ކުރީގެ ރައީސް މައުމޫން އަބްދުލްގައްޔޫމް ލީޑްކުރައްވާ މޯލްޑިވްސް ރިފޯމް މޫވްމަންޓް (އެމްއާރުއެމް) ގެ އެކްސްކޯއިން އެނަލިސިސް ކޮމިޓީއެއް އެކުލަވާލައި، ރިޔާސީ އިންތިހާބުގެ މަޝްވަރާތައް އެ ޕާޓީގެ އެތެރޭގައި ފަށައިފި އެވެ.
އެމްއާރުއެމްގެ ނައިބު ރައީސް އައިމިނަތު ނާދިރާ "އަދަދު" ނޫހަށް ވިދާޅުވީ މި އަހަރުގެ ޖެނުއަރީ މަހުން ފެށިގެން އެމްއާރުއެމްގެ އެތެރޭގައި ރިޔާސީ އިންތިހާބާ ގުޅޭ މަޝްވަރާތައް ފަށައިގެން ކުރިއަށްދާ ކަމަށެވެ.
ކުރިއަށް އޮތް ފަސް އަހަރަށް ވެސް ރައީސް އިބްރާހީމް މުހައްމަދު ސޯލިހާއެކު ކޯލިޝަން ހެދުމަށް އެމަނިކުފާނު ފޮނުވި ސިޓީއާ ގުޅޭ ގޮތުން މަޝްވަރާތައް ފަށާނީ އެތެރޭގެ މަޝްވަރާތައް ނިންމުމަށް ފަހު ކަމަށް ނާދިރާ ވިދާޅުވި އެވެ. އަދި އެ ޕާޓީގެ ޒައީމް، ރައީސް މައުމޫން ރާއްޖެ ވަޑައިގަތުމުން ކަމަށެވެ.
"ރައީސް ފޮނުވި ސިޓިއާ މެދު މަޝްވަރާކޮށް ގޮތެއް ނިންމަން އަންނަން ވާނީ، އަޅުގަނޑުމެންގެ އެތެރޭގެ މަޝްވަރާތަކަށް ފަހު، އެ މަޝްވަރާތައް ޖެނުއަރީ މަހުން ފެށިގެން ކުރިއަށް އެބަ ހިނގާ، ނިންމުމަކާ ހަމައަށް ވާސިލްވާން ގިނަ މަސައްކަތްތަކެއް ކުރެވެމުން އެބަ ދޭ،" ނާދިރާ ވިދާޅުވި އެވެ.
ޕާޓީގެ އާންމު މެންބަރުންގެ ހިޔާލުތައް ހޯދުމަށް އެކި ބައްދަލުވުންތައް ބާއްވައި، ފޯނު ސާވޭ މެދުވެރިކޮށް ވެސް މެންބަރުންގެ ހިޔާލުތައް ހޯދަމުންދާ ކަމަށް ނާދިރާ ވިދާޅުވި އެވެ. އަދި ގޮތެއް ނިންމުމުގެ ކުރިއަށް ފަންނީ ގޮތުން ސިޔާސީ މަސްރަހު ދިރާސާކުރަން އެނަލިލިސް ކޮމިޓީއެއް ވެސް ވަނީ ނަގައިފަ އެވެ.
އޭގެ އިތުރުން ޕާޓީގެ އެތެރޭގެ ރިޔާސީ ޕްރައިމަރީއާއި ކޯލިޝަން ހެދުމާ ގުޅޭ ގޮތުން މިހާރު ޕާޓީގެ އަސާސީ ގަވާއިދުގައި ހިމެނޭ ކަންކަން ވެސް ދިރާސާކުރަމުންދާ ކަން ފާހަގަ ކުރެއްވި އެވެ. އަދި، އެ ކަމާ ގުޅޭ ދެ އުސޫލެއް ބަދަލުކުރުމުގެ މަސައްކަތެއް މިހާރު ވެސް ކުރެވެމުންދާ ކަމަށް އޭނާ ވިދާޅުވި އެވެ.
ރިޔާސީ އިންތިހާބާ މެދު އެ ޕާޓީން ވަކި ގޮތެއް އަދި ނިންމާފައި ނުވާއިރު، ރައީސް މައުމޫންގެ ދަރިކަލުން އަދި އެމްއާރުއެމްގެ ރައީސް އަހުމަދު ފާރިސް މައުމޫން ރިޔާސީ އިންތިހާބަށް ނެރުމަށް ގޮވާލައި އެ ޕާޓީގެ މެންބަރުން އަންނަނީ ސޯޝަލް މީޑިއާގައި ކެމްޕެއިނެއް ވެސް ކުރަމުންނެވެ.
އެނގިފައިވާ ގޮތުގައި މިހާރު ސަރުކާރުގައި ތިއްބެވި އެމްއާރުއެމްގެ ބައެއް ބޭފުޅުން މިހާރު އޮތް ކޯލިޝަން ދަމަހައްޓަން ބޭނުންވެ އެވެ. ނަމަވެސް މިހާރު އޮތް ސަރުކާރާ މެދު ބައެއް ހިތްހަމަނުޖެހުންތަކާއި ކަންބޮޑުވުންތަކެއް ވެސް ޕާޓީގެ އިސް ސަފުގައި އެބަ އޮތެވެ.
އެމްއާރުއެމް އުފެއްދީ، ކުރިން މައުމޫން ހުންނެވި ޕީޕީއެމުން އެމަނިކުފާނު ވަކިކޮށް ޕީޕީއެމް ހޯދުމަށް ޝަރީއަތް މެދުވެރިކޮށް ވެސް ކުރެއްވި މަސައްކަތް ނާކާމިޔާބުވުމުންނެވެ. ޕީޕީއެމުން މައުމޫން ވަކިކުރީ، އޭރު ރައީސަކަށް ހުންނެވި އަދި މައުމޫންގެ އެއްބަފާ ކޮއްކޯފުޅު އަބްދުﷲ ޔާމީނާ ދެމެދު އުފެދުނު ހިޔާލުތަފާތުވުންގެ ތެރޭގަ އެވެ.
