ނައިޖީރިއާގައި ބޭއްވި ރިޔާސީ އިންތިހާބުން ކުރި ލިބުނީ ވެރިކަން ކުރާ ޕާޓީގެ ކެންޑިޑޭޓް ބޯލާ ޓިނުބޫއަށް ކަމަށް އިއުލާންކޮށްފި އެވެ.
ރަސްމީ ނަތީޖާ ދައްކާ ގޮތުން 70 އަހަރުގެ ޓިނުބޫއަށް 36 ޕަސެންޓް ވޯޓު ލިބުނެވެ. އެންމެ ވާދަވެރި އާތިކޫ އަބޫބަކަރްއަަށް ލިބުނީ 29 ޕަސެންޓް ވޯޓެވެ. އަދި ލޭބާ ޕާޓީގެ ޕީޓާ އޯބީއަށް ލިބުނީ 25 ޕަސެންޓެވެ.
އާބޫބަކަރް އަދި އޯބީގެ ޕާޓީއިން ވެސް ބުނީ އިންތިހާބުގައި މަކަރު ހަދާފައިވާ ކަމަށެވެ. އެ ދެ ޕާޓީއިން ޑިމާންޑް ކުރަނީ އާ އިންތިހާބަކަށެވެ.
ޓިނުބޫއަކީ ނައިޖީރިއާގެ އެންމެ މުއްސަނދި އެއް ސިޔާސީ ލީޑަރެވެ. އޭނާގެ ކެމްޕެއިން ބިނާކުރީ ލާގޯސް ސިޓީގެ ގަވަރުނަރަކަށް ހުންނެވި އިރު، އެ ތަަނަށް ގެނައި ތަރައްގީގެ މައްޗަށެވެ. އެހެން ނަމަވެސް އެ ސިޓީގައި ކުރި ލިބުނީ އޯބީ އަށެވެ.
މިހާރު ރައީސް ކަމުގައި ހުންނެވި މުހައްމަދު ބުހާރީ ދެ ދައުރު ފުރިހަމަ ކުރައްވާފައިވާ އިރު، ނައިޖީރިއާއަށް އެކަށީގެންވާ އިގްތިސާދީ ކުރިއެރުން ނުލިބޭ ކަމަށް ބައެއް ފަރާތްތަކުން ބުނެ އެވެ.
އޭގެ އިތުރުން އެ ގައުމުގެ ދާހިލީ ހަމަނުޖެހުން ވެސް ވަނީ ބޮޑުވެފަ އެވެ. އިސްލާމީ ހަރުކަށި ފިކުރުގެ ޓެރަރިސްޓުންގެ އިތުރުން މީހުން ރަހީނުކޮށް ފައިސާ ޑިމާންޑް ކުރާ ގޭންގުތައް ހަރަކާތްތެރިވުން ވެސް ވަނީ އިތުރުވެފަ އެވެ.
