ތާރުއަޅާ ނިންމާލީ 14 ފެބްރުއަރީ ގައި ފަސް ގަޑިއިރުގެ މަސައްކަތުންނެވެ. އެގޮތުން ތާރުއަޅާ ނިންމާލާފައިވަނީ ސްޓެލްކޯ ސަރަހައްދާ ހަމައަށެވެ. މިހާރު އަމީނީ މަގު ތަރައްގީ ކުރުމުގެ މަޝްރޫއުގެ ދަށުން ކުރިއަށް ދަނީ އެ ހިސާބުން ފެށިގެން ގަލޮޅު ޕޮލިސް ސްޓޭޝަނާ ހިސާބަށް މަގު ކޮނުމުގެ މަސައްކަތެވެ.
އަމީނި މަގު ޒަމާނީ ފެންވަރަށް ތަރައްގީކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ.
ނަމަވެސް އެ މުއްދަތަށް މަސައްކަތް ނުނިމޭނެ ކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް މި މަހުގެ ފުރަތަމަ ހަފުތާގައި މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
