ވޮލީބޯލް އެކަޑެމީ އޮފް މޯލްޑިވްސްއާ އެކު ތަމްރީންވާން ބޭނުންވާ 16 އަހަރުން ދަށުގެ ކުޅުންތެރިންނަށް އެ ފުރުސަތު ހުޅުވާލައިފި އެވެ.
ވޮލީބޯޅަ ކޯޗެއްގެ ގޮތުގައި ގިނަ ދުވަހު މަސައްކަތްކުރި އަދި ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގައި ގިނަ މަސައްކަތްތަކެއް ކޮށްފައިވާ މުހައްމަދު ޝާފީ ހިންގަމުން އަންނަ ވޮލީބޯޅަ އެކަޑެމީ އޮފް މޯލްޑިވްސް އިން މަސައްކަތް ކުރަމުން އަންނަނީ ޖޫނިއާ ލެވެލްގެ ޓީމުތަކެއް ތައްޔާރު ކުރުމެވެ.
އެކަޑެމީގެ މި އަހަރުގެ މަސައްކަތްތައް ފެށުމަށް ހަމަޖެހިފައިވަނީ 16 އަހަރުން ދަށުގެ އަންހެން އަދި ފިރިހެން ކުޅުންތެރިންގެ ފަރިތަކުރުންތަކާ އެކުގަ އެވެ. އެ ގޮތުން އެކަޑެމީގެ ތަމްރީން ޕްރޮގްރާމްގައި ބައިވެރިވުމަށް މިހާރު އޮތީ ފުރުސަތު ހުޅުވާލައިފަ އެވެ.
ޓްރައިއައުޓްސްގައި ބައިވެރިވުމަށް މި ޕޯސްޓްގައިވާ ކިއުއާރް ކޯޑު މެދުވެރިކޮށް ކުރިއަށްދެވޭނެ.
ވޮލީބޯލް އެކަޑެމީ އޮފް މޯލްޑިވްސް ކޯޗު، ޝާފީ އަކީ އެފްއައިވީބީ ލެވެލް ތިނެއްގެ ސަނަދު އޮތް ކޯޗެކެވެ. އޭނާ އަކީ 2000ގެ ކުރީކޮޅު ވީއޭއެމުން ކުރިއަށްގެންދިޔަ ޔޫތު ޑިވެލޮޕްމަންޓް ޕްރޮގްރާމްތަކުގައި އިސްކޮށް ހަރަކާތްތެރިވި ކޯޗެކެވެ. އޭނާ އަކީ 2014ގެ ގައުމީ މުބާރާތުގެ އަންހެން ޑިވިޝަނަށްގެ ތަށި އައްޑޫ ސްޕޯޓްސް ކުލަބަށް ހޯދައިދިން ކޯޗެވެ.
ކޯޗިންގެ ތެރޭގައި އަމަލީ ގޮތުން ގިނަ ދުވަސްތަކެއްގައި އުޅުމަށް ފަހު އޭނާ ވަނީ ވީއޭއެމްގެ ހިންގުމުގެ ގިނަ މަގާމުތަކުގައި މަސައްކަތްކޮށްފަ އެވެ. އެ ގޮތުން ޓެކްނިކަލް ޑިޕާޓްމެންޓުގެ ގިނަ މަގާމުތަކާއި އެޑްމިނިސްޓްރޭޓިވް ލެވެލްގެ އިތުރުން ވީއޭއެމުގެ ގިނަ މުބާރާތްތައް ހިންގުމުގައިވެސް އޭނާ މުހިންމު ދައުރެއް އަދާކުރި އެވެ.
ވޮލީބޯލް އެކަޑެމީ އޮފް މޯލްޑިވްސް އިން ޒުވާން ކުޅުންތެރިން ކުރިއެރުވުމުގެ މަސައްކަތްކުރަމުން އަންނައިރު، އަމިއްލަ ގޮތުން ގިނަ ކޯޗުންތަކެއް މިހާރުވެސް އަންނަނީ ޖޫނިއާ ތަމްރީން ޕްރޮގްރާމްތަކާއި ވޮލީބޯޅައިގެ ބޭސިކް ދަސްކޮށްދޭ ކޯސްތައް މާލެ އާއި އަތޮޅުތަކުގައި ހިންގަމުންނެވެ.
