ޕާކް ވޮލީބޯޅަ ކުރިއެރުވުމަށް ދުނިޔޭގެ އެކި ހިސާބުތަކުގައި ރެޑްބުލް އިން ކުރިއަށްގެންދާ "ރެޑްބުލް" ސްޕައިކް" ރާއްޖޭގައި މިއަދު ފަށައިފި އެވެ.
ހަތަރު ކުޅުންތެރިން ކޮޅަކަށް ލައިގެން ކުޅޭ "ރެޑްބުލް ސްޕައިކް" މުބާރާތް ފުރަތަމަ ފަހަރަށް ރާއްޖޭގައި ބާއްވާއިރު، މި ފަހަރުގެ މުބާރާތުގައި އަންހެން ހަ ޓީމު އަދި ފިރިހެން 13 ޓިމް ވާދަކުރެ އެވެ.
ހުޅުމާލޭ ބީޗްވޮލީބޯޅަ ކޯޓުގައި ކުރިއަށްދާ މި މުބާރާތަށް ޖުމްލަ އެކު، 60 ހާސް ރުފިޔާގެ ފައިސާގެ އިނާމް ހުށަހަޅާފައިވެ އެވެ. މި މުބާރާތުގެ މެޗުތައް މިއަދު ހެނދުނު ފެށިިއިރު، މިއަދު ހަވީރާއި ރޭގަނޑު އަދި މާދަމާ ވެސް މެޗުތައް ކުރިއަށްދާނެ އެވެ. މުބާރާތުގެ ފައިނަލް މެޗާއި އިނާމްދިނުމުގެ ރަސްމިއްޔާތު އޮންނާނީ މާދަމާރޭ އެވެ.
ރެޑްބުލް ސްޕައިކްގައި މިއަދު ހެނދުނު ކުރިއަށްދިޔަ މެޗެއްގެ ތެރެއިން.--- ފޮޓޯ: މުހައްމަދު އަހުސަން/ ރެޑްބުލް ކޮންޓެންޓް ޕޫލް
މުބާރާތް މިއަދު ހެނދުނު ފެށީ ފިރިހެން ބައިގެ މެޗުތަކުންނެވެ. އެ ގޮތުން ފުރަތަމަ މެޗުގައި އަލްޖިބްރާ އާއި އަވަދި ވާދަކޮށް ސީދާ ދެ ގޭމުން މޮޅުވީ އަލްޖިބްރާ އެވެ. ޓީމް ޕްރޯ އާއި ޓީމް މަންޒާ ވާދަކުރި މެޗު ސީދާ ދެގޭމުން މަންޒާ ކާމިޔާބުކުރިއިރު، ޓީމު އައްޓާ އާއި، މެންދަން ވާދަކުރި މެޗު 2-1 އިން ކާމިޔާބުކުރީ މެންދަން އެވެ. ހެނދުނު ކުޅުނު ފަހު މެޗުގައި ކްލަބް ފްލޭމްސް އާއި ޑީވީވީއޭ ވާދަކޮށް ސީދާ ދެ ގޭމުން މޮޅުވީ ޑީވީވީއޭ އެވެ.
ރެޑްބުލް އިން ހާމަކުރާ ގޮތުގައި ފުރަތަމަ މުބާރާތް މާލޭގައި ބޭއްވި ނަމަވެސް ކުރިއަށް ހުރި މުބާރާތްތައް ރާއްޖޭގެ އެކި ސަރަހައްދުތަކުގައި ބޭއްވުމަށް އިސްކަންދޭނެ އެވެ. އެ ގޮތުން ވޮލީގެ ފޯރި އޮންނަ އަތޮޅުތަކުގައި މި މުބާރާތް ބޭއްވުމަށް މަސައްކަތް ކުރާނެ ކަމަށް ރެޑްބުލް އޮފިޝަލުން މައުލޫމާތުދެ އެވެ.
ރެޑްބުލް އަކީ ދުނިޔޭގެ އެކި ގައުމުތަކުގައި އެކްސްޓްރީމް ސްޕޯޓްސް ކުރިއެރުވުމުގައި މަގުބޫލު ބްރޭންޑެކެވެ. އެ ގޮތުން ރާއްޖޭގައި ވެސް ކުޅިވަރުގެ އެކި ހަރަކާތްތައް ހިންގައި ބޭރު ގައުމުތަކުގެ އެތުލީޓުންނާ ވާދަކޮށްލުމުގެ ފުރުސަތު ދިވެހި އެތުލީޓުންނަށް ހޯދައިދެ އެވެ.
އެންމެ ފަހުން ރެޑްބުލް އިން ރާއްޖޭގައި ހިންގި ކުޅިވަރު ހަރަކާތަކީ ރެޑްބުލް ހާފް ކޯޓު ތުރީ އޮން ތުރީ ބާސްކެޓްބޯޅަ މުބާރާތެވެ. މި މުބާރާތުގެ ރާއްޖެ ކޮލިފައިންގެ އެއް ވަނަ ހޯދި ޓީމަށް މިސްރުގައި ކުރިއަށްދިޔަ ގައުމުތަކުގެ ޗެމްޕިއަނުން ވާދަކުރި ވޯލްޑް ފައިނަލްސްގައި ބައިވެރިވުމުގެ ފުރުސަތު ރެޑްބުލް އިން ހޯދަދިނެވެ. އޭގެ ކުރިން ރެޑްބުލް އިން ވަނީ ވިނިން ފައިވްގެ ނަމުގައި ކުޑަ ގޯލަށް ފޯރިގަދަ މުބާރާތެއް ކުރިއަށް ގެންގޮސްފަ އެވެ. ބްރެޒިލްގެ ފުޓްބޯޅަ ތަރި ނޭމާގެ ބްރޭންޑް ނަމާ ގުޅުވައިގެން ކުރިއަށްދިޔަ އެ މުބާރާތުގެ ޗެމްޕިއަން ވަނީ ދުނިޔޭގެ އެކި ގައުމުތަކުގެ ޗެމްޕިއަނުންނާ ދެކޮޅަށް ވާދަކޮށްފަ އެވެ.
