މޯލްޑިވްސް އޮލިމްޕިކް ކޮމިޓީ (އެމްއޯސީ) އިން މި އަހަރަށް 72 މިިލިއަން ރުފިޔާގެ ބަޖެޓެއް ކަނޑައަޅައި، ފާސްކޮށްފި އެވެ.
ހެންވޭރު މީރުމާގެ ކާނިމާ މާލަމުގައި މިއަދު ބޭއްވި މޯލްޑިވްސް އޮލިމްޕިކް ކޮމިޓީގެ އަހަރީ އާންމު ޖަލްސާގައި މި އަހަރަށް އެމްއޯސީން ފާސްކުރި ބަޖެޓްގެ ބޮޑުބައެއް ހިއްސާކުރަނީ ސަރުކާރުން ލިބޭ ފަންޑް އަށެވެ.
އެ ގޮތުން، ބަޖެޓްގެ 80 ޕަސެންޓަކީ މި ފަހަރު ސަރުކާރުން ލިބޭނެ ބައި ކަމަށް، އެމްއޯސީން ވަނީ މައުލޫމާތު ދީފަ އެވެ. ސަރުކާރުން މި ބަޖެޓްގެ ބޮޑުބައި ހިއްސާކުރާ ސަބަބެއްގެ ގޮތުގައި އޮލިމްޕިކް ކޮމިޓީން ފާހަގަކޮށްފައިވަނީ މި އަހަރަކީ ރާއްޖޭން ބައިނަލްއަގުވާމީ ފަސް ގޭމްސްއެއްގައި ވާދަކުރާ އަހަރެއް ކަމަށްވާތީ އެވެ.
އެ ގޮތުން، ރާއްޖޭން ވާދަކުރާގޮތަށް ހަމަޖެހިފައިވަނީ ޓްރިންޑާޑް އެންޑް ޓޮބޭގޯގައި ބާއްވާ ކޮމަންވެލްތު ޔޫތު ގޭމްސް، އިންޑޮނީޝިއާގައި ބާއްވާ އެނޮކް ވޯލްޑް ބީޗް ގޭމްސް، މަޑަގަސްކަރާގައި ހޯސްޓްކުރާ އިންޑިއަން އޯޝަން އައިލެންޑް ގޭމްސް (އައިއޯއައިޖީ)، ޗައިނާގައި ބާއްވާ އޭޝިއަން ގޭމްސް އަދި ތައިލެންޑްގައި ކުރިއަށްދާ އޭޝިއަން އިންޑޯ އެންޑް މާޝަލް އާޓްސް ގޭމްސް އެވެ.
މީގެ ތެރެއިން އައިއޯއައިޖީ އާއި އޭޝިއަން ގޭމްސް އަކީ ރާއްޖޭން ބޮޑު ކޮންޓިންޖެންޓެއް ވާދަކުރާ ގޭމްސްތަކެކެވެ. އައިއޯއައިޖީ އަކީ ސަރުކާރުން ހާއްސަ އަހައްމިއްޔަތުކަމެއް ދޭނެ ގޭމްސްއެއްގެ ގޮތުގައި އެމްއޯސީގެ އަހަރީ އާންމު ޖަލްސާ ޝަރަފްވެރިކުރައްވައި، ޔޫތު މިނިސްޓަރު، އަހުމަދު މަހުލޫފް ދެއްކެވި ވާހަކައިގައި ވަނީ ފާހަގަކުރައްވައިފަ އެވެ.
އޮލިމްޕިކް ކޮމިޓީގެ އަހަރީ އާންމު ޖަލްސާގެ ތެރެއިން، އެމްއޯސީގެ ރައީސް މުހައްމަދު އަބްދުއްސައްތާރު ވާހަކަ ދައްކަވަނީ.--- ފޮޓޯ: މުހައްމަދު ޝާބިން/ އަދަދު
"މި އަހަރުގެ ބަޖެޓް އަޅުގަނޑުމެން ވާނީ މިނިސްޓްރީ އޮފް ޔޫތު އެންޑް ސްޕޯޓްސް އަށް ހުށަހަޅާފައި. ދެން އެ ބޭފުޅުންނާ ޑިސްކަސް ކުރަމުން މި ދަނީ އަޅުގަނޑުމެންގެ ބަޖެޓާ ބެހޭގޮތުން. ބޮޑުބައެއް އެ ބޭފުޅުން އަތުން ލިބޭނެ ކަމަށް ބަލައިގެން، ކޮން ކުޅިވަރެއްތޯ ދާނީ. މި ގޮތަށް ނިމުނީމަ ފުލް ބަޖެޓެއް އެނގޭނީ، އެ އަށް އެ ބޭފުޅުން އެ ތިބީ އަޅުގަނޑުމެންނާ އެއްކޮށް ވޯކް ކުރާ ގޮތަށް،" އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު (ޗަމްޕީ) ވިދާޅުވި އެވެ.
އޮލިމްޕިކް ކޮމިޓީގެ މާލީ މުއާމަލާތްތައް ގަވާއިދުން އޮޑިޓް ކުރުން ކުރިއަށްދެ އެވެ. އެ ގޮތުން، މަހަކު އެއް ފަހަރު އިންޓާނަލް އޮޑިޓެއް ކުރެވިގެންދާއިރު، ކޮންމެ ކުއާޓާއެއްގައި އެކްސްޓާނަލް އޮޑިޓެއް ކުރެވިގެންދެ އެވެ.
"އަޅުގަނޑުމެން ވަރަށް ބޮޑު އަހައްމިއްޔަތުކަމެއް ދެން ހަގީގަތުގައި މާލީ ކަންކަން ވީ އެންމެ ރަނގަޅަށް ގެންދިއުމަށް، ދެން، އަޅުގަނޑުމެން މި ގެންގުޅޭ އޮޑިޓް ކުރުމުގެ ކަންކަމަށް ވަރަށް ރަނގަޅު ފީޑްބެކް ލިބެމުން ދަނީ،" ސައްތާރު ވިދާޅުވި އެވެ.
އޮލިމްޕިކް ކޮމިޓީން މިއަދު ބޭއްވި އަހަރީ އާންމު ޖަލްސާގައި ވަނީ މިދިޔަ އަހަރު ބޭއްވި ކޮމަންވެލްތު ގޭމްސް އާއި އިސްލާމިކް ސޮލިޑާރިޓީ ގޭމްސްގައި އެމްއޯސީގެ ފަރާތުން، ޗެފް ޑި މިޝަަނަރުންގެ ގޮތުގަޔާއި މީޑިއާ އާއި މެޑިކަލް އޮފިސަރުންގެ ގޮތުގައި ހަރަކާތްތެރިވި ފަރާތްތަކަށް ހަނދާނީ ފިލާ ހަވާލުކޮށްފަ އެވެ.
