މެޑްރިޑް (މާޗް 1) - ފީފާ ބެސްޓް އެވޯޑްސްގައި ކޮންމެ ގައުމެއްގެ ކެޕްޓަނަށް ވޯޓުލާން ލިބޭ ފުރުސަތުގައި ރެއާލް މެޑްރިޑަށް ކުޅޭ އޮސްޓްރިއާގެ ކެޕްޓަން ޑޭވިޑް އަލަބާ، އޭނާއާ އެކު ރެއާލަށް ކުޅޭ، ފްރާންސްގެ ކަރިމް ބެންޒެމާ އަށް، އެއް ވަނަ އަށް ވޯޓު ނުދިން ސަބަބު އޮޅުންފިލުވައިދީފި އެވެ.
ފީފާ ރަސްމީ ވެބްސައިޓް މެދުވެރިކޮށް، ގައުމުތަކުގެ ކެޕްޓަނުންނާއި ކޯޗު އަދި މީޑިއާ އޮފިޝަލް ވޯޓުލާ ގޮތް ހާމަކުރެ އެވެ. އެ ގޮތުން، ރެއާލްގެ ގިނަ ސަޕޯޓަރުންގެ ލޮލުގައި އަޅައިގަތީ އަލަބާގެ ފުރަތަމަ ވޯޓު، ބެންޒެމާގެ ބަދަލުގައި ޕީއެސްޖީގެ ތަރި ލިއޮނަލް މެސީ އަށް ދިނުމުންނެވެ. އަލަބާ ދެ ވަނަ އަށް ބެންޒެމާ އަށް ވޯޓު ދިންއިރު، ތިން ވަނަ ވޯޓު ދިނީ ކީލިއަން އެމްބާޕޭ އަށެވެ.
އަލަބާ، އެއް ވަނަ އަށް ނޮމިނޭޓްކުރި ކުޅުންތެރިއަކީ ބެންޒެމާ ކަމަށްނުވާތީ، ގިނަ ސަޕޯޓަރުން އޭނާއާ މެދު ނުރުހުން ފާޅުކޮށް ސޯޝަލް މީޑިއާގައި ޝުއޫރުފާޅުކުރި އެވެ. އެކަންކަމުގެ ސަބަބުން ކެތްތެރިކަން ކޮޅުންލައި، އަލަބާ ވަނީ ކަންތައްތައް ހިނގާދިޔަ ގޮތް ސޯޝަލް މީޑިއާގައި ހިއްސާކޮށްފަ އެވެ.
ރަސްމީ ސޯޝަލް މީޑިއާ އެކައުންޓްތައް މެދުވެރިކޮށް އަލަބާ ދޫކޮށްލި މެސެޖްގައި ބުނެފައިވަނީ އޮސްޓްރިއާގައި ކެޕްޓަން ވޯޓުލަނީ މުޅި ސްކޮޑުގެ މަޝްވަރާގެ މަތިން ކަމަށާއި އޮސްޓްރިއާ ކެޕްޓަންގެ ހޮވުމަކީ އެ ގައުމުގެ ގައުމީ ޓީމުގެ ސްކޮޑުގެ މެޖޯރިޓީގެ ނިންމުން ކަމަށެވެ.
"އެންމެނަށް ވެސް އެނގޭނގެ. ހާއްސަކޮށް ކަރީމް (ބެންޒެމާ) އަށް އެނގޭނެ، އަހަރެން ކިހާވަރަކަށް އޭނާގެ ކުޅުމަށް ތައުރީފުކޮށް ވާހަކަ ދައްކައި އޭނާ އަށް ސަޕޯޓްދޭކަން. އަހަރެން އަދިވެސް މި ބުނަނީ، އޭނަ (ބެންޒެމާ) އަކީ ދުނިޔޭގައި ހުރި އެންމެ މޮޅު ސްޓްރައިކަރު،" އަލަބާ ބުންޏެވެ.
މެސީ، ފީފާ ބެސްޓް އެވޯޑްސްގެ މޮޅު ކުޅުންތެރިޔާ އަށް ދޭ ޓްރޮފީ 52 ޕޮއިންޓާ އެކު އެވެ. ދެ ވަނަ ހޯދި އެމްބާޕޭ އަށް 44 ޕޮއިންޓް އަދި ތިން ވަނަ މަގާމުގައި ނިންމި ބެންޒެމާ އަށް 34 ޕޮއިންޓް ލިބުނެވެ.
